3
A chuona taca, uvnu hne sieta zaw,note 3:1 Gk Uvnu zaw Abyipa'a lie kha a law tie ung. I cape ciepa niema'a luo vya cape pakhaa riypa hing a ngiering va ang. Niema cuota namaa bangsuna ta zaw a cuo. Uv tie kha a raaring tie ung, a pha lipa hmang a tuetuv tie kha a raaring tie ung, vangdaw a te riypa kaw a ri byalyapa tie kha a raaring tie ung. Tahematapakieca, Thlaapa ta Khazing a biepa tie, Khrih Zingsuv kha a palesakhyipa tie hne saapa a buchuo lipa tie kiema hingna vangdaw a tepa ta a cuo puv. Cuorasala, kama zaw hing saapa hmang a buchuona kaw ripa kieca, a buchuo riy a hnyipapaa tana i cuo.
Pakhakha ta saapa hmang a buchuo riypa a hnyi kieca, kama na a hluv vie a hnyi ang. Ning cari a tapata vangdaw tepa, Israel cawsaa, Benjamin mingphang, Hebru nungpaa ta sapa Hebru a thliepa; phungbie luota ripa kie Farasi; Judah phung i daakhyi tuv nakawta khrihsaabuv hrisaathieruetuv; phungbie thueta adangna luo kiezawma syi riy a aw lipapaa ta i cuo.
Cuorasala i cuota athungna ta i za ruepa hingpa hmang bangkhuo hing ata hing ca Khrih thueta asungna tana i rue diy tli. Cadyi ca cuo vyi, hmangting zawdya laata a sungnaa viepa i Byipaapa Khrih Zingsuv i pachangnapa thue hingta hmangting bangkhuo kha a sungkaruepa tana i rue. Ama nakawta hmangting zawdya kha i thaw diy, Khrih i cu thena riypata ca khapa zaw khaca hnehnaw haatana i rue. Phungbie taata a vawpa kama adangna kha cuo li pata, Khrih zangna thueta a vawpa adangna, Khazing'a taata a zuvpa zangna lie hruo a bangpa a dangna khana Ama hneta maa pazue thena riypata a cuo. 10 Ama thiyna lie thiy ra pata, a thupakhaanapa cahrana hne a te-angna a hraw pata Khrih pachang kha i khing. 11 Cahaa cata kiedyina thiyna taata pathu pakhaapa i cuo aa.
12 Hingpa hmang hing i hmung tli tana cuo li pata, i tingna luo na i pha tli tana zaw cuo vyi. Cuorasala Khrih Zingsuv ta a huopa ta ina tue tli nakawta capa hmang ca i huopa a cuo khu riypata i ruo nguoluo. 13 I duepa zaw,note 3:13 Gk Uvnu zaw capa hmang ca i huopa ta a cuo tli tapata rue va ang; cuorasala i tuepa hmang suokha ca: hnang luota a awpa hmang kha maw ang te hmie luota a awpa hmang kha pha i zue. 14 Cacuonakawta, Khrih Zingsuv thueta vuoruo taata Khazing kuna lawmuo kha hmung riypata kawtung luo kha i ruo. 15 Kiema, ruena a ky tlipa tie taca cahaapa palungphya kha hnyi ungsiy. Ruena phanghrang ta a hnyipa nama aw kieca Khazing ta capa zaw ca niema'a lie a paluo sa aa. 16 Ata ning te ta ima ziypa phungluo hing ziy thluo ungsiy.
17 Uvnu hne sieta zaw, kama hringzya hing naa mangpuo tie ung. Kiema hrawlie nama hmungpa mangpuo tluo aa tlapa tie haata a hringpa tie kha a mangpuo tie ung. 18 Tahematapakieca, yi hluvpuv ica chang tli pahaayita ata zaw hing mingthliy hneta ica chang pakhaa yi; cawsaa hluvpuv ca Khrih vieluo kha a cariepa tana ama hring. 19 Iema chuona ca rana ta cuote, ama khazing ca ama riy ama vaw khata a cuo; ama rungnaana ca ama nangzaana khata cuote, ama pathiypalung ca chuelyi hmang lie dyi khana ama chi. 20 Cuorasala kiema ca vuoruo ming cuo pate maa khuotuv Abyipa Zingsuv Khrih vuoruo taata a zuv riypa kha a ngietie va puv. 21 Hmangting zawdya kha ama uvna raw luo a vya chi khupa a cahrana ta a thaanepa ma pangpa kha a rungnaapa ama pangpa haakhata malie a thle aa.