6
1 Uvnu zaw, cawsaa pakha ta suena a tuepa kha nama hmung kieca niema Thlaapa a tingpa tie ta ama kha nangnena hneta luodangpa luo a chiy tie ung. Pasupaliyna luo nama chiy li riypa zaw a raaring tie ung.
2 Pakha hne pakha hmangriy a phyakhyi ungla cahaa cata Khrih phungbie kha patling sa tie ung.
3 Khaahmuo cuo tlung li pata cawsaa ciemuopa ta a ruepa tie ca iema hne iema a dungpa tana ama cuo.
4 Cawsaa bangkhuo iema'a na ama tuehriepa kha a mangpasie yi se. Malie tuehriepa hne pakhingpuo a hu li pata niemata tah nama palung a tluo aa.
5 Tahematapakieca cawsaa bangkhuo ta kiema hmang cyicuo kha phya riypatana a cuo.
6 Khazing bie pacuv pata a cuopa tie ca hmangpha ama cupa bangkhuo kha pacuvtuv hneta amaa hraw riypatana a cuo.
7 Ahungtahmuo ca dung kha yi se; Khazing ca dung khu riypa cuo vyi, na vaapa haa khatana na pahriy aa.
8 Na saapa cuona pata na vaa kieca, saapa taata rana kha pahriy'a cate, cuorasala, Thlaapa ta na vaa kieca, Thlaapa taata a vawpa chuozaa hringna kha na pahriy aa.
9 Hmangpha tue riypa kha thaachi li pata aw ungsiy. Taw li ta maa zue kieca a cuo aa de tiyta thyipaa kha ma pahriy aa.
10 Cakhutaata, cuophaa ma hnyi tiy mekaa ta cawsaa bangkhuo cuota hmangpha tue kha a zue ung sala, a hlyi vie ta zangna luota ma chungkhuekha tie cuota a zue ungsiy.
11 I kuv hrahring ta caasuo pang-katupa ta i capepa caa hing mang tie ung.
12 Saapa lie mingphana a hmung khingpa tie ta niema kha vangdaw a te riypata aca pasu yi. Capaca Khrih vieluotaana kawlieta hrisaathieruena ama ang li riypata ama tuepa tana a cuo.
13 Vangdaw a tepa tie tahmuo phungbie kha ziy vayi, cuorasala niema kha vangdaw aca pate sa khingpa yi ca nama saapa phung ziyna kawlieta amaa pale khing nakawtana a cuo.
14 Kama ca ima Byipaapa Zingsuv Khrih vieluo kaw ri li pata khaapa kawlie hmuota a pale'a va ang, Khrih vieluo thue hingta chuelyi ca i cuota vieluo lie khepuopa cuo tli te, kama zaw chuelyi cuota vieluo lie khepuopa i cuo tli.
15 Tahematapakiecanote 6:15 Hluo vie caa-uv lieca Khrih Zingsuv chunglie* tapa a bechiy kalie. vangdaw tepa hne te lipa hing a biepuvpa ta cuo vyi, sathaapa cuona hingna a biepuvpa ta a cuo.
16 Hingpa phung a ziypa tie cunglie hne Khazing cawsaa zaw cunglie diena hne nangduena aw mangsue.
17 Ata taahingta pathu pata ahungtahmuo riethyi na pi kha tli se; tahematapakieca Zingsuv hmaa hne hmaadaa kha i pangpa cunglie caakhepuopa ta a cuo.
18 Uvnu hne sieta zaw,note 6:18 Gk Uvnu zaw Abyipa Zingsuv Khrih vihnyina ca nama palung chunglie aw mangsue. Amen.