JOHAN
Johan Caapaphya Suokhana
Johan caapaphya suokhana hingta a tingpa suohning a hnyi. Suokhana ca Khazing hne a Saacapaa Zingsuv Khrih hneta a viesaana hnyi pata hring riypa, hne Suohningna ca capa a viesaana a para thepa pacuvna aa hmuo lipa kha a raaring riypata a ri. Capa pacuvna a hmuo lipa cata "hing chuelyi hne a patuvpa hmang bangkhuo hing ca suena ta cuote, cacuonakawta Khazing saacapaa ta a cuopa Zingsuv ca cawsaa cuona hnyi the'a vyi" tapa zangna lie a hruo a bangpa ta a cuo. Capa pacuvtuv aa hmuo lipa tie cata khuona hmung riypa taca hingpa chuelyi hringna hne hingta maa che a hu te, khuona hmung riypa hing zyazaa pha hnyina hne malie duena zaw hneta a patuvnapa aw vyi ama ta.
Pacuvtuv aa hmuo lipa tie pacuvna aa hmuo lina zya paluosa riypata hing caa a capetuv hingta Zingsuv Khrih ca cawsaa ta cuo hmisi te Zingsuv zang te Khazing a duepa bangkhuo taca pakha hne pakha amaa due ra riypa kha khuopuv ta a ri.
1
1 Hringna bie hne aa patuv pata hluo ning taata zaa aw ciepa, ma za thyi ciepa, ma ming ta ma za hmung ciepa, ma za mang ciepa hne ma kuv ta ma za hrie ciepa kha niema'a luo maca pathyi sa yi.
2 Capa hringna ca paluohuopa a cuo tiyta, hmung pate a kaw kha tehte ma khuo. Kiema'a luo phu pata cuote Paa hneta a awpa capa chuozaa hringna kaw ca niema'a luo maca pathyi sa yi.
3 Kiema hne a viesaana hnyi ra naase ungciy tapata ma hmungpa hne pathyipa kha niema'a luo maca pathyi sa yi. Kiema maa viesaanapa hing Paa hne cuose, Saacapaa Zingsuv Khrih hne cuose a viesaa hmisina tana a cuo.
4 Maanote 1:4 Hluo vie caa-uv lieca namaa lawna* a ta. lawna a ky riypatana hing caa hing niema'a luo ma vya cape pata a cuo.
5 Saacapaa'a taata thyi pate niema'a luo ma phupa bie ca, Khazing ca khena cuote ama chunglie ca zingna aw vyi, tapata a cuo.
6 Ama hnetana maa viesaa ma ta pata zingna chunglie ma aw thluo kieca a hanghiepa cuo pate biehmisipa lie hring va puv.
7 Cuorasala ama ca khena chunglie a aw pahaata khena lie ma aw kieca pakha hne pakha a viesaa'a pate Saacapaa Zingsuv thiyse ta ma suena bangkhuo taata malie a pasiy aa.
8 Kiema ta suena hnyi va puv ma ta kieca, kiema hne kiema a dungpa tana ma cuo. Ma chunglie biehmisipa aw vyi.
9 Ma suena kha ma phu kieca zangtluo aa tlapa hne a dangpa ama ta ma suena kha malie a ngiethe'a te, a pha lipa bangkhuo taata malie a pathe sa aa.
10 Kiema ta sue va puv maa ta kieca, ama kha a hangpa a pacuo sapa cuo pate, a bie ca kiema chunglie aw vyi.