14
1 Luokha ca Sabbath ning ta Zingsuv ca Farasi uvthyi tie pakha ing luo kha sa ning riypata a vaa; capa lie ca Zingsuv ca a ngieta tah ama mangpathliy.
2 A kuv hne a phyi a thlingpa cawsaa pakha ca Zingsuv hmielie kha a aw.
3 Zingsuv ta Phungbie saya tie hne Farasi tie kha, "Ma phungbie ta Sabbath ning a pasapa patluo sa riypa a pa-aw ma pa-aw vama? tapata a hiehriy yi.
4 Cuorasala iema ta khaahmuo ri vayi. Cacuonakawta Zingsuv ta cawsaapapaa ca ku te, patluo sa te, a cakuo sa.
5 Cakhutaata iema kha, "Niema hrawlie ta pakhakha hing a saata ma a cuo li kie a cue ma Sabbath ning ta takhue chung luo tla sala Sabbath ning a cuo nakawta thue paluo li pata nama aw'a ma?" a ta yi.
6 Hingpa kawlie hingta khaahmuo palie khu vayi.
7 Zingsuv ca khyche zaw ta sa ning kunapa lie a tuna hmang phacepa amaa tlawpa kha a hmung tiyta hing pakhingpuonabie hing a chang yi.
8 "Pakhakha ta napuv chiynapa pyi luo aca ku tiy yi ta a tuna phacepa lie kha a tu kha ung. Nama laata uvthyi vie zaw kha ku ra biephung yi sala,
9 caa kutuvpapaa yi ta nama'a luo kha tyatya a vaw pata, "Ama hing tlyi thi tie," aca vya ta kieca nangzaahmiechi pata a ne cepa luo naa tuna a hu aa.
10 Cuorasala sa ning aca ku tiy yi ta a ne cepa lie kha vaa tu la caa kutuvpapaa kha a vaw'a te, viesaa, kya kie la a tuna aa suo viepa lie hing a kya tu tie aca ta aa." Catiyta nama hne cabya lie a tuhnepa kupa cawsaazaapuv hmielie kha hmiephaa na cu aa.
11 Tahematapakieca iema hne iema a cyicalangpa bangkhuo ca pachungpa ta cuo'a yite, iema hne iema a panepa bangkhuo ca cyicalangpa ta ama cuo aa.
12 Cakhutaa Zingsuv ta sa ning a kutuvpapaa kha, "Ningchung sa ning cuose zuoluo sa ning cuose na ku tiy yi ta, na viesaa, na uvnu, na tieriy hne a hnyirungpa na ingpaa kha ku kha yi; tahematapakieca iema ca nama kha ca ku hriy'a yite, cahaa cata na tuepa kha thung pata na cuo aa.
13 Cuorasala pyi na tue tiyta a siypasapa, kuvsaw phyisawpa, hne mingcuepa tie kha ku yi la iema ca aca ku hriy khu li nakaw'a yi ta
14 thluechiy na hmung aa. Cawsaa a dangpa tie thiyna taata ama thupakhaa ning kha Khazing ta aca thung aa," a ta.
(Mat 22:1-10)
15 Zuo sa ning ama saw rapa pakha ta capa bie ca vya thyi te, Zingsuv kha, "Khazing Pena chung saduona pyi lie a tu rapa tie ca thluechiypa tana ama cuo!" a ta.
16 Zingsuv ta ama kha, "Cawsaa pakha ta saduona pyi lepuv tue te cawsaa a hluvpuv a saw yi.
17 Saduona cuo a de tiyta a kupa tie'a luo kha a sii tie kha pathlie yite, 'A vaw paa tie ung, khaapa bangkhuo pachie ciepa tana a cuo tli,' a pata sa yi.
18 Cuorasala ama bangkhuo ta ama cuo the linapa kha ama ri kaluo diy. A pakhanapapaa ta ama kha, 'Luruo baata suokha calyi ang te i va mang na a hu, naa ngiethe thi tie,' a ta.
19 A hrangpa pakha ta, 'Cuetungpa tuepangaa calyi ang te ata hing a chiepha mangna ta re pahrie sa pachiy naa se ang i ta ning cuote naa ngiethe thi tie,' a ta.
20 A hrangpa pakha ta napuv i chiy khu patahne cuote a vaw hmuo'a va ang,' a ta.
21 Cacuonakawta changtaapapaa ca a byipaapa'a luo kha kaa te bie bangkhuo kha a chang. A byipaapa ca a hi haasa te a siipaapa kyihuo khata, 'Khychung luopuvlepa hne luopuvcawpa zaw luo kha a catli pata vaa la a siypasapa, kuvsaw phyisawpa, hne mingcuepa tie kha a vya chiy tie yi,' a ta.
22 A siipaapa cata, 'Abyipa, na ripa haakhata i tue diy tli, cuorasala a khuo ca a tlaw kalie,' a ta.
23 Cakhutaata a byipaapa ta a siipaapa kha, 'Luopuvlepa hne luocawta bangkhuo luo kha vaa la i ing a bi hluo li cawsaa kha a vya chiy tie yi.
24 Ica chang yi: i za ku ciepa tie pakha tahmuo i zuosa duopa hing a pacuo'a vayi," a ta.
(Mat 10:37-38)
25 Cawsaazaapuv ta Zingsuv ama ziyle nguoluo pata Zingsuv ca a pali te iema kha,
26 "Ahunghmuo cuose kama'a luo a vawpa ca a nung hne a paa, a napuv hne a saata zaw, a uvnu hne a sieta zaw, ama hne ama zaw kha aa hue li kieca naa ziytuv cuo khu'a vyi.
27 Ahunghmuo cuose vieluotung kha a puv pata kama hnang naa ziy lipa ca kama naa ziytuv cuo khu'a vayi.
28 Niema chung taa pakha ta ing a suopuv sa namaa ting kieca i palang nate i tuokaa ta a de'a ma a de'a va ma tapa pachang riypata a tu pata a chuo riypa kha tue taa li pata nama aw'a ma?
29 Caacuolikieca inghruo kha na bang khu taata palang li pata aw'a cate, a hmungpa bangkhuo ta aca pahnyisue'a yi.
30 'Hingpapaa hing ing sa ca pathu raalaa te a palang khu va hinghaw,' a ca ta'a yi, a ta.
31 Rieka thawhraa a hnyipa siepahruo pakha ta ama a du riypata rieka thawkiy hne a vya sipa siepahruo kha a du'a nang pata a cuo kieca, a tu taa'a te muo khapa siepahruo kha a du khu na riypa thaazuo a hnyi hne hnyi li kha a rue taa'a ta.
32 A du khunapa thaazuo a hnyi li kieca, siepahruo hrangpapaa luohlaa lie a aw kalie ning kha, a rena tue riypata luosituv kha a pathlie riypata a cuo.
33 Cahaa cata, "Niema zaw hing nama hnyipa bangkhuo nama thuse li kieca pakhahmuo naa ziytuv cuo khu'a va ungciy," a ta yi.
(Mat 5:13; Mar 9:50)
34 Paciy ca a pha, cuorasala a iena kha a vie kieca tuokhaatama pa-ie sa pakhaa khupa a cuo aa?
35 Alyi cuota thlahnena hnyi vyi, aphuvlyi ta zaw hmuo thepa cuo'a vyi; thaw riypa dyi tana a cuo tli. Naa a hnyipa ta thyi tie ung," a ta yi.