14
(Mat 26:1-5; Luk 22:1-2; Jhn 11:45-53)
1 Hingpa hing Lawsena pyi hne Thiynung phuv lipa Viechuo pyi hluo ta ninghningna lie khata a cuo. Tluobyi lepa tie hne phungbie saya tie ta Zingsuv kha a paruvta tah patuv riypa hne thie riypata khue ama khuo.Ref 14:1 Ex 12:1-27
2 "Pyi chung hingta ca tue'a va ungpuv, cawsaa zaw na hnaa a pahnaw sue'a yi," ama ta.
(Mat 26:6-13; Jhn 12:1-8)
3 Zingsuv ca Bethani khypa Simon, caahminghmaanote 14:3 Caahminghmaa tapa biesuo hing pasana phangphang * tana zaw a cuo khu. ta a pasapapaa ing lie a aw ning kha canungnung pakha a vaw te alabaster ungthyi zungkha ta a muo ruv ciemuopa ziyhmyi kha vya cyi te capa ungthyi ca a tuvchi khu taata ziyhmyi kha Zingsuv luv lie a bya.Ref 14:3 Luk 7:37-38
4 Capa lie a awpa cawsaa chekha ta hihaasa pata pakha hne pakha kha, "Capa ziyhmyi puohrie ryarya ca!
5 Denariinote 14:5 Denarii suokha * hing kuliy re hrietuv ning kha thavie hneta aa khing. zathung laata a hluv vie ta zaa khu riypa puv! Zaa sala a siypasapa tie kha bya yi sala pha vie vama?" ta yite cawsaanung kha khuopuv ta ama mawchie.
6 Cuorasala Zingsuv ta, "Amata tah aw se! Khaapanakawma nama pataw nama pahrie? Kama cuota a phasapa hne a puvthesapa re na a hrie.
7 Siypasa tie ca nama aw hne pari aa, namaa bya khing ning namaa bya khu pari aa, cuorasala kama ca cipari ta na aw hne'a va ungciy.Ref 14:7 Deut 15:11
8 Hingpa nung hingta a tue khupa kha a tue mangtli; paby na cuo a pha hluo ta i pangpa kha ziyhmyi bya te a tingtuo mangtli.
9 Zingsuv ta, "Biehmisi tana ica chang yi: chuelyi khy ting Thuophaabie ama changnapa bangkhuo lie hingpa nung a tuepa hmang hing ama maw lina pata ama rile pari aa," a ta.
(Mat 26:14-16; Luk 22:3-6)
10 Ziytuv hlyihning lie pakha a cuopa Judas Iskariot ca Zingsuv lyi riypata tluobyilepa tie'a luo kha a vaa.
11 A ripa kha ama thyi pahne ta ama palung tluosa te tuokaa pi riypata bie ama kuo. Cacuonakawta Zingsuv lyi riypata aa raw cepa cuo kha a bya.
(Mat 26:17-25; Luk 22:7-14, 21-23; Jhn13:21-30)
12 Thiynung phuv lipa Viechuo pyi a ning kha ning, Lawsena pyi saduona cuota tuvtaata ama thie ning kha, ziytuv tie ta Zingsuv kha, "Lawsena pyi saduonapa cuota khaapa lie va tingtuo yi se tapa ma malie na khing? ama ta.
13 Cacuonakawta Zingsuv ta ziytuv tie pahning kha pathlie yite hinghaahingta bie a cuung yi: "Khypuv chung luo kha vaa ungla bi ta tiy a vya phyalepapaa kha namaa taw aa.
14 Capapaa ca paziyle ungla a vaa ngienapa ing a hnyituvpapaa kha, "Saya na, khaapa khuo hingma naa ziytuv tie hneta Lawsena pyi sa ma ningna riypata a cuo? a ta, va ta tie ung," a ta yi.
