10
Phungbie ca a vaw riypa hmangphapa a mingthlaapa dyi ta cuote, a hmisipa hmingsuo a cuo li nakawta kung tating, a pazue pata tuepa, aa lupa hriykhungrina khata ama'a luo a vaapa tie kha tluotlingna pi khu vayi. Cata cuo li pata luokha dyi hriykhung amaa ripa khata za pathe yi sala, suena na ma hnyi tapa kha rue'a va tli laa yite, hriykhungrina kha tue'a va tli yi cuo vama? Cuorasala hingpa hriykhung a rina hingca ama suena kha kung tating ta a pathyi sa pakhaapa tana a cuo. Tahematapakieca cuetungpa thiy hne mie thiy zaw taca suena kha pathe sa khu vyi. Cacuonakawta Khrih chuelyi luo aa zuv ningta a ripa ca:
"Hriykhungrina hne
pipa zaw kha khing vaciy,
cuorasala kama cuota
pangpasaa kha ina tingtuopa tli ciy;
Myi ta rue pata pipa hne
sue pathena cuota pipa cunglie kha,
na palung tluo vyi.
Cakhutaa, Caapathepa chunglie
i kaw aa capepa haata,
Vya Khazing, kama ca
na khingna tue riypata i vaw tli.
Ama ta, "Nama ca hriykhungrina hne pipa hne myi ta rue pata pipa hne sue pathena cuota ca khing lipa cata na palung tling vyi," a ta tiyta phungbie lie a ripa haata pipa kaw khana a ri pata a cuo. Cakhutaacata, "Kama ca na khingna tue riypata i vaw tli," a ta kalie. Khazing ta suohningnapa kha pacu sa riypata suokhana kha a para. 10 Zingsuv Khrih ta Khazing khingna haata luokha ta chuozaa cuo a de riypata a pangpa ta hriykhungrina a tuepa thueta kiema bangkhuo ca pathesapa ma cuo.
11 Tluobyi tie ca ningting ta ama re kha hrie yite suena a pathe sa khu lipa hriykhungrina kha ama tue pakhaa byalya. 12 Cuorasala Khrih ca suena cuota yikha ta chuozaa cuo a depa hriykhungrina a tue khu taata, Khazing cacuo luo khata a tu te, 13 a carie tie kha a phyichaana ta tuepa ama cuo hluo li a huo. 14 Tahematapakieca luokha hriykhungrina ta suena taata a pathepa tie ca chuozaa ta tluotlingna a pi yi. 15 Thlaapa Pathe ta kiema'a lie tehte a khuopa ca,
16 "Abyipa ta, capa ningkhue khu taata,
iema hne i tue riypa biekuona ca,
hingpa hing tana a cuo, a ta.
I phungbie kha ama palung chunglie
chi'a ang te,
ama pachangna chunglie ta i cape aa," a ta.
17 A ri kaliepa ca,
"Ama suena hne ama pha lina kha
a thyipa'a va tli yi ang," a ta.
18 Sue a ngiethena a awna hmang lieca sue pathena cuota hriykhungrina a hu va tli.
19 Cacuonakawta, viesaa zaw,note 10:19 Gk Uvnu zaw Zingsuv thiyse thueta hmangpathepa luo a ngie riypa kha a cusa pata zangna ma hnyi. 20 Capa a thiyse ca Abyipa ta a pangpa ta a cuopa pangzu kha thlaa pata kiema cuota a pahawpa hringna luopuv thaapa tana a cuo. 21 Cakhutaata vuoruo lie Khazing ing uvtuv tluobyilepa ma hnyi. 22 Pathiypalung hmisi hne zangnguona ta Khazing kha a ngie'a ungpuv. Ruena pha lipa taata pathe sapa pathiypalung hne tiypathepa ta pasiypa pangpa ta ama kha a ngie ungsiy. 23 Bie malie a kuotuv Khazing ca zangtluo aa tlapa a cuo nakawta maa ruechuopa ca a cusa pata a patuv ungsiy. 24 Cakhutaata a due riypa hne hmangpha tue riypa kha pakha hne pakha tuokhaatama maa pasu aa tapa kha rue ungsiy. 25 Chekha ta nama tue tawpa haata, hmangkha ta namaa pung pakhawpa kha pathli kha ung. Nama pachangna haata, Abyipa Ning kha a ngie hryly nakawta pakha hne pakha kha thaazuo a pi tie ung.
26 Tahematapakieca biehmisipa kha ma pachang thluo tli pata ngie a rawsa pata ma sue pari thluo kieca suepathena riypata hriykhungrina aw the'a va tli. 27 Cuorasala bieripana hne a dutuv tie a kuo diy riypa hihaana myi dyi khana ciyna hne huo riypa a cuo'a tli. 28 Moses phungbie a patluopa bangkhuo ca pachangkhyituv pahning a cuo li kie pathung ta tehte ama khuo kieca nangduena aw li pata thiepa ama cuo. 29 Cacuokie, Khazing Saacapaa kha ciyzaana aw li pata a thawpa, iema suena taata a pathesapa biekuona thiyse kha siysaa a ri lipa hne vihnyina Thlaapa kha a esepa ca khatluv ta a ruv viepa duotena na ama ang aa tapata ma nama rue? 30 "Phuvlana ca kama huopa tana a cuo, kama na a thung'a yi ang" a tapa hne, Abyipa na a cawsaa zaw kha bie a ripa'a yi," a tatuv kha ma pachang. 31 A hringpa Khazing kuv chung luo tla riypa ca ciy aa chiysa.
32 Cuorasala Khazing khena luo nama chiy khu taata te-angna chunglie a ruvsa pata nama za awna cuo, a hluo ta nama ningcuo kha rue pakhaa tie ung. 33 Luokhakha ca zaapuv hmielie kha esena hne hrisaathieruena za ang ung cate, cuokhakha ca khuopuv ta hrisaathieruepa tie kha nama te-ang khyi. 34 Tahematapakieca thaw chunglie a awpa tie kha kawpacuona hnyi ung cate, ama laa hingta a pha viepa hne a cu viepa nama hnyi tapa kha nama pachang nakawta, nama hnyipa chechiy aca chuv diy zaw yi ta palungtluosa pata nama pi. 35 Cacuonakawta nama zangnguona kha thuse kha ung; lawmuo lepuv na aca phya'a yi. 36 Khazing khingna kha tue pata a biekuona nama cu the riypata palung pasiysa pata aw tie ung. 37 Tahematapakieca Caapathepa ta,
"A ru hluo ta lieta,
a vaw riypapaa ca aa vaw aa;
ru'a vyi.
38 Cuorasala i cawsaa aa dangpapaa ca
zangna hneta hring'a te,
hnang luo a palipa bangkhuo cunglie ca,
i palung tluo'a vyi," a ta.
39 Cuorasala kiema ca hnang luo a palipa tie hne a viepa tie chunglie cuo li pata zangna hnyi te khuona a cupa tie tana ma cuo.