5
(Mar 4:18-22; Mar 1:16-20)
1 Ning kha ca, Genesaret Tiyliy kielie Zingsuv aa daa ning kha, Khazing bie naathlie riypata cawsaa kha a nuo ta a nuopuo yite amaa luo ama vaa ngie.
2 Zingsuv ta ngiekuo lie sawkawpalaw sahning a awpa kha a hmung. Ngaa a vaapa tie ca sawkawpalaw taakhata pya yite ama'a sue kha ama pasiy nguoluo.
3 Capa sawkawpalaw hrawlie khata Simon huopa luo kha kie te ngiekuo taakhata a cawta va nuo vie riypata a chang. Zingsuv ca sawkawpalaw chunglie ca a tu te cawsaazaapuv kha a pacuv yi.
4 Bieri a patlung taata Simon kha, "Na sawkawpalaw hing tiy a thuv viena luo hnyi la naa sue kha vaa tie," a ta.
5 Simon ta, "Abyipa zuokhydyi ma vaa law pata sakha hmuo pa-uo va puv. Cuorasala vaa ungla malie na ta kieca i vaa'a tle," tapata a palie.
6 Ama vaa ca ngaa a hluv hringhruo ama pa-uo nakawta amaa sue ca a tlaa puo diy'a nang.
7 Cacuonakaw palaw hrangpa cunglie ama viesaa tie kha ama kuv ta a kyi yite a byana ama hie. A vaw yite sawkawpalaw sahning lie kha ngaa ca a bikaluv pata chi yite tiy luo a tla khyi'a nang.
8 Simon ta khapa hmang kha a hmung tiyta, Zingsuv phyi thabaw lie kha a pakhuv pane te, "Abyipa, na cakuo se tie! A suepa tana i cuo!" a ta.
9 Ama hne a viesaa tie ca ama pa-uopa ngaa kha a hluvtuv nakawta ama nang ta a uosa.
10 Simon viesaa tie, Zebedi saacapaa tie Jeim hne Johan zaw kha ama nang a uosa ra. Zingsuv ta Simon kha, "Na thlaa zang kha se; ata taahingta ca cawsaa na na patuv'a tli," a ta.
11 Ama sawkawpalaw ca ngiekuo lie kha chi yite, ama chechiy bangkhuo kha thuse yite Zingsuv ca ama ziy.
(Mat 8:1-4; Mar 1:40-45)
12 Luokha ca Zingsuv kha khypuv suokha lie a awpa ta capa khy lieca caahminghmaanote 5:12 Caahminghmaa tapa biesuo hing pasana phangphang * tana zaw a cuo khu. a phyapapaa kha a za aw. Capapaa ta Zingsuv kha a hmung tiyta, a hmiekunglie kha a bu te, "Abyipa, na khingpa ta a cuo kieca ina patluo sa khu ciy," tapata a nue.
13 Zingsuv ta a kuv ta va paza te a hrie. "Ica patluo sa khing, Pathe tie! a ta. Sungkhabala ta a tluo.
14 Zingsuv ta, "Ahunghmuo chang kha yi, cuorasala tluobyi'a luo kha tathlyalya ta vaa la vaa pamang sa tie; na tluo tli tapa kha aca pachang riypa yita, Moses phungbie lie a awpa haakhata hriykhung a rina va tue tie," a ta.
15 Cuorasala Zingsuv thuohlaa ca a pathuo hryly, cawsaazaapuv ta a bie naathlie riypa hne ama pasana taata patluo sapa cuo riypata ama vya pangie.
16 Cuorasala Zingsuv ca dya zuvpathla te ruoduona luo kha cakuo te thlaa a chuo.
(Mat 9:1-8; Mar 2:1-12)
17 Ningkha ca Zingsuv ta a pacuv nguoluo ning yi kha Galilee ruo khy ting taata hne, Judea taa hne Jerusalem taata a vya chiypa Farasi tie hne Phungbie saya tie chekha zaw capa lieca a maa tu ra. A pasapa patluo sa thenapa cahrana ca Zingsuv cunglie kha a aw.
18 Cawsaa chekha ta a pakyapapaa kha a pangphaa hne a vya puvle yite, ingchung luo zaa ngiekhyi pata Zingsuv hmielie vya chi riypa kha ama zue.
19 Cuorasala cawsaa ama hluv tuv nakawta a chung luo kha a ngiekhyi khu vayi. Cacuonakawta thlungkhuv cung luo kha kie khyi yite thlungkhuv kha za pahaw yite cawsaa hraw Zingsuv hmiekunglie kha a pangphaa hneta ama za pachung.
