4
Saciy Vaatuv Pakhingpuonabie
(Mat 13:1-9; Luk 8:4-8)
Ref 6:17-18: Luk 3:19-20Zingsuv ta Galilee riyliy kielie kha a pacuv pakhaa yi. A cahriy lie a cadungpa kha ama hluv tuv nakawta sawkawpalaw chung luo kha a ngie te aa tu; zaapuv ca ngiekuo lie kha amaa tu. Pakhingpuonabie hmuo pata hmang hluvpuv kha pacuv yite a ripa ca: "Naathlie tie ung! Cawsaa pakha ca saciy vaa repa ta aa thu. Saciy kha a vaa tiyta, chekha ca luopuv lie kha tla yite pavaa ta amaa haa. Chekha ca lungdaapa, alyi a paana lieta tla te a kya daa paluo. Ning kya chiy te sadaa panu taca a e pahne ta a hruo aa thuv li nakawta acaa diy paluo. Saciy chekha ca ahling hrawlie tla te ahling ta a kalaa nakawta thyipaa hnyi khu vyi. Cuorasala saciy chekha ca lyiphaa lie a tla nakawta kya daa te, le te thyipaa ama hnyi: chekha le sawthung, chekha le sawcaruv, hne chekha ca le zakha te ama vyi," a ta. Zingsuv ta, "Thyina riypa naa a hnyipa ca, thyise," a ta yi.
Pakhingpuonabie Siyluo
(Mat 13:10-17; Luk 8:9-10)
10 Zingsuv ama seta a aw ning kha, ziytuv tie hne a thaa lie a awpa a hrangpa tie khata pakhingpuonabie siyluo kha ama hiehriy. 11 Zingsuv ta, "Khazing Pena bieparuv ca pi pata nama cuo tli, cuorasala ale lie a awpa tie ca pakhingpuonabie dyi ta pacuv pata ama cuo. 12 Ref 6:17-18: Luk 3:19-20Cacuonakawta,
'Ie ma ca ama mang raalaa pata
hmung'a va yi,
naa ama thlie raalaa pata
thyipasie the'a vayi.
Capaca Khazing'a luo kha
amaa vya pali sue li riypa hne
ama suena kha
a ngiethe ama cuo li riypata a cuo," a ta.
Zingsuv Ta Saciy Vaatuv Pakhingpuonabie A Pasie Sa
(Mat 13:18-23; Luk 8:11-15)
13 Zingsuv ta, "Hing pakhingpuonabie hing pachang khu va ung cama? Cacuokie pakhingpuonabie bangkhuo changchiy ca tuokhaatama nama pachang khu aa? 14 Saciy a vaatuv ta a vaapa ca Khazing bie ta a cuo. 15 Cawsaa chekha ca luopuv lieta a tlapa saciy haakhata ama cuo. Bie kha ama thyi tiyta Setaa kha a vaw paluo te ama chunglie saciy kha a lapa yi. 16 Cawsaa chekha ca lungdaapa lie a tlapa saciy haakhata ama cuo. Bie kha ama thyi pahne ta palung tluosa pata ama cuhluo paluo. 17 Cuorasala ama chung luo aa thuvpuv ta hruo a thla li nakawta capa bie kawlieta ruvnaana hne te-angna a aw pahne ta amaa lie paluo. 18 Cawsaa chekha ca ahling hrawlie a tlapa saciy haakhata ama cuo. 19 Bie kha ama thyi, cuorasala chuelyi khysatungbangna kawlie ta palung riethyina, hnyirung khingna, khingna hrang phangphang khata kalaa yite pale sa khu li pata thyipaa hnyi khu vayi. 20 Cawsaa chehrakha ca lyiphaa lie a tlapa saciy haata ama cuo. Bie kha ama thyi, cuhluo yite thyipaa kha le sawthung, le sawcaruv, le zakha te ta ama hnyi.
