9
(Mat 10:5-15; 6:7-13)
Zingsuv ta ziytuv hlyihning kha suvkha lie kupakhaw yite khuevuo bangkhuo te khuna hne pasana patluo sa khunapa cahrana hne nawhnyina a pi yi. Cakhutaa Khazing Pena kaw ri riypa hne a pasapa patluo sa riypata a pathlie yi. Iema kha, "Khy nama tlaw tiyta khaahmuo a phya kha ung: khuecahryi cuose, sahrie cuose, viechuo cuose, tuokaa cuose, buohryi hlepa zaw cuose a phya kha ung. Ing caa patlung sapa tie'a lie kha capa khy taata nama pya hluo li va aw tie ung; Ingtlung caa dapa khy tie kha sise ungla iema kha a raaringna pina pata nama phyipazaa lie a kaapa buvcing kha a cakhawsue siy tie ung," a ta yi. Ziytuv tie ca a tha yite khyta bangkhuo kha tlaw yite Thuophaa Bie kha hmangting ta chang yite a pasapa kha ama patluo sa.
(Mat 14:1-12; Mar 6:14-29)
Herod ta hmang a cuopa bangkhuo kha a thyi tiyta, a palung a tawmuo ciemuo, tahematapakieca cawsaa chekha ta tiynawtuv Johan na a hring pakhaa ama ta. Chekha tie ta Elijah na a luo ta yite, a hrangpa tie ta hluoning profet pakhakha na a vya hring pakhaa ama ta. Herod ta, "Johan ca a luv i pate sa tli yi; cuorasala hinghaahingta a kaw i thyi nguoluo papaa hing ahung tama a cuo aa?" a ta. Cakhutaa Zingsuv kha hmung hrahring riy'a pata a zue.
(Mat 14:13-21; Mar 6:30-44; Jhn 6:1-14)
10 Lucuotuv tie ca vya kaa yite ama tuepa bangkhuo kha Zingsuv ama chang. Cakuo khyi yite iema selaw ta Bethsaida luo kha ama si. 11 Capa kaw ca zaapuv ta thyi yite ama ziy. Iema kha cuhluo yite Khazing Pena kaw kha chang yite tluona a hupa tie kha a patluo sa yi.
12 Ning a tla'a nang tiyta hlyihning tie kha ama'a luo a vaw yite, "Cawsaazaapuv hing pathlie yi la hingpa cahriy lie a awpa khyta luo kha va cakuo yi sala ning riypa hne a rina zaw vaa huv yi se, tahematapakieca hingpa hmang hing ruocakungna hmang tana a cuo," ama ta. 13 Cuorasala Zingsuv ta, "Niema ta ning riypa sa ca pi tie ung," a ta yi. Iema ta, "Vaa pata hing cawsaa zaw bangkhuo cuota sa kha ma va calyi li kieca, viechuo tluo pangaa hne ngaa sahning ri li pata ma hnyi viepa aw vyi," ama ta. 14 Capa lie a awpa ca capaa thaw pangaa hraw ama ta. Zingsuv ta ziytuv tie kha, "Cawsaa hing phuvkha lie sawngaa cie ta patu tie ung," a ta yi. 15 Cahaa cata ama tue diy khu taata ama patu. 16 Zingsuv ta viechuo tluo pangaa hne ngaa sahning kha la te, vuoruo luo ang te, Khazing a pathuosa khu taata chechi te cawsaazaapuv kha re riypata ziytuv tie kha a pi yi. 17 Ama bangkhuo ta ning yite ama riy a bi diy. Ama pangaapa kha ama pahmya ca a zungpepa beke zung hraa hlyihning a ta.
(Mat 16:13-19; Mar 8:27-29)
18 Luokha ca Zingsuv ama selaw ta thlaa a chuo nguoluo ning, ziytuv tie dyi a thaa lie ama aw ning kha, "Cawsaa ta ahung ina ta yi ma," tapata a hie hriy yi. 19 Iema ta, "Tiynawtuv Johan ne aca ta yi. Cuorasala a hrangpa tie ta Elijah ne ca ta yite, a hrangpa tie ta hluoning profet pakhakha na a vya hring pakhaa, aca ta yi," ama ta. 20 Zingsuv ta, "Niema haw? Ahung tana a cuo ina ta ung cama?" a ta yi. Piter ta, "Nama ca Khazing Messiahnote 9:20 Or Khrih tana na cuo," a ta.
