3
A kuv A Pakyapapaa
(Mat 12:9-14; Luk 6:6-11)
Zingsuv ca apungna-ing luo kha a ngie pakhaa te capalie ca a kuv a pakyapapaa kha a za aw. Zingsuv kha ama pachie khing nakawta Sabbath ning ta hing a vya patluo sa ma vya patluo sa vama tapa kha ama mangkhuo. Zingsuv ta cawsaapapaa kha, "Hmie luo hing vya pya," a ta. Cakhutaata cawsaazaapuv kha, "Ma phungbie ta Sabbath ning hing hmangphapa tue riypa ma malie a pa-aw ruvnaana pi riypa ma? Hringna khuo riypa ma thie riypa? a ta yi. Cuorasala khaahmuo palie vayi. A hihaasa pata mang yite, ama palung lena zya kha a hmung tiy yi ta a ngie a chi. Cawsaapapaa kyihuo khata, "Na kuv kha vya pazuo," a ta. Vya pazuo te a kuv ca a tluo. Cacuonakawta Farasi tie ca apungna-ing taakhata pya yite Herod cawsaa zaw hne khata Zingsuv para riypa kha khue ama khuo.
Riyliy Kie Lie A Pacuv Yi
Zingsuv hne ziytuv tie ca riyliy luo kha vaa yite cawsaa hluvpuv ta ama ziy. A hmang tuepa thuohlaa kha ama thyi nakawta Judea ruo, Jerusalem khy, Idumea pe, Jordan huesuo ruo, Tair hne Sidon khypuv cahriy, taata cawsaa hluvpuv ama'a luo kha amaa vaw. Ref 6:17-18: Luk 3:19-20Cawsaa ama hluv hringhruo nakawta naa vya nuosue khu'a kie yi tapata Zingsuv ta ziytuv tie kha sawkawpalaw suokha na pachiepa pacie tie ung, a ta yi. 10 Cawsaa hluvpuv patluo sa yite a pasapa bangkhuo ta ama kha taw riypata a nuo ta amaa nuosue. 11 A pyalyipa thlaapa aa hryipa tie ta ama kha ama hmung pahne ta a hmie lie kha a bu yite, "Nama ca Khazing Saacapaa tana na cuo," ta yite khuopuv ta ama khi. 12 Zingsuv ta ahungma a cuo tapa kha ahunghmuo pachang sa li riypata a cusa pata bie a taa yi.
Zingsuv Ta Ziytuv Hlyihning Aa Tlaw
(Mat 10:1-4; Luk 6:12-16)
13 Cakhutaata Zingsuv ca tluocung luo kha kie te a ku khingpa tie kha ama'a luo a ku yi. 14 Ama ta lucuotuv tapata ming a dipa hlyihning tie kha ama'a lie aw riypa, phung ri riypa hne 15 khachie papya khuna naw zaw hnyi riypata a tlaw yite re a pi yi. 16 Aa tlawpa hlyihning tie ca: Simon (Zingsuv ta Piter tapata ming a dipa); 17 Zebedi saacapaapa tie Jeim hne a nuta Johan (Zingsuv ta Boanerges tapata ming di yite, a siyluo ca Paci saa zaw tana pata a cuo); 18 Andru, Filip, Bartholomew, Matthai, Thomas, Alfeas saacapaapa Jeim, Thaddaius, phang a cuotuv Simon hne 19 Zingsuv a lyituv Judas Iskariot ta ama cuo.
Zingsuv Hne Beelzebul
(Mat 12:22-32; Luk 11:14-23; 12:10)
20 Cakhutaata Zingsuv ca ing luo kha aa diy. Cawsaa ta amaa vya hmyasue pakhaa nakawta Zingsuv hne ziytuv tie ca sa hmuo ning the vayi. 21 Cawsaa ta, "A ngaa tli ne," ama tapa zaw kha a chungkhue tie ta thyi yite ama kha thlu riypata ama vaa. 22 Ref 6:17-18: Luk 3:19-20Jerusalem taata a zuvpa phungbie saya tie ta, "Beelzebul na a hryi, capa khachie byipa ming catana khuevuo tie a papya yi," ama ta. 23 Cacuonakaw Zingsuv ta iema ca ku yite pakhingpuona ta a chang yi. "Tuokhaatama Setaa ta Setaa ca a papya khu aa? 24 Ruo ruokha ca a phuvphuv ta a che te iema'a na iema kha amaa du kieca capa ruo ca a daa khu'a vyi. 25 Ingchungkhue khuekha zaw a phuvphuv ta a che te iema'a na iema kha amaa du kieca a daa khu'a vyi. 26 Cacuonakawta Setaa pena ca a phuvphuv ta aa che kieca a hmang khu'a vyi, ra'a te a vie aa. 27 Cuorasala cawsaa thaaruvpapaa kha a kuv a phyi ciy taa li pata ahunghmuo a ingchung luo a ngie pata a chechiy kha la nguo'a vayi, ama ciy taa kiedyi na ama chuv nguo aa," a ta.
28 "Biehmisi tana ica chang yi: Cawsaa hing ama suena hne Khazing a duna bie pha lipa ama ripa bangkhuo kha a ngiethe khu ama cuo aa. 29 Ref 6:17-18: Luk 3:19-20Cuorasala Thlaapa Pathe a du pata bie pha lipa a ripa ca a ngiethe khupa cuo'a vayi; tahematapakieca chuozaa a hmangpa suena na ama tue," a ta. 30 "Thlaapa chiepa na a hryi," ama ta nakawta Zingsuv ta hinghaahingta a tapa yi ta a cuo.
Zingsuv Nung Hne A Uvnu Zaw
(Mat 12:46-50; Luk 8:19-21)
31 Cakhutaacata a nung hne a nuta zaw kha a vaw yite, ingle lie ta a daa yite cawsaa kha ama paku sa. 32 Zingsuv ca cawsaazaapuv khata cadung yite, "Na nung hne na nuta hne na sietanote 3:32 Hluo vie caa-uv lieca na sieta * tapa hing aw vyi. zaw ta caa taw khing yite ale liena aca huo yi," ama ta. 33 Zingsuv ta, "I nung hne i nuta zaw ca ahungkhama a cuo yi?" a ta. 34 A thaalie a tucadungpa tie kha mang yite, "I nung hne i nuta zaw ca lie hing ama aw hing! 35 Khazing khingna a tuepa tie ca i nuta, i sieta, hne i nung tana ama cuo," a ta yi.