14
Zangna luota a thaa a cawpa kha cuhluo tie ung, cuorasala ama khueruena kha nama i khing nakawta cuo kha se. Cawsaa chekha ta ning phangting kha ning riypatana a cuo tapata ama zang ning kha zangna luo a thaa a cawpa tie ta uohnaasiyhnaa dyi kha ama ning. A phangtling a ningpa tie ta a ning lipa tie kha ese kha yi se. A ning lipa tie zaw ta a ningpa tie kha syi ra kha yi se. Tahematapakieca Khazing ta iema kha a cuhluo ra yi. Malie changtaapa bie ripa riypata nama ca ahung tama na cuo? Iema sue a ngiethe ama cuo riypa hne sue duotepa ama cuo riypa ca ama byipaapa biechina cungliena a aw. Cakhutaa sue a ngiethepa zaw ama cuo aa, tahematapakieca Abyipanote 14:4 Hluo vie caa-uv lieca Khazing* a ta. ca sue a ngiethe khutuv tana a cuo.
Cawsaa chekha ta ning ning kha kha ning hrangpa laata a pha vie tapata ama rue ning kha a hrangpa tie ta ning bangkhuo hing a lu pata ama rue. Ama bangkhuo ta ama palung lie'apa kha a siesa pata zang yi se. Ning ning kha kha a sungnaa vie ta a ruepa ca Abyipa pa-uvsathyina ta pasungpanaa se. A phangtling ta a ningpa tie kha Abyipa pa-uvsathyina ta ama ningpa tana a cuo, tahematapakieca Khazing khana alawna bie ama hluo. A ning lipa tie zaw Abyipa pa-uvsathyina ta ama ning lipa cuote, Khazing na alawna bie ama hluo ra.
Ahunghmuo kiema cuo dyi ta hring va puv, ahunghmuo kiema cuo dyi ta thiy va puv. Ma hringpa ta a cuo kie Abyipa cuota hring pate, ma thiy kie Abyipa cuotana ma thiy. Cacuonakawta ma thiy a cuo zaw ma hring a cuo zaw Abyipa huopa tana ma cuo. Hingpa kawlie hing tana Khrih ca a thiypa hne a hringpa tie Abyi cuo riypata, thiy te a hring pakhaa napa ta a cuo.
10 Cacuokie khaapanakawma nama uvnu hne nama sieta tienote 14:10 Gk Uvnu ca nama syi pachaa? A cuo li kie, khaapanakawma nama uvnu hne nama sieta kha nama ese pachaa? Ma bangkhuo hingta Khazingnote 14:10 Hluo vie caa-uv lieca Khrih hmielie* a ta. hmielie bie ripa riypata a daa riypatana ma cuo ung. 11 Caapathepa lieta,
"Kama Abyipa i hring pahaata,
cawsaa bangkhuo ta
i hmielie kha ama pakhuv pane'a yite,
palyi bangkhuo ta Khazing kha
ama pathuo sa aa," a ta.
12 Cakhutaata, kiema bangkhuo ca Khazing hmielie ma kaw maa ri kaluo aa.
13 Cacuonakawta pakha hne pakha kha a syi kha tli ungsiy, cuorasala na uvnu luopuv lieta a pakhuo riypa hne a pachiyna riypa kha chi li riypata bie a chi pacie tie. 14 Abyipa Zingsuv chunglie ta ina pachang sapa ca, khaapa hmang hing hmuo ama ta tah a pathe lipa aw vyi tapa hingta a cuo, cuorasala pathe vyi tapata a ruepa cuota ca pathe vyi. 15 Nama na ningpa nakawta na uvnu hne na sieta zaw ama palung a pasa kieca, nama ca duena chunglie a hringpa cuo vaciy. Na ningpa nakawta Khrih ta a thiykuopa pakha rana cuo kha se. 16 Cacuonakawta nama ta a pha na tapa kha a chie pata ri riypata pacuo sa kha. 17 Tahematapakieca Khazing pena ca ning hne dang ta cuo vyi. Cuorasala Thlaapa Pathe lieta a dangna, diena hne palungtluona tana a cuo. 18 Cahaa cata Khrih re a hriepa ca Khazing hmielie cuhluo tluo aa tlapa hne cawsaa pathuosa pata a cuo. 19 Cacuonakaw pakha hne pakha malie a sathaw riypa hne diena a chiykhyipa hmang kha hrie a zue ungsiy. 20 Ningbaa kawlieta Khazing re kha para kha ungsiy. Hmang bangkhuo hing hmisi ta kieca a pathe, cuorasala na ningpa nakawta cawsaa hrangpa kha amaa lie kieca hmangphapa cuo vyi. 21 Na uvnu hne na sieta zaw a liena a cuo kieca saa ce a cuo zaw, mingsuv sahmaa dang a cuo zaw, hmang hrangpa a cuo zaw tue riypa cuo vyi. 22 Na zangna kha Khazing hmie lieta a cusa pata chi thluo tie. Iema ta a cuo hmisi ama tapa kawlieta iema hne iema sue a phaw lipa tie ca thluechiypa tana ama cuo. 23 Cuorasala palung luolue pata a awpa tie ca ama ning kieca sue phaw pata ama cuo aa, tahematapakieca zangna ta ama tue li nakawta a cuo. Zangna taata a vaw lipa hmang tuena bangkhuo ca suena tana a cuo.note 14:23 Hluo vie caa-uv chekha lieca 16:25-27* te kha hingpa lie hing a vya pazue.