(Mat 16:20-28; Mar 8:30—9:1)
21 Zingsuv ta capa kaw ca ahunghmuo chang li riypata khuopuv ta bie a cung yi. 22 "Cawsaapa Saacapaa ca khuopuv ta te-ang'a te, uvthyi tie, tluobyilepa tie hne phungbie saya tie ta thaw'a yite ama thie aa. Ningthung na lie kha hringna luo pathu pakhaa pata a cuo aa," a ta yi.
23 Cakhutaa iema bangkhuo kha, "Ahunghmuo cuose naa ziytuv a cuo khingpa ca ama khingna kha thuse pata, a vieluo kha ningting a puv sala na ziy se. 24 Tahematapakieca ama hringna aa bangpa a khingpa tie ca ama hringna kha a sung'a yite, cuorasala kama kawlieta a hringna a pahlipa tie ca khuona kha ama hmung aa. 25 Cawsaa pakha ta Chuelyi hing a bangkhuo ta cu ra sala a hringna aa sung kieca khaapama a thlahne aa? 26 Cawsaa pakha ta kama hne i bie kha a zaakhyi kieca, Cawsaa Saacapaa zaw ta a rungnaana, a Paa rungnaana hne a pathepa avuoming rungnaana hne aa zuv thueta a zaakhyi ra aa. 27 Cuorasala biehmisi tana ica chang: hinglie a awpa hrawlie hing Khazing Pena a tlungpa ama hmung hluo li ta a thiy li riypa ama aw," a ta.
(Mat 17:1-8; Mar 9:2-8)
28 Hingpa bie a ri khu taata ning cari hraw a ta pata, Zingsuv ta Piter, Johan, hne Jeim kha ku yite thlaa chuo re pata tluo luo a kie khyi yi. 29 Thlaa a chuo nguoluo ning kha a hminghmie ca a vya thle te a caw ca ming khepahli nate ta a ruo. 30 Sungkhabala ta cawsaa pahning, Moses hne Elijah ta ama kha bie a maa rue nguoluo pata ama hmung. 31 Vuoruo rungnaana hneta zaa luo yite Jerusalem lie a thiyna riypa kaw kha amaa rue. 32 Piter hne a viesaa zaw ca thuvhunglung khata amaa hmung, cuorasala amaa kya cha ca Zingsuv rungnaana hne ama hne a daahnepa cawsaa pahning kha ama hmung. 33 Capa cawsaa pahning tie ta ama cakuose nguoluo ning kha Piter ta, "Abyipa, hinglie awpa hing kiema cuota a pha! Thluodaa suothung sa'a pate, suokha nama cuo, suokha Moses cuo, hne suokha Elijah cuota a cuo aa," a ta. Ama taca khaapama i ri tapa kha pachang tange vyi. 34 Bie a ri nguoluo ning kha amyi kya pya te a ningdiy ta a pakhuo yi; amyi ta a pahlaw nakaw yi ta ziytuv tie ca ama ciy. 35 Amyi chung taata ueryi suokha za paring te, "Hingpapaa hing i tlawpanote 9:35 Hluo vie caa-uv lieca i Duepa * a ta. i saacapaa tana a cuo, a bie naathlie ung," a ta. 36 Ueryi a chuo pahne Zingsuv kha ama selaw ta a awpa ama hmung. Ziytuv tie ca a dieta tah aw yite ama hmungpa hmang kha capa chung ca ahunghmuo chang li pata ama za aw.
(Mat 17:14-18; Mar 9:14-27)
37 A mawluopa tluocung taata ama za cung pata cawsaa hluvpuv ta ama vaa taw. 38 Zaapuv chung taata cawsaapapaa pakha ta vya khi te, "Saya, i saacapaa pakha dyi i hnyi tlakuopa hing na mangpa tie. 39 Sungkhabala ta thlaapa ta patuv te a khi a u, a pakaa taata abuvcaphawpa a pyana te ta a siy, khuosa ta tue te pya se khing vyi. 40 Caa ziytuv tie kha papya riypata i nue raalaa yi ca papya khu vayi," a ta. 41 Zingsuv ta, "Zangna hnyi li, a pali a pahnaa ta a hringpa phang! Kha cuo ma niema'a lie i aw kalie a hu'a te nama nang ica ca kalie yi a hu aa? Na saacapaa ca hing luo hing a vaw khyi tie," a ta. 42 Haatiypapaa ca a vaw nguoluopa khata khuevuo ta alyi lie kha vaapatyi te a siy. Cuorasala Zingsuv ta thlaapa pyalyipa kha chuo te, haatiypapaa kha patluo sa te a paa kha a pi pakhaa. 43 Khazing lesyina kha ama hmung tiyta cawsaa bangkhuo ca ama nang ta a uo.
