9
Cakhutaata, iema kha "Biehmisi tana ica chang yi: hingpa lie a daapa chung taahingta chekha hing Khazing pena ca lesyina hnetanote 9:1 Or chunglie aa zuvpa ama hmung hluo li thiy'a va yi," ata yi.
Zingsuv Hminghmie A Thlena
(Mat 17:1-13; Luk 9:28-36)
Ref 9:2-7: 2Pe 1:17-18.Ning caruv khu taata Zingsuv ta Piter, Jeim hne Johan dyi kha a chiy yite a suopa tluo tluokha cung luo kha a kiekhyi yi. Ama ming hmung na lie kha Zingsuv ca a thle te, a caw kha a ruona luo ta a li te aa li, chuelyi lie a awpa ahungtahmuo cahaa cata a ruona te ta pasuv khu'a vayi. Capa lie ca Elijah hne Moses kha zaa luo yite Zingsuv hne bie amaa rue. Piter ta Zingsuv kha, "Saya, hingpa lie awpa hing ma cuota a pha hringhruo, thluodaa suo thung sa'a pate, suokha hing nama cuo, suokha hing Moses cuo hne, suokha hing Elijah cuota a cuo aa," a ta. Ama thlaa a zang hringhruo nakawta Piter ca khaapama i ri tapa kha pachang vyi. Amyi a vya zu te a ningdiy ta iema kha buv yite, ca amyi chung taacata ueryi suokha a zuv te, "Ama hing i Duepa i Saacapaa tana a cuo, a bie a ngie mya ung," a ta. Ama kiecahriy kha ama mang pahraa ca Zingsuv ri li pata ahunghmuo hmung vayi.
Tluocung taata ama za cungpuo pata, Zingsuv ta, Cawsaa Saacapaa thiyna taata a thupakhaa hluo li nama hmungpa hing ahunghmuo chang'a va ungciy, a ta yi. 10 A ri ca amaa ngie, cadyiseca iema'a na iema kha, "Thiyna taata thupakhaana," tapa ca khaapama a ri khingna a cuo aa? amaa ta. 11 Cakhutaata Zingsuv kha, "Khaapanakawma phungbie saya tie ta Elijah na a zuv taa aa ama ta? tapata ama hiehriy. 12 Zingsuv ta, "Zezaw bangkhuo ting pacie riypata Elijah ca aa zuv taa hmisi. Cadyiseca khaapanakawma Caapathepa ta Cawsaa Saacapaa ca khuopuv ta te-ang'a te ese nutaapa ta ama tue aa ta te a cape? 13 Cuorasala ica chang yi, Caapathepa a ripa haata, Elijah ca a zuv tli te cawsaa ta ama khing thiy ta ama tue mangtli," a ta yi.
Thlaapa Chiepa Ta A Hryipa Haatiypa A Patluo Sa
(Mat 17:14-21; Luk 9:37-43a)
14 Ziytuv hrangpa tie'a luo ama va chiy ca, zaapuv ta za cadung yite phungbie saya chekha hne bie amaa zaa i nguoluo. 15 Cawsaa ta Zingsuv kha ama va hmung pahne ta, ama kharue haasa te a ruo yite bie ama vaa chang. 16 Zingsuv ta, ziytuv tie kha, "Khaapa kaw ma namaa i? a ta yi. 17 Cawsaazaapuv chung taa pakhapapaa ta, "Saya, I saacapaapa ca khuevuo ta a hryi te bie pari sa khu vyi, 18 khuevuo a chunglie a vya pya kyry ta, alyi lie kha vaapatyi te, a pakaa taata abuvcaphawpa pya te a haa dyi rie te a siypakya. Caa ziytuv tie kha khuevuo papya riypata i nue yi, cuorasala papya khu vayi," a ta. 19 Zingsuv ta, "Zangna hnyi hringhruo va ung ca ing? Kha cuo te khiyma niema'a lie hing i aw kalie a hu aa? Kha cuo te khiyma nama nang cawpa ta a chiyle namaa hu kalie aa? a ta yi. Haatiypa kha a vawkhyi tie ung ta yite, 20 amaa vaw khyi. Khachie ta Zingsuv kha a hmung pahne ta haatiypapaa kha vaapatyi te alyi lie a lie te aa pahlangle, a pakaa taata abuv dyi a pya. 21 Zingsuv ta a paa kha, "Hinghaahingta a ta napa hing kha cuo ma a ta tli? a ta. "A cawta baataatana a cuo," tapata a palie. 22 "Cuo hluvpuv ca a thie khing nakawta myi chung luo zaw pazu te tiy chung luo zaw a pathla. Malie naa bya khu kieca malie a bya thi tie," a ta. 23 Zingsuv ta, "Malie naa bya khu kieca na ta ma? Zangna a hnyipa cuota ca zezaw bangkhuo hing a cuo khu diy," a ta. 24 A paa ca sungkha tanote 9:24 Or mingthliy hne khi pathla te, "I zang; i zang linapa kha naa bya tie," a ta. 25 Zingsuv ta iema'a luo zaapuv a maa vya ruolepa kha hmung te, a pyalyipa thlaapa kha, "Nama khachie, haatiypa bie a pari sa the lipa hne naa a parue sapa hingpapaa chung taahingta pya la khatiy ning hmuo a ngie pakhaa kha tie! tapata naw ica pi," a ta. 26 Khachie ca khuopuv ta khi te haatiypapaa kha a siy patyi khu taata a pya. Haatiypapaa ca a thiypa riy haata ta te, cawsaa hluv vie ta, "a thiy tli," ama ta. 27 Cadyiseca Zingsuv ta a buo ta la te, pathu te a kya daa. 28 Zingsuv ca ing chung luo a ngie khu taata, ziytuv tie ta a paruvta tah, "Khaapanakawma khachie hing ma papya khu va? ama ta. 29 Zingsuv ta, "Hingpa phang hing ca thlaachuonanote 9:29 Hluo vie caa-uv lieca thlaachuona hne sa uvna ta * a ta. ta dyina a pya khu," a ta yi.
