PITER
Piter Caapaphya Suohningna
Piter Caapaphya Suohningna hing hmangting lie a awpa Khrihsaa taapa tie ri riypata paphyapa a cuo. Aa tingcepa ca pacuvtuv a hmuo lipa tie pacuvna thueta a pyapa zyazaa pha lipa a duna riypata a cuo. Cahaapa pacuvna aa hmuo lipa paliena a phacepa ca Khazing hne Zingsuv Khrih pachangna aa hmuopa kha cuote, capa pachangna ca Zingsuv a pachang hmisipa tie hne a bie ripa a thyi tangepa tie ta ama ripa bie thueta pachangna khatana a cuo, a ta. Caa capetuv ta a palung rie thyikhyicepa ca, "Khrih a vaw pakhaa'a va tli," tapata ama pacuvpa hingta a cuo. Zingsuv a vaw pakhaa riypa a haapa hing, Khazing ta cawsaa pakha hmuo ama ra riypa khing li pata, cawsaa bangkhuo ta ama suena amaa ngiepachiy riypa a khing nakawtana a cuo, a ta.
1
1 Khazing changtaapanote 1:1 Gk Sii hne lu-cuotuv a cuopa Simon Piter ta,
Ma Khazing hne Khuotuv Zingsuv Khrih adangna thueta kiema zangna tluv ta a sungnaapa zangna a hmung rapa niema'a luo kha caa maca paphya yi.
2 Khazing hne ima Byipaapa Zingsuv nama pachangna thueta vihnyina hne diena ca nama cunglie a hmang pari mangsue.
3 Ama rungnaana hne phana thueta kiema malie a kutuv kha ma pachangna thueta hringna hne phana cuota maa hupa hmangting bangkhuo kha ama cahrana ta malie a pi tli.
4 A sungnaapa hne ale hringhruopa biekuona malie a pipa thue cata, karuo-awna nakawta hingpa chuelyi lie a awpa rana taata law khu'a ung cate Khazing cuona kha namaa hraw ra khu aa.
5 Cacuonakawta nama zangna lie phana chachiy kha a zue ungla, phana lie kha pachangna chachiy tie ung;
6 pachangna lie kha kiema hne kiema a uv khuna kha chachiy ungla, kiema hne kiema a uv khuna lie kha ang khuna chachiy tie ung;
7 ang khuna lie kha Khazing ciyzaana chachiy ungla, Khazing ciyzaana lie kha uvnu kawpacuona chachiy ungla, uvnu kawpacuona lie kha duena chachiy tie ung.
8 Hingpa cuona hing niema huopa cuo sala niema hrawlie a lethaw kieca, hingpa cuona hingta ma Byipaapa Zingsuv Khrih pachangna chunglie kha thlahnena a hnyi lipa hne a thyi a pathyi lipa ca pacuo sa'a vayi.
9 Hingpa cuona a hnyi lipa ca luongieta te dyi a hmungpa hne mingcuepa cuote, a suena taata pathe sa tlipa a cuopa khahmuo a mawpa a cuo.
10 Cacuonakawta uvnu hne sieta zaw,note 1:10 Gk Uvnu zaw aca kuna yi hne acaa tlawna yi hing pacu sa hryly tie ung, cahaa cata nama tue kieca a pachiy buo'a va ungciy.
11 Cahaa cata niema ca ma Byipaapa hne Khuotuv Zingsuv Khrih chuozaa pena chung luo a ngie riypa kha pahyasa pata pipa nama cuo aa.
12 Cacuonakawta hingpa zaw hing nama pachang ciepa hne niema'a lie a awpa biehmisipa chunglie a cusa pata a aw ciepa a cuo raalaa pata pathyi sa pakhaa icaa ting yi.
13 I pangpa ta i aw chung bangkhuo ca hingpa bie pachang sa pakhaa pari riypa hing a pha tapata i rue.
14 Tahematapakieca ima Byipaapa Zingsuv Khrih ta a siesa pata ina pachang sa pahaata thiyna ta ina pha patang aa tapa kha i pachang.
15 I thiy khu taata hingpa hmang zaw hing namaa thyi pakhaa pari riypata i cuo khu na chung ta i zue aa.
16 Tahematapakieca ima Byipaapa Zingsuv Khrih a cahrana hne aa vawna kaw kha maca pachang sa tiy yi ta singvaasa pata tuechawpa phungpahlaapa hmuo pata maca changpa yi cuo vyi, cuorasala a lesyina kha ming ta a hmungpa tana ma cuo.
17 Tahematapakieca Paa Khazing'a taata pa-uvsathyina hne rungnaana a hmung ningta Lesyi Rungnaapaa'a taata ueryi a zuvpa ca, "Hingpa hing i Duepa i Saacapaa, a cunglie i palung a tlingsapapaa tana a cuo," a ta.
18 Ama hneta tluopathepa lie ma aw ningta vuoruo taata capa ueryi aa zuvpa ca kiema hrahring ta ma thyi.
19 Cacuonakawta profet tie ama ripa a cu viepa bie zaw ma hnyi. Khy kya dyi te nama palung chunglie dyivaa aasiy a kya khena te ta niema ta hingpa bie hing a zingna lieta a khepa myi-ing haata a biepuvsa pata nama rue riypatana a cuo.
20 Caapathepa lie a awpa profet-biephu hing pakha dyi ta ama khingna haata a siyluo ri khu a aw li pakha nama pachang riypata a cuo.
21 Tahematapakieca khaapa profet-biephu hmuota cawsaa khingna taata a vaw vyi, cuorasala Thlaapa Pathe ta a pahrapa tie ta Khazing'a taata bie kha ama ripa tana a cuo.