15 Ama ta a cung duo ingkhuo kusapa, chechiy tlingsa pata ama pachie ciepa khuo kha aca pahmung'a yi. Capa lieca zuosa dungpakhawnapa ca va pachie tie ung," a ta yi.
16 Cacuonakawta ziytuv tie ca khypuv chung luo kha vaa yite, Zingsuv ta a changpa dadang haakhata va hmung yite, capa lieca Lawsena pyi zuosa kha ama pachie.
17 Zuoluo ca ziytuv tie hne khata Zingsuv ca amaa vaw.
18 Cabya lie a tu yite sa ama ning nguoluo ning kha, Zingsuv ta, "Biehmisi tana ica chang yi, niema hrawlie pakha, kama hne sa a ning hnepa ta ina lyi'a ungciy," a ta yi.Ref 14:18 Ps 41:9
19 Ziytuv tie ca ama ngie chi te pakha hnang pakha ta ama kha, "Kama taca cuo va ang nuo?" ta yite ama hie hriy.
20 Zingsuv ta, "Niema hlyihning hrawlie ta pakha, kama hne lapakhue khuekha a caphaw hnepa tana a cuo.
21 Cawsaa Saacapaa ca Caapathepa lie a ripa haata a thiy aa; cuorasala Cawsaa Saacapaa a lyituvpapaa ca khatluv ta aping a suvpa ma a cuo aa! Puv li pata aw hriy sala a cuota a pha vie aa! a ta.
(Mat 26:26-30; Luk 22:14-20; 1 Kor. 11:23-25)
22 Sa ama ning nguoluo ning kha Zingsuv ta viechuo tluokha kha la te thlaa chuo te alawna bie a hluo khu taata, chechi te a ziytuv tie kha a pi yi. "Ning tie ung," "I pangpa tana a cuo" a ta yi.
23 Cakhutaata panuo zaw kha la te, Khazing'a luo kha alawna bie a hluo khu taata iema kha pi yite ama palang ta ama dang.
24 Ama ta, "Hingpa hing biekuonanote 14:24 Hluo vie caa-uv lieca biekuona thaapa * a ta. thiyse, cawsaa zaapuv cuota i lyipa i thiy tana a cuo.Ref 14:24 Ex 24:8; Jer 31:31-34
25 Biehmisi tana ica chang yi: Khazing Pena chunglie mingsuv thaapa i dang hluo li hing mingsuv hing dang pakhaa'a va tli ang," a ta.
(Mat 26:31-35; Luk 22:31-34; Jhn 13:36-38)
26 Hlaa ama sapuo pata Oliv tluocung luo kha ama kie.
27 Capa lieca Zingsuv ta, "Nama bangkhuo hingta inaa ruose diy'a ungciy, tahematapakieca Caapathepa chunglie,
'Tuvkhietuv kha tuvsa'a ang te
tuv zaw ca chepatlaa pata ama cuo aa,'Ref 14:27 Zech 13:7 a ta.
28 Cuorasala pathu pakhaapa i cuo khu taata nama hmie luo khata Galilee luo i si aa,' a ta.Ref 14:28 Mat 28:16
29 Piter ta, "Iema bangkhuo acaa ruose zaw yi ta kama ca caa ruose buo hluo'a va ang," a ta.
30 Zingsuv ta Piter kha, "Biehmisi tana ica chang: Ata ning, ata zuo hrahring, aa yi hning a khang hluo ta, yi thung te, ina thaw'a ciy," a ta.
31 Cuorasala Piter ta a cusa pata a ripa ca, "Nama hne thiy riypa hmuo cuose angla ca thaw'a va ang a ta. Ama bangkhuo ta cahaa cata ama ta ra.
(Mat 26:36-46; Luk 22:39-46)
32 Gethsemane ama tapa hmang luo kha a vaw yite Zingsuv ta, "Thlaa i chuo chung hinglie hing zaa tu tie ung," a ta yi.
33 Piter, Jeim hne Johan kha a chiyle yi. Nangping vuosuona hneta bi te,
34 iema kha, "I palung riethyi tuv napa ta i thiy tyalya, lie hing za aw ungla zaa hmung khya ung, a ta yi.
