10
Nung Hne Vaa A Chena Kaw
(Mat 19:1-12; Luk 16:18)
1 Zingsuv ca capa hmang taacata pya te Judea pe, Jordan cavaa huesuo luo kha a vaa. Cawsaazaapuv ta vya pahlaw pakhaa hyi yite a tue tawpa haakhata a pacuv pakhaa hyi yi.
2 Farasi tie chekha a vaw yite ama dyapasya khing pata, "Ma phungbie hingta napuv ma riypa a pa-aw ma?" ama ta.
3 Zingsuv ta, "Moses ta khaapa nawbie ma aca pi yi?" a ta yi.
4 Ama paliepa ca, "Moses taca, capaa pakha ca a napuv kha manapa caa a pi kieca a ma khu, malie a ta," ama ta.Ref 10:4 Deut 24:1-4; Mat 5:31
5 Cuorasala Zingsuv ta, "Nama palung a cuo tuv nakawna hingpa nawbie hing nama cuota a cape pata a cuo.
6 Cuorasala sahruo thu cuo ning taakhata, 'Khazing ta canung hne capaa a sa yi'.Ref 10:6 Gen 1:27, 5:2
7 'Cacuonakawta capaa ta a paa hne a nung kha thuse'a yite a napuv kha a hlaw aa,Ref 10:7-8: Gen 2:24
8 pahning kha pangkha ta ama cuo aa'. Cacuonakawta iema ca pahning cuo va tli yi pangkha tana ama cuo.
9 Khazing ta a pahlawpa yi ca ahungtahmuo che kha yi se."
10 Cakhutaata ing chunglie kha ziytuv tie ta capa kaw ama hiehriy pakhaa.
11 Zingsuv ta, "A napuv kha ma te canung hrang a hlawpa ca aparuvsuena a tuepa a cuo.Ref 10:11-12: Mat 5:32; 1 Kor 7:10-11
12 Cahaangiethiecata a navaapa kha thuse te capaa hrang a hlawpa ca aparuvsuena a tuepa a cuo," a ta yi.
Zingsuv Ta Haatiy Zaw Thluechiy A Pi Yi
(Mat 19:13-15; Luk 18:15-17)
13 Cawsaa ta haatiy zaw kha a kuv ta taw naa se yi tapata Zingsuv'a luo kha amaa vaw khyi, cuorasala ziytuv tie ta cawsaa kha ama chuo.
14 Cuorasala Zingsuv ta a hmung yi ca a hi haa te, ziytuv tie kyihuo kha, "Haatiy kha kama'a luo a vaw yi se, thlu kha ung, tahematapakieca Khazing pena ca hingpa haatiy zaw haapa cuo hing tana a cuo.
15 Biehmisi tana ica chang yi: ahunghmuo cuose haatiy zaw haahingta Khazing pena a cuhluo lipa ca a chung luo a ngie khu'a va yi," a ta.Ref 10:15 Mat 18:3
16 Cakhutaata haatiy tie kha a paw yite, a kuv kha ama cunglie khang te, thluechiy a pi yi.
A Hnyirungpapaa
(Mat 19:16-30; Luk 18:18-30)
17 Zingsuv khy tlawna luo a tha ning kha cawsaa pakha kha a vya ruo te, a hmiekunglie a pakhuv vya pane te, "A phapa Saya, Chuozaa hringna cu riypata khaapama i tue aa?" a ta.
18 Zingsuv ta, "Khaapanakawma a phapa ina ta ciy? Khazing ta li pata ahunghmuo pha vayi.
19 Nawbie zaw ca na pachang thluo kha: Lie va naw kha; nungvaathingsuena tue kha; paruv kha; a cuo lipa bie lie malie vaa daakhyi kha; cawsaa va dung kha; na nung hne na paa va ciyzaa yi; tapata a cuopa kha," a ta.Ref 10:19 Ex 20:12-16; Deut 5:16-20
20 Capapaa cata, "Saya, hing nawbie bangkhuo hing i cawta baataata i ziy diy ciepa tana a cuo," a ta.
21 Zingsuv ta mang te duena hneta a tapa ca, "Suokha dyina na bu, cakuo la na hnyipa kha zaa la tuokaa kha siypasa tie pi tie yi, vuoruo lie a hnyirungpa na cuo aa, cakhutaata a vaw la kama kha na ziy tie," a ta.
22 Capa bie a thyi tiyta minghmie pha li cangta ngiechisa pata a cakuo, tahematapakieca ama ca a hnyirungsapa ta a cuo.
23 Zingsuv ta ziytuv tie kha mang paky yite," Khazing pena luo a hnyirungpa a ngie riypa hing khatluv tama a ruv aa!" a ta yi.
24 Ziytuv tie ca capa bie kawlie cata ama kharue a haa sa. Cuorasala Zingsuv ta, "I saa zaw, Khazing pena luo a ngie hingnote 10:24 Hluo vie caa-uv lieca hnyirungna dyi a buchuopa zaw cuo taca * tapa a bechiy. khatluv tama a ruv!
25 A hnyirungpa Khazing pena luo a ngiepa laata kala-uv ciphang naakhue luo a ngiepa na a na vie," a ta pakhaa yi.
26 Iema ca ama kharue haa hringhruo te, pakha hne pakha kha, "Cata a cuo kie, ahungma khuona ca a hmung khu aa?" amaa ta.
27 Zingsuv ta mang yite, "Hingpa hing cawsaa cuota ca cuo khu vyi, Khazing cuota ca a cuo khu; Zezaw bangkhuo hing Khazing cuota ca a cuo khu," a ta yi.
