11
1 Zangna ma tapa ca maa ruechuopa kha ma hmung hrahring aa tapata zangna hne, hmisi ta a awpa hne a cuopa hmang, ma ming ta ma hmung lipa hmang a aw, tapata zangnapa khatana a cuo.
2 Cahaapa zangna ama za hnyi nakawtana ma mingchingmingvuo tie zaw ta Khazing palung kha ama za hmung.
3 Chuelyi hing Khazing bie tana sapa a cuo tapa kha zangna ta ma pachang. Cacuonakawta hmung khupa hmang hing hmung khu lipa hmang taata tuepa a cuopa kha aa luo.
4 Abel ta Kain laata cuhluo tluo a tla viepanote 11:4 Gk A le viepa hriykhungrina a pipa ca zangna thue tana a cuo. Capa zangna thue cata cawsaa aa dangpa ta cuhluopa cuote, Khazing hrahring ta a lasaw kha a cuhluo. Ama ca a thiy tli, cuorasala a zangna cata ata tepa hingta bie a ri kalie.
5 Enok ca zangna thueta thiyna a taw li pata lathawpa a cuo; Khazing ta a la nakawta ahungtahmuo hmung khu va tli yi. Tahematapakieca ama ca lapa a cuo hluo ta Khazing palung a hmungpa a cuo.
6 Zangna li pata ca Khazing palung patluo khupa cuo vyi. Ama'a luo a pangiepa bangkhuo ta, Khazing a aw tapa hne ama a huvpa kha lawmuo a pi yi, tapa kha ama zang riypata a cuo.
7 Noah ca Khazing ta hmung li liepa kaw a raaringna a pipa kha zang te a ingchungkhue khuo riypata tiypalaw a sa. Capa a zangna cata chuelyi kha sue phaw te ama ca zangna taata a vawpa adangna rucutuv ta aa li.
8 Abraham ca ru ta a cu riypa ruo luo kha kupa a cuo tiyta, khaapa luo ma i si aa tapa pachang li pata ri a ngie te zangna ta a si.
9 Khazing ta bie a kuopa ruo lie kha ruohrang ming haata cuokha chung zangna ta khy a sa. Biekuona suokha kha ru a cu pakhawpa Isak hne Jakob hne khata thluodaa chunglie kha khy ama sa.
10 Tahematapakieca Khazing ta patungpatie te a hruo a bangpa khypuv khana a nguopuona hne a huo.
11 Abraham ca macuosa tli te, Sarah zaw saa a sa khu lipa a cuo raalaa pata, zangna thueta paa cuo khuna cahrana kha a hmung. Tahematapakieca biekuona a pituv kha zangtluo a tla tapata a zang nakawtana a cuo.
12 Athiypa haata a cuo tli raalaa pata, capa cawsaa pakha chung taacata, a samingsahlaa zaw ca puv yite, avuo lie aasiy zaa hne riyliy kielie ri tie lipa viehnang zaa ama ta.
13 Hingpa cawsaa bangkhuo hing Khazing ta bie a kuopa yi kha hmung li pata zangna chunglie ama thiy. Cuorasala luohlaa taata suo yite bie amaa chang paluo. Chuelyi lie hing khychepa hne ruohrang ming tana ma cuo ama ta.
14 Tahematapakieca hinghaahingta a ripa cawsaa zaw hingta iema huo a cuopa ruo na ama huv tapa kha ama paluo sa.
15 Iema ca ama thuse tlipa ruo khana ngie amaa buo pakhaa tapa cuo sala, kaa pakhaa riypa cuophaa ama za hnyi ri aa.
16 Cuorasala iema ta ama vuopa ruo ca ruo pha viepa, vuoruo tana a cuo. Cacuonakawta Khazing ca iema Khazing tapata ama u pakha a nang zaa vyi. Tahematapakieca khypuv kha iema cuota a parepa mangtli yi.
17 Abraham ta dyapasyana a ang ningta a saacapaapa Isak hriykhungrina ta a pipa ca zangna thue tana a cuo. Biekuona zaa hmungpapaa ca a saacapaa pakha dyipa kha hriykhungrina ta pi riypa a ting pacie diy tli.
18 "Samingsahlaa na hnyi riypa ca Isak ciypathla taahing tana ama cuo aa," tapata biekuopa tana a za cuo.
