4
Niema hrawlie namaa hru namaa inapa hing khaapa taata ma aa vaw? Nama chunglie rie a du nguoluopa nama saapa khingna taata na aa vaw cuo vama? Suokhakha khing ung cate nama hnyi khu li nakawta cawsaa nama thie. Suokhakha kha khing ung cate nama hmung khu li nakawta namaa hru namaa i. Nama hie li nakawtana nama hmung va. Nama hie raalaa pa zaw ta hmung va ungciy, tahematapakieca saapa a nuona lie hmuo riypata aa hmuo li pata nama hie. Zangtluo a tla lipa cawsaa zaw! Chuelyi hne a viesaapa hing Khazing hne a cariena tana a cuo tapa pachang va ung cama? Cacuonakawta chuelyi hne a viesaa a khingpa bangkhuo Khazing carie tana amaa li. Caapathepa ta, "Khazing ta ma chunglie a chipa thlaapa kha a duesa nakawta aa hrakuo," a tapa hing ata cakhawpa ta rue kanaa ungciy? Cuorasala ama ta a hluv vie ta vi malie a hnyi; cacuonakawta, "Khazing ca a hruotlepa kha a du te, cuorasala a panepa kha vi a hnyi yi."
Cacuonakawta Khazing ri kha a ngie tie ung. Setaa kha a du ungla niema'a taata aa ruo aa. Khazing kha a ngie ungla ama zaw acaa ngie ra'a yi. Niema a suepa zaw, nama kuv kha a siy tie ung. Niema a palunghluvpa tie zaw nama pathiypalung kha pathe sa tie ung. Nama ngiechisa pata angiy-aphie ungla caa tie ung. Nama pahnyiparingna kha angiy-aphiena ta thle ungla namaa nuonapa kha ngiechina ta thle tie ung. 10 Abyipa hmielie kha a pane la ama ta aca cyicalang aa.
11 Uvnu hne sieta zaw, pakha hne pakha kha nama thuo a pachi kha ung. Malie thuo a pachipa hne sue a phawpa ca phungbie thuo a pachipa hne sue a phawpa tana a cuo; cuorasala phungbie kha sue na phaw kieca nama ca phungbie a ziypa cuo li pata phungbie kha bie a ripa pa tana na cuo aa. 12 Phungbie malie a pituv hne bie chi khuna a hnyipa ca pakha dyi aw te ama ca malie a khuo khutuv hne malie a para khutuv ta a cuo. Na ingpaa zaw bie chipa riypata nama ca ahung tama na cuo?
13 "Ata ning a cuo li kie mawluo khiy capa khy luo ca si'a pate, capa lieca kung kha aw'a pate, sung pali'a pate tuokaa ma huv aa," a tapa zaw, ata hingta a vaw ungla naathlie tie ung. 14 Mawluo hing khaama a lu aa tapa pachang va ungciy. Nama hringna hing khaapatama a cuo? Niema ca ata hing sungkhata a vya zu te a vie paluopa amyi haatana nama cuo. 15 "Khazing khingna ta a cuo kieca hring'a pate capa hne khapa kha ma tue aa," tahriy tie ung. 16 Cadyiseca niema ca a hruo tle ung cate namaa pale; capa hruotlena bangkhuo ca pha lina tana a cuo. 17 Cakhutaata, hmangpha tue riypa pachang thluo pata a tue lipa ca suena a tuepa tana a cuo.