5
Zingsuv ca Khrihnote 5:1 Or Messiah ta a cuo tapa a zangpa bangkhuo ca Khazing saata ta cuo yite, nungpaa a duepa bangkhuo ta saata kha ama due ra. Khazing saata zaw ma duepa yi maa pachangna ca Khazing kha due pate a nawbie ma ziypa hingta a cuo. Khazing na ma due ma tapa ca a nawbie ma ziypa hingta a cuo. Cakhutaa a nawbie ziypa ca ma cuota hmangriypa cuo vyi. Tahematapakieca Khazing'a taata a puvpa bangkhuo taca chuelyi kha ama te. Ahungma chuelyi hing a te? Zingsuv ca Khazing Saacapaa tana a cuo tapata a zangpa na a te cuo vama?
Tiy hne thiy ta a vawpa ca Zingsuv Khrih tana a cuo, tiy hne dyi ta cuo li pata tiy hne thiy hneta a cuo. Thlaapa ca tehtekhuotuv ta cuote, biehmisipa Thlaapa zaw ta a cuo. Tehtekhuotuv suothung ama aw: Thlaapa hne tiy hne thiy ta cuo yite aa lu pata tehte ama khuo. Kiema ta cawsaa tehtekhuona kha ma cuhluo kieca Khazing tehtekhuona ca capa laa cata a le vie, tahematapakieca Khazing ta a Saacapaa kaw tehte a khuopa tana a cuo. 10 Khazing Saacapaa a zangpa tie ta ama palung chunglie tehte khuo riypa ama hnyi. Khazingnote 5:10 Hluo vie caa-uv lieca Khazing Saacapaa* a ta. a zang lipa ca Khazing ta a Saacapaa kawlie tehte a khuopa kha a zang li nakawta Khazing kha a hangpa ta a tue. 11 Capa tehtekhuona ca: Khazing ta chuozaa hringna malie pi te, capa hringna ca a Saacapaa chunglie a awpa ta a cuo. 12 Saacapaa a hnyipa ca hringna kha a hnyi. Khazing Saacapaa a hnyi lipa ca hringna kha hnyi vyi.
13 Khazing Saacapaa ming a zangpa tie ta chuozaa hringna nama hnyipa kha namaa pachangna riypata hingpa caa hing niema'a luo i vya cape.
14 Ama khingna hne aa ziy pata maa hie kieca ama ta malie a thyi tapata ama chunglie riephana ma hnyi. 15 Cakhutaata khaapa maa hie zaw malie a thyi tapa kha ma pachang kieca ama'a taata maa hiepa bangkhuo kha ma hmung tli tapata ma pachang. 16 Na uvnu a cuo li kie na sieta ta thiyna a phakhyi lipa suena a tuepa kha na hmung kieca Khazing'a luo kha thlaa chuopa la thiyna a phakhyipa suena a tue lipa cahaapa cawsaa ca Khazing ta hringna a pi aa. Thiyna a phakhyipa suena a aw; capa kawlie cata thlaa nama chuo aa i tapata cuo vyi. 17 Hmang tuesuepa bangkhuo hing suena ta a cuo, cuorasala thiyna a phakhyi lipa suena a aw.
18 Khazing'a taata a puvpa ca suena tuepazue vyi tapa kha ma pachang. Khazing saacapaa ta ama kha a daakhuo nakawta a pha lipapaa ta taw khu vyi. 19 Khazing saata ma cuopa hne chuelyi hing a pha lipapaa cahrana rawlie a awpa kha ma pachang. 20 Cakhutaata Khazing Saacapaa kha a vaw te a hmisipa ama ma pachang na riypa hne a hmisipa a Saacapaa Zingsuv Khrih chunglie ma awpa kha ma pachang na riypata nangvuona malie a pipa kha ma pachang. Ama ca a hmisipa Khazing hne chuozaa hringna ta a cuo. 21 I saata zaw, kuvtuezuv kha cahriy tie ung.note 5:21 Hluo vie caa-uv lieca Amen* a bechiypuo kalie.