4
1 Duepa zaw, Thlaapa bangkhuo kha zang kha ung; cuorasala Khazing'a taata a vawpa thlaapa a cuo ma cuo vama tapa kha dyapasya tie ung; tahematapakieca profetpakhipa a hluvpuv kha hing chuelyi luo hing amaa ngie mangtli.
2 Hinghaahingta Khazing Thlaapa kha nama pachang aa: Zingsuv Khrih ca saapa cuona tana a vaw a tapa thlaapa bangkhuo ca Khazing'a taata a vawpa thlaapa cuote,
3 cahaa cata a ta lipa thlaapa bangkhuo ca Khazing'a taata a vawpa thlaapa cuo vyi. Khrih a dupa thlaapa tana ama cuo. Capa thlaapa ca a vaw nguoluo tli tapa kha thyi tli ung cate, ata hing hing chuelyi lie a aw tli.
4 I saata zaw, niema ca Khazing'a taata cuo ung cate iema kha nama te mangtli; tahematapakieca niema chunglie a awpa ca chuelyi lie a awpa laata a le vie.
5 Iema ca chuelyi taata ama cuo; cacuonakawta ama ripa ca chuelyi bie ta cuote, chuelyi ta iema bie kha amaa ngie.
6 Kiema ca Khazing'a taatana ma cuo. Khazing a pachangpa bangkhuo ta ma bie kha a ngie yite, Khazing'a taata a cuo lipa bangkhuo ca ma bie kha a ngie vayi. Capa taacata a hmisipa thlaapa hne a pakhipa thlaapa kha ma pachang.
7 Duepa zaw, pakha hne pakha a due ungsiy, tahematapakieca Khazing ca duena tana a cuo; duena a hnyipa bangkhuo ca Khazing'a taata cuo yite Khazing kha ama pachang.
8 Duena a hnyi lipa ca Khazing kha pachang vyi, tahematapakieca Khazing ca duena tana a cuo.
9 Saacapaa thueta ma hring thena riypata Khazing ca a Saacapaa pakha dyipa kha chuelyi luo a za pathlie; cahaa cata Khazing duena ca kiema'a luo kha a zaa phu.
10 Hingpa hing na duena ta a cuo: duena ma tapa ca kiema ta Khazing ma duepa kha cuo li pata, ama ta kiema kha malie due te ma sue hriykhung a rina cuota a Saacapaa a za pathliepa hingta a cuo.
11 Duepa zaw, Khazing ta kiema hing malie a duetuv hringhruo nakawta, kiema zaw pakha hne pakha maa due riypatana a cuo.
12 Ahungtahmuo Khazing kha hmung buo vyi; pakha hne pakha maa due kieca Khazing kha kiema chunglie aw te, a duena kha kiema chunglie aa ky.
13 Khazing ta a Thlaapa kha malie a pi nakawta, kiema ca ama chunglie aw pate ama zaw kiema chunglie a awpa kha ma pachang.
14 Paa ta a Saacapaa kha chuelyi Khuotuv ta a za pathliepa kha hmung pate tehte ma khuo.
15 Zingsuv ca Khazing Saacapaa tana a cuo a tapa tie chunglie Khazing aw te, iema zaw Khazing chunglie ama aw.
16 Cacuonakawta Khazing ta kiema'a lie a hnyipa duena kha pachang pate ma zang.
Khazing ca duena tana a cuo, duena chunglie a awpa ca Khazing chunglie a awpa cuo yite, Khazing zaw iema chunglie a aw.
17 Hing chuelyi lie hing Khrih haata ma hring nakawta bierinapa ning thueta ma rie a phana riypata duena ca kiema chunglie hinghaahingta a tling.
18 Duena chunglie ca ciyna aw vyi, cuorasala a tlingpa duena ta ca ciyna kha a papya diy. Tahematapakieca ciyna ca duotena hneta aa patuv nakawta, ciyna a hnyipa taca a tlingpa duena luo kha chiy khu vyi.
19 Khazing ta kiema kha malie a due taa nakawta kiema zaw ta ma due.
20 Khazing na i due a ta raalaa pata a uvnu hne a sietanote 4:20 Gk Uvnu kha a huepa ca a hangpa tana a cuo; ming ta hmungpa a uvnu hne a sieta hmuo a due li kieca ming ta hmung lipa Khazing ca due khu the'a vyi.
21 Ama'a taata ma hmungpa nawbie ca hingpa hing tana a cuo: Khazing a duepa taca a uvnu hne a sieta zaw kha a due ra'a yi.