35 A cawta va cakuo vie te alyi lie kha a bu te, a cuo khu kieca ruvnaanapa cuo chung taata a law khuna riypata thlaa a chuo.
36 "Abbanote 14:36 Aramaic ryi ta Paa * tana a cuo., I paa! Na cuota ca khaapa bangkhuo a cuo khu diy. Hing panuo hing kama'a taata la tie; cuorasala kama khingna haata cuo li pata nama khingna haata cuo thluo se," a ta.
37 Vya kaa te amaa zaa hmungpa kha a hmung yi ca; Piter kyihuo khata, "Simon naa hmung ma? Siymaluo pakha chuo a hra khu va cama?
38 "A hra ungla, pasupaliyna chung luo nama tla li riypata thlaa chuo tie ung. Pathiypalung ta a khing raalaa zaw ta saapa na a thaa a dyasa," a ta.
39 Zingsuv ca vaa pakhaa te a chuo ciepa haakhata thlaa a chuo pakhaa.
40 Cakhutaata a vya kaa ca ziytuv tie amaa hmung pakha a hmung pakhaa yi; ama ming hehmuo haw khu lipa yi ta tuokhaatama ma chaw aa tapa zaw pachang vayi.
41 A yi thungnapa a vya kaa taata iema kha, "A hmung ung cate ma namaa pahy nguoluo kalie? Ade buo se! A cuo na a tling tli! Mang tie ung, Cawsaa Saacapaa ca a suepa tie kuv chung luo pipa tana a cuo tli.
42 Thu tie ung! cakuo'a ungpuv. Mang tie ung hing, kama naa lyipapaa ca a vya chiy tli hing," a ta.
(Mat 26:47-56; Luk 22:47-53; Jhn 18:3-12)
43 Zingsuv ta bie a ri nguoluo ningta kha ziytuv hlyihning chunglie pakha ta a cuopa Judas kha tlangkhy a vya chiy. Ama hneta tluobyilepa tie, phungbie saya tie hne uvthyi tie'a taata pathliepa, zueziy hne tungbung a cyipa cawsaazaapuv kha ama vya chiy ra.
44 A lyituvpapaa ta zaapuv kha pamangsana pi yite: "I pahnuopapaa hingna nama patuv khingpapaa ta a cuo aa. Patuv ungla a phata tah kingkaa ungla sikhyi tie ung," a ta yi.
45 Cacuonakawta Judas ca a vya chiy tiyta, Zingsuv'a luo kha vaa paluo te, "Saya!" ta te a pahnuo.
46 Zingsuv ca patuv yite ama cakhiy.
47 Cuorasala a thaalie a daapa tie chung taa pakha ta a zueziy kha a phie te tluobyi lepa sii kha aa ce ca, a naacakue kha a sa pathla.
48 Zingsuv ta iema kha, "Zueziy hne tungbung a vya cyi ung cate ma kama ca damie haata patuv riypata namaa vaw?
49 A ning tating ta biena-ing lie ca pacuv yi ang te niema hne i aw pata na patuv va ungciy. Cuorasala Caapathepa bie ca tling thluo se," a ta yi.Ref 14:49 Luk 19:47, 21:37
50 Ziytuv tie bangkhuo ca Zingsuv kha thuse yite amaa ruo.
51 Satlie pakha, pawruo pangta dyi a buvpapaa khata Zingsuv ca dya a ziyle.
52 Ama kha patuv amaa nang nakawta a pang kha thuse te a cahri pata a ruo.
(Mat 26:57-68; Luk 22:54-55; 63-71; Jhn 18:13-14, 19-24)
53 Zingsuv ca tluobyilecepa ing luo kha a chiy yite capa lie ca tluobyilepa bangkhuo, uvthyi tie hne phungbie saya tie ca amaa zaa hmya.
