1 I uvnu hne sieta zaw,note 2:1 Gk I uvnu zaw ima rungnaana Byi Zingsuv Khrih a zangpa nama cuo pahaata hmiemang parung kha ung. 2 Biephungpa ta cawsaa pakha kha siyy kuvpahryi hne cawphasapa a tue pata namaa pungna luo kha a vaw te, siypasapa pakha kha caw a cawkarawpa hneta a vaw ra tiyta, 3 cawphapa a hryipa kyihuo khata, "Hingpa lie hing a tu tie," ta ung cate a siypasapa kyihuo khata, "Lie hue vaa daa tie," a cuo li kie, "i phyi thabaw dakhang lie hing a tu tie," nama ta kieca, 4 niema hrawlie kha pahlyipalena nama tuepa cuote, ruena pha lipa hne tana biechina nama tue cuo vama? 5 I duepa uvnu hne sieta zaw, naathlie tie ung. Khazing ta hingpa chuelyi lieta siypasapa tie hing zangna lie a hnyirungpa cuo riypa hne ama a duepa zaw bie a kuopa yi pena ru cu riypata a tlaw yi cuo vama? 6 Cuorasala niema ca siypasapa tie kha nama ese. A hnyirungpa tie khana caa tlawpuo yi cuo vama? Bierina zung luo caa dalepa yi kha iema na a cuo yi cuo vama? 7 Niema aca paphyapa yi ming phacepa kha a thuo a pachipa ca iema na a cuo yi cuo vama?

8 "Nama naa duepa haakhata na ingpaa kha due tie," tapa Caapathepa lie phungbie sungnaapa hing nama patling sa kieca hmangpha a tuepa ta nama cuo. 9 Cuorasala pahlyipalena na tue kieca suena a tuepa cuo cate, phungbie ta a suepa tapata bie aca chipa. 10 Tahematapakieca ahung a cuo zaw phungbie bangkhuo a ziy pata suokha a ziy li kieca phungbie bangkhuo a ziy lipa tana aa li. 11 Tahematapakieca, "Nungvaathingsuena tue kha ung," a tapa khana, "Lie va naw kha," a ta ra. Nungvaathingsuena na tue li raalaa pata lie na naw kieca phungbie a ziy lipa tana na cuo. 12 Cacuonakawta hyazangna phungbie ta bie a ripa riypa tie haata ri ungla tue tie ung. 13 Tahematapakieca nangduena a hnyi lipa kha nangduena aw li pata bie chipa pata a cuo aa; nangduena na biechina ca a te.

14 I uvnu hne sieta zaw, pakhakha ta zangna na i hnyi ta sala tuena ta a paluo sa li kie khaapama a thlahne aa? Capa a zangna cata ama kha a khuo khu'a ma? 15 Na uvnu a cuo li kie na sieta kha caw a tue riy hnyi li pata hne ningting ning riypa sa zaw hnyi li pata aw sala, 16 niema hrawlie pakhakha ta, "Diena hneta cakuo tie ung; a lungsa pata aw ungla riybisa pata ning tie ung," nama ta pata amaa hupa kha nama pi tlung li kieca khaapama a thlahne aa? 17 Tuena a hnyi lipa zangna ca a thiypa tana a cuo.

18 Cuorasala chekha ta, "Nama ta zangna hnyi cate kama ta tuena i hnyi," ama ta aa. Tuena a te lipa na zangna ca na pahmung la, kama ta i zangna kha i tuena ta ica pahmung aa. 19 Khazing ca pakha tana a cuo tapa kha na zang; a phasa. Khuevuo tahmuo zang te aa cathang. 20 Ruena a hnyi lipa zaw, tuena a hnyi lipa zangna ca a thlahnenapa aw vyi tapa kha ica pahmung sa'a yi ma? 21 Ma mingpa Abraham ca a saacapaapa Isak kha hriykhungrina ta bienatluophie lie a pi tiy tana a tuena thueta duopacupa a cuo cuo vama? 22 Zangna ca a tuena hneta rehrie te tuena ta zangna kha tluo a patling sa tapa kha nama pachang. 23 Cakhutaa Caapathepa ta, "Abraham ta Khazing kha zang te ca a zangna thue cata aa dangpa ta cuhluopa a cuo," a tapa kha a tling. Cacuonakawta ama ca Khazing viesaapa tapata a cuo. 24 Cawsaa pakha ca a zangna dyi ta cuo li pata a tuena thueta duopacupa a cuo tapa kha nama pachang. 25 Cahaa cata, siyhrawnung Rahab zaw kha biephyatuv tie kha ing a patlung sa yite luo hrang taata dya a pathlienapa yi tuena thue khatana duopacupa a cuo cuo vama? 26 Tahematapakieca pangpa ca thlaapa li pata ca a thiy pahaata, zangna zaw tuena li pata ca a thiy ra.