19 Khazing ca a thiypa zaw kha a pathu pakhaa khu tapata a zang. A ripa haata Isak ca thiyna taatana a vya thupakhaa ta riypatana a cuo hmisi.
20 Isak ta Jakob hne Esau kha hmie luo cuota thluechiy a pipa yi ca zangna thue tana a cuo.
21 Jakob ta a thiy'a nang cawta Josef saacapaa zaw thluechiy a pipa yi ca zangna thue tana a cuo; a khuecahryi daw kha a padu te Khazing kha abie.
22 Josef ta, a thiy'a nang cawta Israel ming Izipt ruo taata ama law riypa a ripa hne a thiy tiyta a riy kha tuokhaatama nama za tue aa tapata a ri siypa ca zangna thue tana a cuo.
23 A za puv khu taata thlathung a tana te ta a nungpaa zaw ta Moses ama nupa kha zangna thue tana a cuo. Tahematapakieca haatiy thyikhing aa chiysapa kha ama hmung tiyta siepahruo bie khahmuo ciy khu vayi.
24 Moses ca a kya lethaw tiyta Faro sacanungnung saacapaa tapata kupa a khing lipa kha zangna thue tana a cuo.
25 Suena chunglie cuo pachangta chung anuona laata Khazing cawsaa zaw hneta ruvnaana ang kha a tlaw viepa ca zangna thue tana a cuo.
26 Izipt ruo hnyirungna laata Khrihnote 11:26 Or Messiah cuota nutaana angpa ca a sungnaa vie karaa tapata a rue. Tahematapakieca lawmuo a hmung riypa khana a pachang lu.
27 Siepahruo hihaana khahmuo ciy li pata Izipt ruo taata pya te, palung pasiysa pata a ang lawpa ca zangna thue tana a cuo. Tahematapakieca hmung khu lipa Khazing khana a hmung lu.
28 Sa-uvthyi zaw a thiepa ta Israel ming sa-uvthyi zaw kha a thie li riypa yita Lawsena pyi tue te ingchiypakaa tung lie thiy a pathuv sapa yi kha zangna thue tana a cuo.
29 Israel ming ta Riyliy Sepa kha alyi huvpa haata ama tepa ca zangna thue tana a cuo; cuorasala Izipt ming ta te amaa zue tiyta tiy lie ama puo diy.
30 Ning sariy ama cahlung khu taata Jeriko khypuv dungkhuo a cingpa ca zangna thue tana a cuo.
31 Rie vaa mangpathliypa Israel ming kha dya a nu nakaw yi ta Khazing ri a ngie lipanote 11:31 Or A zang lipa tie hneta siyhrawnung Rahab a thiy ra lipa kha zangna thue tana a cuo.
32 I ri vie kalie'a ma? Gideon, Barak, Samson, Jefthah, David, Samuel hne profet tie zaw kaw ri riypa kha a cuo ta naa zu'a vyi.
33 Zangna ta pena hluvpuv kha ama te, a dangsa pata ruo ama uv, Khazing ta bie a kuopa yi kha ama hmung, chingde pakaa kha ama paping,
34 aa hlaa nguoluopa myi kha ama pache, zueziy taata ama law, thaadyana taata thaazuo ama hmung, rietuvna lie kha cahra yite ruohrang rieka tie kha ama te.
35 Canung zaw ta ama cawsaa a thiypa tie kha pathu pakhaapa ama cuopa ta ama hmung. Chekha ta a pha viepa hringna luo thupakhaa riypata lawna kha hmung khing lipa yi ta tuechiena ama ang.
36 Chekha ta pahnyisuena hne tuvna kha ang yite, thaabuoliriy ta ciypakina hne thawtlana zaw kha ama ang.
37 Chekha ca alung ta vaasa yite, chekha ca hluo ta ama tepachung. Chekha ca zueziy ta thie yite, chekha ca tuv vang zaw mie vang zaw kha pahryi yite siypasa pata ama aw, riethyi vuosuo pata aw yite hrisaathieruena ama ang.
38 Chuelyi hing iema hneta a phuv vyi. Iema ca ruocaa lie hne tluo lie kha a khiele yite, lungkaraw hne alyikhue lie kha ama aw.
39 Iema bangkhuo hing ama zangna kawlieta pathuosapa ama cuo raalaa pata Khazing biekuopa hmang kha hmung vayi.
40 Khazing ta kiema cuota a pha viepa hmang kha malie a tingpa nakawta kiema hne lipa taca tluotlingna hmung'a vayi.