6
(Mat 14:13-21; Mar 6:30-44; Luk 9:10-17)
Cakhutaacata Zingsuv ca Tiberias riyliy tapata zaw ama u rapa Galilee riyliy huesuo luo kha a vaa. A pasapa tie a patluo sapa yi kharuehaa hmang kha ama hmung nakawta cawsaa hluvpuv ta ama kha ama ziy. Zingsuv ca tluocung luo kha kie te a ziytuv tie hneta amaa tu. Judah ming Lawsena Pyi cuo kha aa ngie tli. Zingsuv ca hmiehmie pase te cawsaa hluvpuv ama'a luo amaa vawpa kha a hmung tiyta Filip kyihuo kha, "Hingpa cawsaa bangkhuo ning riypa viechuo hing khaapaliema ma calyi aa?" a ta. Hinghaahingta a hiehriypa hing Filip kha a dyapasya khing nakawta a cuo. Khaapama i tue aa tapa kha ama ta ca a pachang thluo. Filip ta, "A cawta law ta amaa ky riypata hmuo denariinote 6:7 Denarii zahning* denarii phiekha ca kuliy re a hriepa pakha ning kha thavie tana a za cuo. zahning muo viechuo ta a zu'a vyi," a ta. Ziytuv hrangpa pakha, Simon Piter nuta Andru ta, "Hingpa lie hing barli viechuo tluo pangaa hne ngaa sahning a hnyipa haatiypa pakha a aw, cuorasala cawsaa hing zaa ca a zu the riypa cuo vyi," a ta. 10 "Zingsuv ta, "Cawsaa kha patu sa tie ung," a ta yi. Capa hmang lieca aphuv chaasa te cawsaa bangkhuo ca a tu yite thawpangaa tluv ama ta. 11 Zingsuv ta viechuo kha la te, palungtluona bie a hluo khu taata, capa lie a tupa tie kha a re yi. Cahaa cata ngaa zaw kha tue te cawsaa bangkhuo ta riybisa pata ama ning. 12 Ama ning khu taata ziytuv tie kha, "Ama ningbuopa kha pakhaw tie ung, a cawta hmuo a vievuv li riypata," a ta yi. 13 Cacuonakaw pakhaw diy yite cawsaa ta ama ningpa barli viechuo tluopangaa taakhata ama ningbuopa beke ta zung hraa hlyihning a bi. 14 Cawsaa ta kharuehaa hmang a tuepa kha ama hmung tiyta, "Chuelyi luo a vaw riypa profet tapa ca ama hrahring hingna a cuo," ama ta.
15 Zingsuv ta iema kha a vaw'a yite, na patuv'a yite siepahruo cuo riypata hruohra ta ina hripuo'a yi tapa kha a pachang nakawta ama se ta dya zuvpathla te tluocung luo kha a kie.
(Mat 14:22-33; Mar 6:45-52)
16 Zuoluo ning aa ngie tiyta ziytuv tie ca riyliy luo kha zuv yite 17 sawkawpalaw kha a khang yite, Kapernaum luo vaa riypata riyliy kha ama va te. Khy a zing tli, Cuorasala Zingsuv ca iema'a luo kha a vaw valie. 18 Thliy aa hruo nakawta riyliy lieca tiylaw a thu. 19 Sawkawpalaw ca me thung me paliynote 6:19 Gk Stadia suokiysuopangaa* a cuo li kie sawthung tluv. tluv ama va mawpa khata Zingsuv ca riyliy cunglie kha a phyi ta vya cakuo te iema'a luo a vya ngiepa yi kha ama hmung ca ama thlaa a zangsa. 20 Zingsuv ta, "Nama thlaa zang kha se, Kama tana i cuo," a ta yi. 21 Sawkawpalaw luo kha Zingsuv ca pakie sa yite amaa tingna hmang kha sungkha ta ama va pha.
22 A mawluopa ta riyliy huesuo lie a awpa cawsaazaapuv khata capa lie ca sawkawpalaw suokha dyi aw te, Zingsuv kha capa sawkawpalaw khata ziytuv tie hne si li pata, iema selaw ta ama sipa kha ama hmung. 23 Tiberias taata a vya chiypa sawkawpalaw hrangpa tie kha, Abyipa ta palungtluona bie hluo te cawsaazaapuv viechuo ama ningnapa a thaa lie kha amaa vya pahy. 24 Cawsaazaapuv ta Zingsuv hne ziytuv tie ama aw lipa kha ama pachang tiyta, Zingsuv huv riypata sawkawpalaw kha a khang yite Kapernaum khy luo kha ama si.
