15
(Mat 27:1-2, 11-14; Luk 23:1-5; Jhn 18:28-38)
1 Mawdiychie ta tluobyilepa tie ca uvthyi tie, phungbie saya tie hne uvtuv byi tie palang kha a catlisa pata a taw yite khue ama khuo. Zingsuv ca cakhiy yite a dale yite Pilat kuv luo kha ama pi.
2 Pilat ta, "Judah ming siepahruo ta na cuo ma?" a ta. Zingsuv ta, "Na ripa haata i cuo," a ta.
3 Tluobyilepa tie ta Zingsuv kha sue a hluvsa ama phaw.
4 Pilat ta, "Palie riypa hnyi va cama? Khatluv tama sue aca phaw yi tapa hing mang tie," a ta pakhaa.
5 Zingsuv ta khaahmuo ri ngiethie va laa te Pilat ca a nang ta a uo.
(Mat 27:15-26; Luk 23:13-25; Jhn 18:39—19:16)
6 Lawsena pyi kyry ta Pilat ta thaw a tlapa tie chung taata zaapuv ta ama hiepa pakha kha a pathliepa taw yi.
7 Capa cuo ning ca Barabbas ama tapa, rie thu ningta cawsaa zaa thiepapaa ca rie a thu rapa a hrangpa tie hne khata thaw ama tla.
8 Cacuonakawta cawsaazaapuv ca a vya hmya yite Pilat kha iema cuota a tue tawpa haata tue riypata amaa hie.
9 Pilat ta, "Judah siepahruopa hing ca pathliepa yi ang sala nama khing'a ma? a ta yi.
10 Tluobyilepa tie ta a kuv chung luo Zingsuv ama vya pipa hing i-aw ama hnyi nakawtana a cuo tapa kha Pilat ta a phasa pata a pachang.
11 Cuorasala tluobyilepa tie khata cawsaazaapuv kha Barabbas papya hriy riypata Pilat luo hie riypa kha ama pasu.
12 Pilat ta cawsaazaapuv kha, "Cacuokie Judah siepahruopa nama tapapaa hing tuokhaata tue se tapa ma ina khing ungciy? a ta.
13 Iema ta, "Vieluo lie thie tie!" tapata khuopuv ta ama khi.
14 Pilat ta, "Khaapanakawma? Khaapa suena ma a tue? a ta yi. Cuorasala, "Vieluo lie thie tie!" ta yite khuo vie ta ama khi.
15 Pilat ta cawsaazaapuv palung kha a patling khing nakawta Barabbas kha a pathliepa yi. Zingsuv ca sungpe ta a chi khu taata vieluo lie thie riypata a pi yi.
(Mat 27:27-31; Jhn 19:2-3)
16 Rieka tie ta Zingsuv ca muokiy byipa ahmie luo kha a ngiekhyi yite ama rieka phuv viesaa bangkhuo kha ama u ra.
17 Zingsuv ca pangsepa kha pabuv yite ahling ta lakhuv kha phie yite a luv lie ama pakhuv.
18 Saluo pi yite, "Judah siepahruopa na chuo syi mangsue!" ama ta.
19 Asung ta a luv lie kha chi yite, ama paciy ta ama pacha, a hmiekunglie ama pakhuv pane yite amaa bie.
20 Ama tue hyalya khu taata a pang sepa kha hlepa yite ama a caw kha ama pahryi pakhaa. Cakhutaata vieluo lie thie riypata ama sikhyi.
(Mat 27:32-44; Luk 23:26-43; Jhn 19:17-27)
21 Khyta taata khypuv luo a vaw te amaa thaa lie a vya cakuolepa, Sairin khy ming, Alekzandar hne Rufas paa, Simon kha hruohra pata hripuo yite Zingsuv vieluo ca ama papuv sa.
