10
Uvnu hne sieta zaw,note 10:1 Gk Uvnu zaw i palung khingpa hne Khazing'a luo thlaa i chuopa ca iema hing khuo pata ama cuo riypa hingta a cuo. Tehte i khuo khupa ca, Khazing ca ama khingsa raalaa, cuorasala ama khingna zya ca a hmuo lipa khingna tana a cuo. Tahematapakieca, Khazing'a taata a zuvpa adangna kha pachang li pata iema khingna luopuv kha huv yite Khazing adangna luo kha a pipase khing vayi. Khrih ca phungbie a chuona ta cuote caca a zangpa bangkhuo ta adangna ama hmungna riypatana a cuo.
Khuona Ca Cawsaa Bangkhuo Cuota A Cuo
Moses ta phungbie taata a zuvpa adangna hne a patuv pata a capepa ca, "Hingpa hmang zaw hing a tuepa ca hingpa hmang hingta na khuona a hmung aa," a ta. Cuorasala Khazing'a taata a zuvpa adangna ta ca, "Ahungma vuoruo luo a kie aa tapata na palung chunglie kha a ta kha," a ta (a ri khingna ca Khrih kha za cungkhyi riypata tanapa na a cuo). A cuo li kie, "Ahungma a thiy khy luo a cung aa," tapata zaw a ta kha ung (A ri khingna ca Khrih kha thiyna taata kya pyakhyi riypata tanapa na a cuo). Cuorasala tuokhaatama ama ri?
"Khazing bie ca naa thaa liena a aw,
na hmya lie hne na pathiypalung chunglie na a aw," tapata a cuo.
(A ri khingpa ca kiema ta ma phupa Khazing zangna bie tanapa na a cuo). Na pakaa ta Zingsuv ca Abyipa tana a cuo tapata phu cate, na pathiypalung chunglie Khazing na thiyna taata a pathu sa tapata na zang kieca khuo pata na cuo aa. 10 Tahematapakieca pathiypalung ta a zangpa ca duopacupa ta cuote, a pakaa ta a phupa ca khuo pata a cuo. 11 Caapathepa ta, "Ama a zangpa bangkhuo ca nangzaana ang'a vyi," a ta. 12 Tahematapakieca Judah ming hne Krik ming a lala lieta pahlyipalena aw vyi; Abyipa pakha hing ma bangkhuo Byipa ta cuote a kupa bangkhuo cuota a pahyasa patana a cuo. 13 Tahematapakieca, "Abyipa ming a kupa bangkhuo ca khuo pata ama cuo aa," a ta.
14 Cuorasala, ama zang li kieca tuokhaatama a ming ca ama padang the aa? Bie ca ama thyi buo li kie tuokhaatama ama zang the aa? Cakhutaa, bie ca phu pata a cuo li kieca tuokhaatama ama thyi the aa? 15 Lucuotuv tie kha pathliepa ama cuo li kie tuokhaatama bie ca phu pata a cuo the aa? Caapathepa ta, "Thuophaabie a phyatuv tie phyi ca khatluv tama a puvthe?" a ta. 16 Cuorasala ama bangkhuo ta thuophaabie ca cuhluo vayi; tahematapakieca Isaiah ta, "Abyipa ahungma ma thuophaabie phupa ca a zang," a ta. 17 Cacuonakawta zangna ca thyina taata a vaw te, thyina ca Khrih bie thue tana a vaw.
18 Cuorasala ica hiehriy, bie ca thyi vayi ma? A thyi ca ama thyi thluo; tahematapakieca Caapathepa ta,
Ama ueryi ca chuelyi bangkhuo ta a pathuo,
ama bie ca chuelyi kiy te ta a pha.
19 Hiehriyna suokha i tue khing kalie, Israel ming ta pachang va yima? Moses ta palie taa te,
"Niema kha mingphang tling a cuo lipa tie
cunglie hietliena ica pahnyi sa'a yi;
Niema ca a ngaapa mingphang tie'a lie kha
nama hi ica pahaa sa'a yi," a ta.
20 Cakhutaa Isaiah ta riepha ciemuo pata,
"Kama kha naa huv lipa tie ta ina hmung yi;
Naa padang lipa tie kha
i pahmung sa yi," a ta.
21 Cuorasala, Israel kaw lieca, "Ri a ngie lipa tie hne bie i a hmuopa tie kha ningaw ta i buo pazuupa yi ang te i hluo yi," a ta.