25 Cawsaa ta Zingsuv kha riyliy huesuo lie ama va hmung tiyta, "Rabbi, khatiy tiy tama hingpa luo hing naa vaw?" ama ta. 26 Zingsuv ta, "Biehmisi tana ica chang yi: ina huvpa ung cahing kharuehaa hmang i tuepa nama hmung nakawta cuo li pata viechuo nama khing zi nama ning nakawtana a cuo. 27 A ra thepa sa cuota re hrie kha ung; cuorasala Cawsaa Saacapaa ta aca pi riypa yi chuozaa ta a hmangpa hringna sa cuota re kha hrie tie ung. Tahematapakieca Paa Khazing ta ama cunglie kha a palung tlingnapa caakhe kha a khe tli. 28 Cakhutaata iema ta, "Khazing ta malie aa khing khyipa re hrie riypata khaapama ma tue aa?" ama ta. 29 Zingsuv ta, "Khazing khingpa re ca ama ta a pathliepapaa zang khana a cuo," a ta yi. 30 Iema ta, "Hmung'a pate maca zang riypata khaapa pamangsana ma na tue aa? Khaapama na tue aa? 31 Caapathepa ta, 'Vuoruo taata ning riypa viechuo kha a pi yi,' a tapa haata, ma mingchingmingvuo tie ca ruochung lie mannaa kha ama za ning," ama ta. 32 Zingsuv ta, "Biehmisi tana ica chang yi: Vuoruo taata viechuo caa pipa yi ca Moses ta cuo vyi, vuoruo viechuo hmisipa caa pipa yi ca i Paa tana a cuo. 33 Tahematapakieca Khazing pipa viechuo ca vuoruo taata zaa cungpa hing cuote chuelyi kha hringna a pi," a ta yi. 34 Iema ta, "Abyipa, capa viechuo ca malie pi pari tie," ama ta.
35 Zingsuv ta, "Kama ca hringna viechuo tana i cuo. Kama'a luo a vawpa ca ahunghmuota a nang diy buo li'a pata Kama naa zangpa ca ahunghmuota a tiy hrie buo'a va tli. 36 Cuorasala ica chang yi, a hmung ca na hmung raalaa ung cate na zang va ungciy. 37 I Paa ta ina pipa bangkhuo ca kama'a luo a vaw'a yite kama'a luo a vawpa bangkhuo ca pakaa'a vayi ang, 38 tahematapakieca vuoruo taata i za cung tiy hingta kama khingpa tue riypata cuo li pata naa pathlietuvpa khingna tue riypatana a cuo. 39 Naa pathlietuvpapaa khingna ca: ina pipa bangkhuo kha pakha hmuo pavie li pata ningchuonapa ning khiy ama palang ta hringna luo pathu riypatana a cuo. 40 I Paa khingna hmisi ca Saacapaa kha hmung te a zangpa bangkhuo ta chuozaa hringna ama hmung riypa hingna a cuo. Cacuonakaw, kama ta ningchuonapa ningta khiy hringna luo i pathu pakhaa'a yi," a ta.
41 "Kama hing vuoruo taata zaa cungpa viechuo tana i cuo," a ta nakawta Judah ming ca a maa cie. 42 "Hingpapaa hing Josef saacapaapa Zingsuv kha cuo vama? A nung hne a paa kha ma pachang yi. Khaapanakawma vuoruo taana i za cung a ta the?" ama ta. 43 Zingsuv ta, "Namaa cie phuvluvpa ca duo tie ung. 44 Naa pathlietuv i Paa na kama'a luo a vya chiy yi ta li pata ca ahunghmuota kama'a luo a vaw khu'a vayi; cahaa cata kama'a luo a vawpa ca ningchuonapa ningta khiy hringna luo i pathu pakhaa yi," a ta. 45 Profet tie ta, Iema ca Khazing na a pacuv'a yi,' tapata ama cape kha. Ahunghmuota i Paa ueryi kha thyi te ama'a taata a cuvpa bangkhuo ca kama'a luo kha amaa vaw. 46 Khazing'a taata zaa cungpa pakha ri li pata ahunghmuota Khazing hmung buo vayi, ama dyina Paa kha a hmung buo. 47 Biehmisi tana ica chang yi: a zangpa ca chuozaa hringna a hnyi. 48 Kama ca hringna viechuo tana i cuo. 49 Nama mingchingmingvuo tie ta ruochung lie mannaa kha ama ning raalaa pata ama thiy ngiethie. 50 Cuorasala vuoruo taata a zuvpa viechuo a ningpa bangkhuo ca thiy'a vayi. 51 Vuoruo taata zaa cungpa hringna viechuo ca kama hing tana i cuo. Hingpa viechuo a ningpa bangkhuo ca chuozaa ta ama hring aa. Chuelyi ming ta hringna ama hmung riypata i pi riypa viechuo ca i saa hingtana a cuo," a ta yi.