54 Piter ca aa hlapuv taakhata dya ziyle yite tluobyilecepa ahmie luo kha a ngie ra. Rieka tie'a lie kha a tu te myi a e ra.
55 Tluobyilepa tie hne uvtuv byi tie bangkhuo ta Zingsuv kha thie khu riypata a suenapa kha hmung amaa zue, cuorasala suokha hmuo hmung khu vayi.
56 Tehte hluvpuv ta Zingsuv kawlie kha hangbie ama ri, cuorasala ama bie kha a saw vyi.
57 Cawsaa chekha a vya daa yite ama a du pata hangbie ama ri.
58 "Cawsaa kuv ta sapa hing Biena-ing hing pacing diy'a ang te ningthung chung ta cawsaa kuv ta sa lipa biena-ing i sa pakhaa aa, a tapa na ma thyi," ama ta.Ref 14:58 Jhn 2:19
59 Cuorasala capa lie ca hmuo ama bie a saw ngiethie vyi.
60 Cakhutaata tluobyilecepa ta iema hmie lie kha a daa te Zingsuv kha bie a hiehriy. "Palie riypa hnyi va cama? Sue aca phawpa yi ca tuokhaata?" a ta.
61 Cuorasala Zingsuv ca a dieta tah aw te palie vyi. Tluobyilecepa cata bie ca hiehriy pakhaa te, "Thluechiypa Khazing Saacapaa Messiahnote 14:61 Or Khrih cata na cuo ma? a ta.
62 Zingsuv ta, "I cuo,
'Cawsaa Saacapaa ca Cahrana cacuo luo kuo ta
a tupa kha hmung'a ung cate,'
vuoruo amyi hneta aa zuvpa kha
nama hmung aa," a ta yi.Ref 14:62 Dan 7:13
63 Tluobyilecepa ta a pang kha thlaa te, "Pachangkhyituv hrangpa a hu va tli puv!
64 Khazing a duna bie a ripa ca nama thyi. Tuokhaatama nama rue? a ta yi. Iema bangkhuo ta ama ca thiy tluo aa tla tapata sue ama phawRef 14:64 Lev 24:16
65 Iema chunglie chekha ta Zingsuv kha ama paciy ta ama pacha, a ming kha pahruv yite ama tuv. "Ahungma caa tuv, ri pachiy tie," ama ta. Rievetuv tie zaw ta sikhyi yite ama tuv puole.
(Mat 26:69-75; Luk 22:56-62; Jhn 18:15-18, 25-27)
66 Piter ca ahmie lie a aw nguoluopa khata tluobyilecepa changtaapa nung pakha ta a thaa luo kha aa vaw.
67 Piter myi aa e nguoluo pakha a hmung tiyta, ama kha mangpuo te, "Nama zaw hing Nazarethpa Zingsuv hne a zaa aw pakhawpa tana na cuo," a ta.
68 Cuorasala Piter ta a sie te, "Khaapama na ri tapa hing pachang va ang," ta te a hmiedaw luo kha a pya. Cakhupatahne ta aa a khang.
69 Changtaapa nung cata capa lie kha hmung te a thaalie a awpa tie kyihuo khata, "Hingpapaa hing iema chung taata pakha tana a cuo!" a ta pakhaa.
70 Cuorasala Piter ta aa sie pakhaa. A cawta a aw pata a thaa lie a awpa tie ta, "Iema hraw taata pakha tana na cuo hrahring, tahematapakieca Galilee ming tana na cuo," ama ta.
71 Cuorasala chie a sa te bie aa kuo khu taata, "A kaw nama ri nguoluopapaa hing pachang va ang," a ta yi.
72 Cakhupatahne a yi hningnapa aa a khang. Zingsuv ta, "Aa yi hning a khang hluo ta yi thung ina thaw'a ciy," a tapa bie kha Piter ca a thyi pakhaa te khuopuv ta a caa.