20 Zingsuv ta ama zangnapa kha a hmung tiy yi ta, "Liechung,note 5:20 Gk Cawsaapa na suena ca a ngiethe pata na cuo tli," a ta.
21 Phungbie saya tie hne Farasi tie ta, "Khazing thuo pachina bie a ripapaa hing ahung ta ma a cuo? Khazing pakha kyalya dyi muo sue a ngiethe khutuv ta a cuo ta," amaa ta.
22 Zingsuv ta ama ruenapa ca pachang yite, iema kha, "Khaapanakawma hinghaahingta nama rue?
23 'Na suena ca a ngiethe pata a cuo tli,' tapa ma a na vie, 'Thu la cakuo,' tapa ma a na vie?
24 Cuorasala, Cawsaa Saacapaa hing chuelyi lieta sue a ngiethe khuna naw a hnyi tapa nama pachang khuna riypata ta te, a pakyapapaa ca, "Ica chang, thu la na pangphaa kha a la lah ing luo cakuo!" a ta.
25 Sungkha ta, cawsaapapaa ca iema zaw hmielie kha thu te, aa zienapa pangphaa kha a la te ing luo cakuo te Khazing kha a pathuosa.
26 Ama bangkhuo ta ama nang ta uo te ama ciy hringhruo. Khazing kha pathuosa yite "Ata ning ma hmungpa hmang ca kharuehaapa hmang na a cuo," ama ta.
(Mat 9:9-13; Mar 2:13-17)
27 Cakhutaata, Zingsuv ca pya te ngukhyituv Levi ngukhyina hmang lie aa tu nguoluopa kha a hmung. Zingsuv ta, "Na ziy," a ta.
28 Levi ca thu te, chechiy bangkhuo kha thuse te, ama kha a ziy.
29 Cakhutaa Zingsuv ca Levi ta a ing lie kha pyi lesapa tuepa te capa lieca ngukhyituv tie hne cawsaa hrangpa a hluvpuv zaw ca iema hne khata cabya lie amaa tu pakhaw.
30 Farasi tie hne ama Phungbie saya tie chekha ta Zingsuv ziytuv tie'a lie kha a cie yite, "Khaapanakawma ngukhyituv tie'a nata a suepa tie hneta nama ning nama dang pakhaw? ama ta.
31 Zingsuv ta, "A tluopa ca siybyi a hu vayi, cuorasala a pasapa tie dyina a hu yi.
32 Aa dangpa tie ku riypata a zuv va ang, a suepa tie ama suenapa pangiesapachiy riypatana i vaw," tapata a palie yi.
(Mat 9:14-17; Mar 2:18-22)
33 Cawsaa chekha ta Zingsuv kha, "Johan ziytuv tie hne Farasi ming ziytuv tie ca ata'a na ata tah sa uv yite thlaa ama chuo; cuorasala nama caa ziytuv tie ca ning yi dang yite ama aw,' ama ta.
34 Zingsuv ta, "Nungchiypyi a vya zawpa tie ca nung a chiytuvpa satlie iema'a lie a aw chung kha sa nama pa-uv sa khu'a ma? Pa-uv sa khu'a va ungciy!
35 Nung a chiytuvpa satlie kha iema'a taata ama lana cuo kha vya chiy'a te, capa cuo thue cata sa ca amaa uv aa," a ta.
36 Zingsuv ta hingpa pakhingpuonabie zaw hing a chang kalie yi: "Ahungtahmuo caw parangpa kha cawthaapa thlaa yite a bie thla buo vayi. Cahaa cata a tue kieca cawthaapa dyi kha tlaa lakaa'a te caw parangpa lie abie a thla tiyta a tla hyi'a vyi.
37 Cakhutaata, ahungtahmuo mingsuv tiy thaapa kha savang ungthyi parangpa luo raw buo vayi. Cahaa cata ama raw kieca mingsuv tiy thaapa ta savang ungthyi kha tungpahaw'a te, mingsuv tiy ca a lyi diy'a te savang ungthyi kha a ra aa.
38 Cuorasala mingsuv tiy thaapa ca savang ungthyi thaapa lie raw riypatana a cuo.
39 Cakhutaa ahunghmuota mingsuv tiy hlungpa kha ama dang khu taata mingsuv tiy thaapa kha dang khing vayi. 'A hlungpa na a pahuo vie,'"note 5:39 Hluo vie caa-uv lieca a pahuo vie ta te caa-uv chekha lieca rina 39 * hing aw vyi. ama ta, a ta.