52 Judah ming ca iema hne iema kha a i yite, "Tuokhaatama hingpapaa hingta a saa ca ce riypata malie a pi the aa," ama ta. 53 Zingsuv ta iema kha, "Biehmisi tana ica chang yi: Cawsaapa Saacapaa a saa kha ce li pata a thiyse zaw nama dang li kieca nama chunglie hringna hnyi'a va ungciy. 54 I saa a cepa hne i thiy a dangpa bangkhuo ca chuozaa hringna hnyi'a yite ningchuonapa ningta khiy hringna luo i pathu pakhaa'a yi. 55 I saa ca sa hmisipa ta cuote i thiyse ca dang riypa hmisi ta a cuo. 56 I saa kha ce te i thiy a dangpa ca kama chunglie hring yite kama zaw iema chunglie i hring ra. 57 A hringpa i Paa ta na pathlie te ama thueta kama i hring pahaata i saa a cepa bangkhuo ca kama thueta ama hring aa. 58 Vuoruo taata a zuvpa viechuo ca hingpa hing tana a cuo; nama mingchingmingvuo tie ta za ning yite ama thiypa haakhata cuo vyi, cuorasala hingpa viechuo a ningpa ca chuozaa ta ama hring aa," a ta yi. 59 Hingpa bie ca Kapernaum khy apungna-ing lie a pacuv ning yi ta a ripa tana a cuo.
60 Ama a ziypa hluvpuv ta capa bie ca ama thyi tiyta, "Hingpa pacuvna ca a ruv ciemuo, ahungma a cuhluo khu aa?" ama ta. 61 Cuorasala, hingpa kawlieta a ziytuv tie amaa ciepa kha Zingsuv ta pachang te, iema kha, "Hingpa bie ta nama palung aca para yi ma? 62 Cawsaa Saacapaa hing a hluo ta a za awna luo a kaapakhaapa kha hmung biephung ungla tuokhaatama nama aw aa? 63 Hringna malie a pipa ca Thlaapa tana a cuo; saapa hing ca khaahmuo thlahne vyi. Niema'a lie i ripa bie hing thlaapa hne hringna bie ta a cuo. 64 Cuorasala niema hrawlie chekha taca zang va ungciy," a ta. Zingsuv ta a hruothu taata ahungma naa zang li riypa tapa hne ahung ma naa lyi riypa tapa kha a pachang pacie diy. 65 Zingsuv ta pazue te, "Hingpa nakaw hing muo i Paa ta luo a sapa li kie yi ca ahunghmuota kama'a luo a vaw khu'a vayi ica tapa yi kha a cuo ta," a ta yi.
66 Capa nakaw cata Zingsuv a ziytuv a hluvpuv ca kaa yite ama kha ziy va tli yi. 67 Cacuonakawta Zingsuv ta ziytuv hlyihning tie kha, "Niema haw nama cakuo ra'a ma?" a ta yi. 68 Simon Piter ta, "Abyipa, ahung'a luoma ma cakuo aa? Chuozaa hringna a pituv bie a hnyipa ca nama ca tamuo na cuo ta!" 69 Nama ca A pathepa Khazingnote 6:69 Hluo vie caa-uv lieca a hringpa Khazing Saacapaa Khrih* a ta. na cuopa kha zang pate ma pachang tli," a ta. 70 Zingsuv ta, "Kama na niema hlyihning tie hing caa tlaw yi ang cuo vama? Cuorasala niema chung taata pakha ca setaa tana nama cuo!" a ta yi. 71 Hlyihning chunglie pakha ta a cuo raalaa pata ama a lyituv riypa Simon Iskariot saacapaapa Judas khana a ri khingpa ta a cuo.