(Luk 8:16-18)
21 Ref 6:17-18: Luk 3:19-20Zingsuv ta, "Myi-ing kha vya cyi te beke rawlie a cuo li kie iehmang rawlie a chipa ama aw buo ma? Myi-ing vuona tung liena ama chi cuo vama? 22 Ref 6:17-18: Luk 3:19-20Nupa bangkhuo ca paluohuopa cuo'a te, buvkhungpa bangkhuo ca khena lie pahaw pata ama cuo aa. 23 Naa a hnyipa ca thyi tie ung, a ta. 24 Ref 6:17-18: Luk 3:19-20A chang kaliepa yi ca, "Nama thyipa kha a phata tah rue tie ung, malie nama patangpa haakhata patangpa pa nama cuo ra aa, a cha hmuo chachiypa nama cuo kalie aa. 25 Ref 6:17-18: Luk 3:19-20A hnyipa tie kha chachiypa cuo'a yite, khaahmuo a hnyi lipa tie kha ama hnyi ciepa hmuo chuv pata ama cuo aa," a ta yi.
A Lethawpa Saciy Pakhingpuonabie
26 Zingsuv ta a ri kaliepa ca, "Khazing pena ca cawsaa pakha ta a lu lie saciy a vaapa hne tana aa lu. 27 Zuo ta a zie te a kya thu, saciy ca kya pu te a le, tuokhaatama a le tapa kha pachang vyi. 28 Chuelyi ta amata tah sahang kha a papya, hmietaace ta a hnaa panuta kha pakiy te, cakhutaata a paa kya paa te sa-uv a hnyi. 29 Ref 6:17-18: Luk 3:19-20Sa hrie aa de tiyta, a hrietuvpapaa ta tuokyi kha a la te a uo.
(Mat 13:31-32, 34; Luk 13:18-19)
30 Zingsuv ta a ri kaliepa ca, "Khazing pena hing khaapa hne tama ma ri pakhing'a ung? A cuo li kie khaapa pakhingpuonabie hmuo'a pate ma ma ri aa? 31 Vuoruo pena ca uotuo ciy hne tana aa lu. Ama vaa ningta ca alyi lie saciy cawcepa ta a cuo. 32 Ama vaa ca, kya le te uohnaasiyhnaa kung hrawlie a lece pata a cuo. A ce lesapa paka te pavaa zaw kha a ningdiy lieta buv amaa tue khu.
33 Zingsuv ta cahaapa pakhing-puonabie a hluvsa kha hmuo te ama thyi the riypata iema'a lie kha bie a ri. 34 Pakhingpuonabie hmuo li pata iema'a lie kha bie ri vyi, cuorasala ziytuv tie hne iema seta ama aw ning kha hmang bangkhuo kha a siesa pata a chang yi.
Zingsuv Ta Thliychie A Padie Sa
(Mat 8:23-27; Luk 8:22-25)
35 Capa ning zuoluo cata Zingsuv ta ziytuv tie kha, "Riyliy huesuo luo hue vaa ungpuv," a ta yi. 36 Ziytuv tie ca cawsaazaapuv kha thuse yite Zingsuv kha a tu pacienapa sawkawpalaw khata ama sikhyi. Sawkawpalaw hrangpa zaw kha a aw ra. 37 Thliychie khuopuv ta a hruo te tiylaw ta sawkawpalaw kha chi te vuotaa a tla'a nang. 38 Zingsuv ca sawkawpalaw hnang luo kuo ta thude cunglie kha aa zie. Ziytuv tie ta pathu yite, "Saya, vuotaa ma thiy'a nang pahing siysaa malie ri va cama? ama ta. 39 Zingsuv ta thu te thliychie kha, "Ahruo kha tie" ta te a chuo, tiylaw zaw kha, "Die!" a ta. Thliy ca die te riyliy ca nesiyliy khata a aw. 40 Zingsuv ta ziytuv tie kha, "Khaapanakawma nama ciy? Ata te pata zangna hnyi va ung cama? a ta yi. 41 Cuorasala iema ca ama ciypuo ama nang-uopuo pata pakha hne pakha kha, "Hingpapaa hing tuokhaapa cawsaa tama a cuo? Thliychie hne tiylaw hmuona a ri a ngie de yi! amaa ta.