3
Duepa zaw, ata i caa hing niema'a luo i vya capepa a yihningnapa caa ta a cuo. Hing i caa suohning chunglie hing a pathepa nama pathiypalung pathu sa riypa khana ica pachang sa pakhaapa yi ta a cuo. A pathepa profet tie ta hluoning ta ama za ripa bie hne Abyipa hne Khuotuv ta lucuotuv tie'a taata a ripa nawbie kha namaa thyi pakhaa riypatana a cuo. Suokhana ta nama pachang riypa ca, ningchuoningpa thueta ca malie a tue hyalyapa tie kha ama saapa khingna ziy pata tuehyalyana hne a vaw'a yite, "I vaw pakhaa'a ne tapa a biekuo ca khaapaliema a aw? Hluoning ma mingchingmingvuo tie ama za thiy taata pathu pata hmangting bangkhuo hing chuelyi sahruo thu ning haa khatana ama aw thluo!" ama ta aa. Ahluo ningta Khazing bie ta vuoruo hing za aw te, chuelyi hing tiy chung taata hne tiy ta sapa a cuopa hne, capa bie cata chuelyi hing tiy ta pasiypa cuote a ra pakha a pachang li hruo amaa cuo karue. Cuorasala capa Khazing bie ngiethie cata ata chuelyi hing myi ta pathe riypata bierina ning hne Khazing siysaa a ri lipa tie parana ning te ta padue cawpa a cuo.
Cuorasala duepa zaw, hingpa suokha hing ca maw kha ung. Khazing cuota ca ning kha hing kung thawkha haata cuote, kung thawkha hing ning kha haata a cuo. Cawsaa chekha ta ama ruepa haata, Abyipa hing a biekuona kawlieta haasaa vyi, cuorasala pakha hmuo ra li pata cawsaa bangkhuo sue a ngiepachiy riypa a khing nakawtana niema'a lie a palung a pasiy pata a cuo. 10 Cuorasala Abyipa ning ca a paruvpa haa khatana a vaw aa. Capa thueta ca vuoruo ca ueryi lesapa hneta li'a te, a chunglie hmangting bangkhuo zaw myi ta para pata ama cuo aa. Chuelyi hne a cunglie a awpa hmangting bangkhuo zaw ama vie diy aa.
11 Hmangting bangkhuo hing cahaa cata para riypa a cuo nakawta a pathepa hne Khazing ciyzaana hring lie hring riypata tuokhaapa cawsaa ma nama cuo a hu? 12 Khazing a vawna'apa ning kha a ngietie li pata huo tie ung. Tahematapakieca vuoruo ca myi ta ruepa cuo'a te a vie aa, a chunglie a awpa hmang zaw kha myi ta a tiy ta palangpa ama cuo aa. 13 Cuorasala, a biekuona haata, kiema ca adangna ta a pahruopa vuoruo thaapa hne alyi thaapa khana ma huo.
14 Cacuonakawta, duepa zaw, niema ca hingpa hmang nama huo ning hing a cawta hmuo sue phawpa nama cuo li riypa hne ama hne diena nama hmung riypata a zue tie ung. 15 Ma Byipaapa palung pasiyna kha khuona haata rue tie ung. Ma duepa Paul ta Khazing ta a pipa singna ta niema'a luo a vya capepa caa lie kha 16 capa kaw cana a caa bangkhuo lie a ripa haakhata a ri. Capa chunglie ca pachang a ruvsapa chekha aw te, pachangna a hnyi lipa hne a palung a diydyapa cawsaa zaw taca a hrangpa Caapathepa lie ama tue tawpa haakhata a siyluo kha a palipahnaa ta papya yite iema rana tuv kha ama chiykhyi. 17 Cacuonakawta, duepa zaw, a raaringna bie ica changlu pahaayita Khazing siysaa a ri lipa tie ta paana luo acaa chiy li riypa yi hne a bangsa pata nama awnapa kha nama pavie li riypata a raaring tie ung. 18 Cahaa cata ma Byipaapa hne khuotuv Zingsuv Khrih vihnyina hne pachangna chunglie kha lethaw tie ung. Rungnaana ca ata hne chuozaa ta ama'a lie aw pari mangsue. Amen.note 3:18 Hluo vie caa-uv lieca Amen* hing aw vyi.