11
Zingsuv Rungnaana Hne Jerusalem Luo A Ngie
(Mat 21:1-11; Luk 19:28-40)
1 Zingsuv hne ziytuv tie ca Jerusalem khy va pha tyalya'a nang caw, Bethfeih hne Bethani khy kie Oliv tluo luo kha ama va chiy. Zingsuv ta ziytuv pahning kha pathlielu yite,
2 "Nama hmielie a awpa khy luo kha vaa ungla, namaa ngie pahne ta, amaa khang buo lipa laa taata aa hre thluopa kha nama hmung aa. Va pathluo ungla a vya chiy ung.
3 Pakhakha ta, "Khaapanakawma haakhata na ma tue?" aca ta kie yi ca, "Abyipanote 11:3 Abyipa; a cuo li kie a hnyituvpa na a hu, maca vya pi pakhaa paluo'a yi nama ta aa," a ta yi.
4 Vaa yite thlake a thaa, ale luo luopuv lie laa taata aa hrepa kha ama hmung. A khuhriy ama pathluo nguoluo pata,
5 a kielie a daapa chekha ta, "Khaapa ma na ma tue, laa taata khuhriy ca nama pathluo? ama ta.
6 Zingsuv ta a changpa haa yi khata palie yite, a dale thluo ung, ama ta.
7 Laa taata ca Zingsuv'a luo a vya chiy yite, ama pang kha a ke lie padie yite, Zingsuv ta aa khang.
8 Cawsaa hluvpuv ta ama pang kha luopuv lie phaa yite, chekha ta thingce kha thli yite luopuv lieca ama phaa ra.
9 Hmaa a sapa cuo yi se, a hnang taata a ziypa cuo yi se, khi yite,
Hosanna!
Abyipa ming ta a vawpa ca
Khazing ta thluechiy pi se!Ref 11:9 Ps 118:25-26
10 Mingpa David pena a vaw riypa ca
thluechiy hmung mangsue.
Hosanna!
A suocena vuoruo lie khiy Khazing ca
pathuosa pata cuo mangsue, ama ta.
11 Zingsuv ca Jerusalem luo kha a ngie te, Biena ing luo kha vaa te hmangting khata a va mang diy. Ning a ngie tli nakawta ziytuv hlyihning hne khata Bethani khy luo kha ama kaa.
Zingsuv Ta Thyikuv Kung Chie A Sa
(Mat 21:18-19)
12 A mawluopa, Bethani taata ama vya kaa pata, Zingsuv ca a nang a diy.
13 Luohlaa taata a hnaa rungsapa thyikuv kung kha a hmung ca a thyi suokha chuo hmung'a ang ma tapata vaa te a va mang. A thaa luo a chiy tiyta a hnaa dyi a hmung, tahematapakieca thyikuv a pathyi cuo ta cuo vyi.
14 Thyikuv kung kha "Ahungtahmuo na thyi ca ce pakhaa kha tli yi se," a ta.
Ziytuv tie ta a ripa kha ama thyi.
Zingsuv Ta Biena-ing A Pathe
(Mat 21:12-17; Luk 19:45-48; Jhn 2:13-12)
15 Jerusalem ama va pha taata, Zingsuv ca Biena-ing luo kha a ngie te, chechiy a calyituv tie hne a zaatuv tie kha a cade diy yi. Tuokaa a thlepa tie cabya hne valale a zaapa tie thude zaw kha pali diy te,
16 Biena-ing lie chechiy sikhyi bungthaw li tli riypata a thlu yi.
17 Cawsaa kha pacuv yite a ripa ca "Caapathepa lie hinghaahingtana aa cape cuo vama?
"Kama ing ca mingphang bangkhuo
thlaachuona hmang tana a cuo aa.
Cuorasala niema ta
a paruvpa a chuona hmang ta nama pali," a ta.Ref 11:17 Is 56:7; Jer 7:11
18 Tluobyi lepa tie hne phungbie saya tie ta capa bie ca ama thyi tiyta, Zingsuv thiena riypa luo kha ama huv. Tahematapakieca zaapuv bangkhuo ca a pacuvpa cunglie kha ama kharue a haa diy nakawta Zingsuv kha ama ciy.
19 Zuoluo khyzing'a nang caw ta, Zingsuv hne ziytuv tie ca khypuv chung taata ama pya.
Thyikuv Kung A Thiy
(Mat 21:20-22)
20 A mawluopa mawdiy, luo ama cakuopuo pata thyikuv kung ca a thariy te a caa diy pakha ama hmung.
21 Piter ta khaapama zaa cuo tapa kha aa thyi nakawta Zingsuv kyihuo kha, "Saya, mang tie! chie na sapa thyikuv kung kha a caa diy tli," a ta.
22 Zingsuv ta, "Khazing kha zang tie ung.note 11:22 Hluo vie caa-uv lieca Khazing kha nama zang kieca * a ta
23 Biehmisi tana ica chang yi: ahunghmuo ta cuo khu thlu'a vyi tana aw li pata a ripa hing a cuo hrahring aa tapa zangna hneta hingpa tluo hing, 'Thu la riyliy luo vaa thaw tie,' a ta kieca a ripa kha tuepa pata a cuo aa.Ref 11:23 Mat 17:20; 1 Kor 13:2
24 Caacuonakawta ica chang yi, 'Thlaachuona ta suokhakha na maa hie thueta, i hmung tli tapata nama zang kieca nama hiepa ca pipa nama cuo aa.
25 A daa ung cate thlaa nama chuo tiyta pakhakha cunglie hihaana nama hnyipa kha a ngiethe ungla, vuoruo lie a awpa nama Paa ta nama suena kha acaa ngiethe ra'a yi, a ta.Ref 11:25-26: Mat 6:14-15
26 (Cuorasala malie suena kha namaa ngiethe li kieca vuoruo lie a awpa nama Paa ta niema nama suena zaw kha caa ngiethe ra'a vayi.)note 11:26 Hluo vie caa-uv lieca rina tluo 26 * hing aw vyi.
Zingsuv Naw Hnyina Kaw Kha Ama Hiehriy
27 Jerusalem luo kha ama vya pha pakhaa. Zingsuv Biena-ing chunglie aa khie nguoluo ning kha, tluobyi lepa tie, phungbie saya tie hne uvthyi tie kha a vaw yite,
28 Zingsuv kyihuo kha, "Ahung nawhnyina tama hingpa hmang hing na tue? Ahungma hing hmang tue khuna naw hing caa pi?" ama ta.
29 Zingsuv ta, "Bie suokha ca hiehriy'a yi ang te na palie ungla, ahung nawhnyina tama i tue tapa kha ica chang'a yi," a ta.
30 Johan tiynawna hing vuoruo taata ma aa zuv a cuo li kie cawsaapa'a taata ma?" a ta yi.
31 Iema'a na iema kha a i yite, "Vuoruo taa ne, ta pasala, 'Cacuokie khaapanakawma Johan ca nama zang va,' malie a ta aa.
32 'Cawsaa taata ne,' ma ta kiema, cawsaa kha ciy amaa chiy, tahematapakieca cawsaa mekaa ta Johan ca profet tapa kha ama zang," amaa ta.
33 Cacuonakawta "Pachang va puv," ama ta. Zingsuv ta, "Kama zaw ahung nawhnyina tama hingpa hmang hing i tue tapa kha ca chang raa vayi ang," a ta yi.