5
1 Uvnu hne sieta zaw,note 5:1 Gk Uvnu zaw a ning'a na a cuo hne a patuv pata niema'a luo caa cape a hu vyi.
2 Tahematapakieca Abyipa ca zuo ta a paruvpa aa vawpa haatana aa vaw aa tapa kha a phasa pata nama pachang.
3 Cawsaa ta, "hmangting bangkhuo a dieta hne abang-asu patana a aw," ama ta ning kha nu-aphyapa canung ta nu aa zi pahaata ama cunglie rana sungkha ta vya tlung'a te, ahunghmuo law'a vayi.
4 Cuorasala duepanote 5:4 Gk Uvnu zaw niema ca zingna chunglie nama aw li nakawta capa ningkhue cata a paruvpa a vawpa haata nama nang capa uo'a vayi.
5 Tahematapakieca niema ca khena saa hne ningchung saa ta cuo ung cate kiema zaw zingna, zuo saa ta cuo va puv.
6 Cacuonakawta kiema ca malie zaw amaa hmungpa haakhata a hmung li pata, a hra ung sala palungsingta tah aw ungsiy.
7 Tahematapakieca a hmungpa ca zuo ta a hmung te, a pariypa zaw zuo tana a pariy.
8 Cuorasala kiema ca ningchung saa ta ma cuo nakawta palung singta tah aw ung sala, zangna hne duena kha cacunghnaapakaw haakhata a hryi ung sala, khuona anguopuona ca thaalakhuv haakhata a khuv ungsiy.
9 Tahematapakieca Khazing ta kiema kha a hihaana ang riypata malie a tingpa cuo li pata, ima Byipaapa Zingsuv Khrih thueta khuona cu riypata lieriyuopuopa tana ma cuo.
10 Kiema ca maa hra zaw maa hmung zaw ama hne aw pakhaw riypata malie a thiykuopa tana ma cuo.
11 Cacuonakawta ata nama tue nguoluopa haahingta pakha hne pakha kha thaazuo a pi ungla a sathaw tie ung.
12 Uvnu hne sieta zaw, paa maca kie yi: niema hrawlie rehrietuv tie hne Abyipa'a lie niema luochiytuv tie hne caa pasiypa-yatuv tie kha pa-uvsathyi tie ung.
13 Ama hriepa re thue khata hmiezaana a suocepa pi ungla due tie ung. Nama hrawlie diena aw mangsue.
14 Duepa zaw, a thaathuvpa tie kha pasiypa-ya ungla, a palungcawpa tie kha thaazuo pi tie ung. A thaadyapa tie kha thaazuo pi ungla ama bangkhuo cunglie kha nama palung pasiy se tapata paa maca kie yi.
15 Pakha hmuo a chiepa ta vieriy namaa thung li riypa hne pakha hne pakha cunglie hne nama bangkhuo cunglie hmangphapa nama hrie khu pari riypa kha a zue tie ung.
16 Nama palung tluo pari se,
17 ci li ta thlaa chuo ungla,
18 khaapa hmang namaa taw zaw alawna bie hluo tie ung; tahematapakieca Khazing ta Khrih Zingsuv chunglie hinghaahingta nama aw riypata acaa khingkhyipa yi tana a cuo.
19 Thlaapa kha pache kha ung.
20 Profet tie bie kha siysaa ri li pata aw kha ung.
21 Cuorasala hmangting kha dyapasya ungla, a phapa kha a patuv ungla
22 a pha lipa bangkhuo kha cahriy tie ung.
23 Diena Khazing ama hrahring ta ca pathesa karuv yi sala, ima Byipaapa Zingsuv Khrih aa vaw thueta, nama thlaapa, nama pathiypalung hne nama pangpa kha syi riy a aw lipa hne tluotlingsa pata ca sang yi se.
24 Niema caa kupapaa yi ca zangtluo aa tlapa a cuo nakawta capaca a tue aa.
25 Duepa zaw, thlaa malie chuopa tie ung.
26 Uvnu hne sieta zaw bangkhuo kha a pathepa a pahnuona ta bie a chang tie ung.
27 Hingpa caa hing iema bangkhuo hmielie ri riypata Abyipa ming ta naw ica pi yi.
28 Ima Byipaapa Zingsuv Khrih vihnyina ca niema'a lie aw mangsue.note 5:28 Hluo vie caa-uv lieca Amen* a bechiypuo kalie.