22 Zingsuv ca Golgotha ama tapa hmang luo kha ama phakhyi (Golgotha a siyluo ca luvruv hmang tanapa tana a cuo).
23 Capa hmang lieca mura hne ama pyapa mingsuv tiy kha pi yite dang khing vyi.
24 Cakhutaata ama ca vieluo lie kha thie yite, a caw kha vyisung a da yite amaa re.Ref 15:24 Ps 22:18
25 Vieluo lie ama thiena cuo ca maw siymaluo pacaky cuo lieta a cuo.
26 Ama sue ama phawnapa caa ca, "Judah Siepahruo," ta tah a cuo.
27 Damie tie pahning kha Zingsuv cacuo luota pakha, a cavyi luota pakha vieluo lie ama taa ra.
28 note 15:28 Hluo vie caa-uv lieca rina 8 * hing a bechiy. (Cahaa cata Caapathepa ta, "A suepa zaw hrawlie ripuopa ta a cuo," a tapa ca a tling.)Ref 15:28 Is 53:12
29 Luo lie a vya cakuolepa tie ta ama pahnyisue, ama luv chysue yite, "Biena-ing kha pacing diy pata ningthung ta palang a tingpapaa,
30 nama hne nama kha a khuo la vieluo cung taa kha za cung tienie!" ama ta.
31 Cahaa cata tluobyilepa tie hne phungbie saya tie zaw ta Zingsuv kha pahnyisue yite, "Malie dyi khuo yite, ama hne ama ca a khuo khu vyi.
32 Israel ming siepahruo Messiahnote 15:32 Or Khrih ca ata hing ta vieluo cung taata za cung sala muo, hmung'a pate ma zang'a ta, amaa ta. Vieluo lie ama taa rapa pahning tie zaw khata ama pahnyisue ra.
(Mat 27:45-56; Luk 23:44-49; Jhn 19:28-30)
33 Ningchungkhingkhuo taata zuoluo siymaluo pathung te alyicung kaakaapa ta zingna a tlung.
34 Zuoluo siymaluo pathung lie kha Zingsuv ca, "Eloi, Eloi, lema sabakthani? ta te khuopuv ta a khi, a siyluo ca, "I Khazing, I Khazing, khaapanakawma ina thaw ciy," tanata a cuo.Ref 15:34 Ps 22:1
35 A thaa lie a daapa chekha ta thyi yite, "Naathlie tie ung, Elijah na a u," ama ta.
36 Cawsaa pakhapapaa ca a ruothaw te pangcaw kha mingsuv tiy thuepa lie a naw khutaa, aarasung daw lie kha ciypuo te Zingsuv hmya lie kha a kya tuv. "Huo pachiy ung, ama kha vieluo cung taata pachung riypata Elijah ca a za cung ma tapa kha mang pachiy'a ungpuv," a ta.
37 Zingsuv ca khuopuv ta khi te a huv a ci.
38 Biena-ing chunglie ama pangzu ca a luv taata a lie te chehning ta aa che.Ref 15:38 Ex 26:31-33
39 A hmiepachaw pata a daapa riebyipapaa ta Zingsuv a thiyna zya kha a hmung tiyta, "Ama paa hing Khazing Saacapaa hmisi tana a cuo," a ta.
40 Capa lieca luohlaa taata a suopa canung chekha zaw ama aw. Iema hrawlie ca Mary Magdalin, Jeim a syi viepa hne Joses ama nung Mary hne Salome zaw ama aw ra.Ref 15:40-41: Luk 8:2-3
41 Zingsuv Galilee lie a aw ning kha za ziy yite zaa mangsang tawpa ama cuo. Jerusalem taata a khawpa a hrangpa canung a hluvpuv zaw capa lieca ama aw ra.
(Mat 27:57-61; Luk 23:50-56; Jhn 19:38-42)
42 Sabbath hluo ta ningkhanapa, a tingdawna ning zuoluo a vya chiy tiyta,
43 bierituv uvthyi zaw hrawlie ta ama pa-uvsathyipa pakha, Khazing penapa a za tlung riypa a huo nguoluo papaa, Arimathea khypa Josef ca riephasa pata Pilat kha a ngie chiy te Zingsuv riy kha a hie.
44 Pilat ca Zingsuv a thiy tli tapa kha a thyi tiyta khuopuv ta a kharue haa te, riebyipa kha u te a thiyna taata a syi tli ma tapata a hiehriy.
45 Riebyipa'a taata a thiy tli tapa bie a thyi khu taata Josef ca a riy kha a pi.
46 Josef ta pawruo pang zungkha calyi te a riy kha pachung te a pahlaw khu taata alung ama ryipa thluo chunglie kha a paby. Cakhutaata lungkhaakhuv ta thluokhuepakaa ca a khaa siy pakhaa.
47 Mary Magdalin hne Joses nung Mary ta khaapalie ma ama paby tapa kha ama hmung.