28 Piter ta, "Kiema ca zezaw bang-khuo sise pate nama maca ziy tli,' a ta.
29 Zingsuv ta, "Biehmisi tana ica chang yi: Kama hne thuophaabie kawlieta a ing a lu a cuo li kie a uvnu a cuo li kie a sieta a cuo li kie a nung a cuo li kie a paa a cuo li kie a saata a cuo li kie a lu zaw a thusepa ca
30 ata chuo chunglie hrahring hingta uvnu hne sieta, nung hne saata, ing hne lu zaw kha le zakha ta hmung'a te, hrisaathieruena zaw a hmung aa. A vaw riypa chuo lie zaw chuozaa hringna a hmung aa.
31 Cuorasala atalie hmaa a sapa a hluvpuv hing hnang chuo'a yite, atalie hnang a chuopa a hluvpuv hing hmaa ama sa aa," a ta.Ref 10:31 Mat 20:16; Luk 13:30
Zingsuv Ta A Thiyna'apa Kaw A Yithungna A Rilu
(Mat 20:17-19; Luk 18:31-34)
32 Zingsuv hne ziytuv tie ca Jerusalem luo ama si nguoluo ning kha, Zingsuv ca hmaa luo kha a cakuolu. Ziytuv tie ca ama nang ta uo te, a hrangpa ama hnang a paziy lepa tie zaw ama thlaa a zangsa. Zingsuv ta ziytuv hlyihning tie kha a hrang ta ku pakhaa yite a cunglie a tlung riypa kaw kha a chang yi.
33 "Mang tie ung, Jerusalem luo ma sithaw nguoluo ung hing, Cawsaa Saacapaa hing tluobyilepa tie hne phungbie saya tie kuv luo pi pata cuo'a te, iema ta thie riypata bie chi'a yite Jentail ming kuv luo kha ama pi aa.
34 Ama tue hyalya aa, ama paciy ta ama pacha aa, sungpe ta chi'a yite ama thie aa, ningthung khu taata a thupakhaa aa," a ta yi.
Jeim Hne Johan Ta Ama Hiepa
(Mat 20:20-28)
35 Cakhutaata Zebedi saacapaa Jeim hne Johan ta Zingsuv'a luo kha a vaw yite, "Saya, khaapa maacaa hie zaw ta malie na tuepa riypatana maca khing," ama ta.
36 Zingsuv ta, "Khaapa malie tuepa se tapa ma ina khing ungciy?" a ta yi.
37 Iema ta, "Na rungnaana chunglie, na cacuo luota pakha, na cavyi luota pakha a tuna naw malie pi tie," ama ta.
38 Cuorasala Zingsuv ta, "Khaapama ina hie ungciy tapa pachang va ungciy. I dang riypa panuo hing nama dang khu'a ma? A cuo li kie i tiy a naw riypa haahingta namaa naw khu'a ma?" a ta yi.Ref 10:38 Luk 12:50
39 Iema ta, "Ma tue khu thluo aa," ama ta. Zingsuv ta, "I dang riypa panuo hing nama dang khu sasaw thluo aa, tiy i naw riypa zaw hing namaa naw khu sasaw thluo aa.
40 Cuorasala i cacuo hne i cavyi luo a tu riypata pi khuna naw ca hnyi va ang, cuorasala capa hmang ca tingpa paciepa tie cuotana a cuo," a ta yi.
41 Pahraa tie ta capa bie ama thyi tiyta, Jeim hne Johan cunglie kha ama hi a haa.
42 Cacuonakawta Zingsuv ta ama palang khata u yite, "Chuelyi ming hraw lieca uvtuv tapa tie ta uvpa tie cunglie kha a pale yite ama khing ta ama awpa kha nama pachang.Ref 10:42-43: Luk 22:25-26
43 Cuorasala niema hraw lieca cahaa cata cuo'a vyi; cuorasala nama hrawlie a lecepa a cuo khingpa ca nama changtaapa a cuo riypatana a cuo,Ref 10:43-44: Mat 23:11; Mar 9:35; Luk 22:26
44 pakhana a cuo khingpa ca nama palang sii kha a cuo riypata a cuo.
45 Cawsaa Saacapaa hmuota hriepa pa cuo li pata, hriepatuv cuo riypa hne cawsaa hluvpuv a thlana riypata a hringna pi riypata muo aa vaw ta," a ta.
Zingsuv Ta Mingcue Bartimu A Patluo Sa
(Mat 20:29-34; Luk 18:35-43)
46 Zingsuv hne ziytuv tie ca Jeriko luo kha ama chiy. Ziytuv tie'a nata cawsaazaapuv hneta Jerusalem taata ama pya ning kha Timau saacapaapa, a mingcuepa a hielepapaa Bartimu kha luopuv kielie a zaa tu.
47 Nazareth khypa Zingsuv na a cuo tapa a pachang tiyta khuosa ta khi te, "Zingsuv! David Sapaa! ngie na chi thi tie!" a ta.
48 Cawsaa hluvpuv ta ama kha thla yite duo riypata ama chang, cuorasala David Sapaa, ngie na chi thi tie ta te khuo vie ta a khi hryly.
49 Zingsuv ta a daa te, "Va ku ung," a ta yi. Cacuonakawta mingcuepaa ca ku yite, 'Na palung tluosa se, thu tie, aca ku cuv," ama ta.
50 A pang kha thaw te, a cathlu te Zingsuv'a luo kha aa vaw.
51 Zingsuv ta, "Khaapa na tuepa se tapa ma na khing," a ta. Mingcuepaa ta, "Saya, I hmung pakhaa khing sa," a ta.
52 Zingsuv ta, "Cakuo tie, na zangna na caa patluo sa," a ta. Sungkha ta a ming ca vuo paluo te luopuv lie kha Zingsuv ca a ziyle.