(Mat 17:22-23; Mar 9:30-32)
Zingsuv ta a tuepa hmangting kawlie zaapuv ca ama kharue haa te ama aw nguoluo ning kha, ziytuv tie kyihuo kha, 44 "Ica chang riypa yi hing naathlie tie ung! Cawsaa Saacapaa hing cawsaa kuv luo pipa a cuo aa," a ta yi. 45 Cuorasala ziytuv tie ta khaama a ri khing tapa pachang vayi. A ri khingna kha nukhuopa cuo yite, capa kaw ca ama kha hiehriy riypata a nguo vayi.
(Mat 18:1-5; Mar 9:33-37)
46 Ziytuv tie chunglie bie a ina suokha aw te; caca iema hrawlie ahungma a lece tapa a cuo. 47 Cuorasala ama chunglie ama ruepa kha a pachangtuv Zingsuv ta haatiy pakha kha la te a thaalie padaa te, 48 iema kha, "I ming ta hingpa haatiy pakha a cuhluotuv ca kama naa cuhluopa ta a cuo. Kama naa cuhluopa ca naa pathlietuv a cuhluopa ta a cuo. Tahematapakieca niema hrawlie a cawcepa ca a lecepa tana a cuo," a ta.
(Mar 9:38-40)
49 Johan ta, "Abyipa, na ming ta khuevuo a papyapa pakha hmung pate muo kiema phuv a cuo li nakawta ma thlu ta," a ta. 50 Cuorasala Zingsuv ta, "Thlu kha ung, tahematapakieca niema caa du lipa ca niema caa byatuv na a cuo," a ta.
51 Zingsuv lathawna riypa cuo a vya ngie hryly tiyta, Jerusalem luo si riypata a tha. 52 A hmie luo kha biephyatuv tie pathlielu yite, a cuota ting pacie riypata Samaria khy khykha luo kha amaa ngie. 53 Cuorasala capa khychung ming cata Jerusalem luo a caluo riypa ama pachang nakawta cuhluo vayi. 54 Ziytuv Jeim hne Johan ta capa ca ama hmung tiyta, "Abyipanote 9:54 Hluo vie caa-uv lieca Eliah ta a tuepa haakhata * tapa biesuo a vya paziy sa. iema a uv riypata vuoruo taata myi za patla sa se pala na khing'a ma?" ama ta. 55 Zingsuv ta a pali te a chuo yi. 56 Cakhutaa khy hrang luo kha ama caluo.
(Mat 8:19-22)
57 Luo lie ama cakuole nguoluo ning kha cawsaa pakha ta Zingsuv kha, "Na sina bangkhuo tana ica ziy aa," a ta. 58 Zingsuv ta, "Cahnie ta khue hnyi yi te, pavaa ta buv ama hnyi, cuorasala Cawsaa Saacapaa ca a rina hmang hmuo hnyi vyi," a ta. 59 A hrangpa pakha kha Zingsuv ta, "Na ziy tie," a ta. Cuorasala capapaa cata, "Abyipa, i paa va paby taa ang," a ta. 60 Cuorasala Zingsuv ta, "A thiypa tie ta amaa thiypa ca paby yi se. Nama ca vaa la Khazing Pena kaw kha va phu tie," a ta. 61 A hrangpa pakha ta, "Abyipa, ica ziy aa, cuorasala vaa taa ang sala i ing lie zaa ngaapa tie kha bie vaa chang taa yi ang se," a ta. 62 Zingsuv ta, "Ahunghmuo cuose thetung a patuv tli pata hnang luo a palipuopa ca Khazing Pena hneta a tla vyi," a ta.