Zingsuv Ta A Thiyna Hne A Thupakhaana Kaw A Rilu
(Mat 17:22-23; Luk 9:43b-45)
30 Zingsuv hne ziytuv tie ca khapa hmang taa kha pya yite Galilee cahrawpaa pata ama si. Capa kaw ca Zingsuv ta ahunghmuo pachang sa khing vayi. 31 Ziytuv tie kha, "Cawsaa Saacapaa hing cawsaa kuv cung luo lyi pata cuo'a te iema ta ama thie aa, ama thie khu taata ningthung a tapata a thupakhaa aa," tapata a pacuv yi. 32 Cuorasala khaapama a ri khing tapa kha pachang vayi, hiehriy riypa zaw kha a nguo vayi.
Ahungma A Lece
(Mat 18:1-5; Luk 9:46-48)
33 Kapernaum khy luo kha pha yite ing chunglie a aw ning kha Zingsuv ta ziytuv tie kyihuo kha, "Luopuv lie kha khaapama namaa vya ile khya? a ta yi. 34 Cuorasala palie nguo vayi, tahematapakieca, luopuv lie kha, 'ahungma a lece,' tapa kha amaa vya ile. 35 Zingsuv ca a tu te, ziytuv tie kha ku yite, "Ahunghmuota cuose malie hrawlie a lecepa a cuo khingpa ca a cawcepa hne cawsaa bangkhuo sii ta a cuo taa hrahring na a hu," a ta yi. 36 Haatiy pakha kha ku te iema hrawlie a padaa khu taata, cakuv te, 37 "I ming ta hinghaapa haatiy a cuhluopa ca, kama kha ina cuhluo, kama kha naa cuhluopa ca kama dyi cuo li pata kama naa pathlietuv zaw kha a cuhluo ra," a ta yi.
Malie A Carie Lipa Ca Ma Viesaa Tana A Cuo
(Luk 9:49-50)
38 Johan ta, "Saya, na ming ta khuevuo a papyapa pakha hmung pate muo, kiema malie a ziy li nakawta ma thlu ta," a ta. 39 Cuorasala Zingsuv ta, "Thlu ri kha ung, tahematapakieca i ming ta kharuehaa hmang a tuepa taca a nata tah i thuo na pachi'a vyi. 40 Malie a du lipa ca kiema cawsaa tana a cuo. 41 Biehmisi tana ica chang yi, Khrih ming namaa cyi nakawta dang riypa tiy nuokha caa pipa yi ca lawmuo kha hmung li pata aw hrahring'a vayi," a ta.
Pasupaliyna
(Mat 18:6-9; Luk 17:1-2)
42 "Ahunghmuo cuo sala, kama naa zangpa hingpa haatiy zaw pakhakha hmie lieta a pachiyna riypa a chipa ca nama rue lie sacuo rienapa lungtung pathlie pata riyliy luo pathlapa na nama cuota a pha vie aa. 43 Na kuv ta na zangna taata aca papie sa kieca na kuv kha te tie! A thiy buo lipa hellnote 9:43 Gk Gehenna myi chung luo na kuv hrahning hne tlapa laa taca kuv tling li pata hringna luo naa ngiepa a pha vie aa. 44 note 9:44 Hluo vie caa-uv lieca rina tluo 48 hneta aa lupa rina 44 hne 46'a * hingca aw vyi. 45 Na phyi ta na zangna taa aca papie sa kieca, te tie! Phyi hrahning hne hell luo tlapa laa taca phyi tling li pata hringna luo naa ngiepa a pha vie aa. 46 note 9:46 Hluo vie caa-uv lieca rina tluo 48 hneta aa lupa rina 4 hne 46'a * hingca aw vyi 47 Na ming ta na zangna taata aca papie sa kieca cakhyi la thaw tie. Ming hrahning hne hell luo tlapa laa taca ming tling li pata hringna luo naa ngiepa a pha vie aa. 48 Capa hmang lieca ama mathulung thiy buo li'a pata, myi zaw thiy buo'a vyi.
49 Cawsaa bangkhuo ca myi ta paciy haakhata pa-ie sapa ama cuo aa. 50 "Paciy ca a pha; cuorasala a iena kha a vie kieca, tuokhaatama na pa-ie sa pakhaa the aa? "Nama chunglie paciy kha hnyi ungla, pakha hne pakha a re tie ung," a ta yi.