5
1 Khrih ta hya malie a pazang sa nakawta hya a zangpa tana ma cuo. Cacuonakawta, a cu pata a daa ungla sii taca a li pakhaa kha ung.
2 Naathlie tie ung! Kama Paul na caa chang yi ang. Vangdaw kha namaa te kieca Khrih ca nama cuota thlahnena khaahmuo hnyi'a vyi.
3 Ica chang pakhaa yi, vangdaw a tepa taca phungbie kha a bangkhuo ta a ziy riypa a cuo.
4 Phungbie ta duopacuna hmung a khingpa ca niema hne niema kha Khrih'a taata a chepa tana nama cuo; Khazing vihnyina khungthing luo a awpa tana nama cuo.
5 Tahematapakieca, kiema ca Thlaapa thue tana zangna ta adangna kha ma hmung aa tapata a nguopuo pate a ngietie li pata ma huo.
6 Tahematapakieca, Khrih Zingsuv chunglie a hringpa tie cuota ca vangdawtena cuose, vangdawtelina cuose khaapahmuo thlahne vyi; a thlahnepa suokha ca duena ta re a hriepa zangna suokha kyalya khana a thlahne.
7 Nama si zya a za phasa thluo. Biehmisipa ziy kha ahungma caa thlu yi?
8 Cahaapa dungna ca caa kutuvpa yi Khazing'a taata ca cuo vyi.
9 Thiynung a cawta tah viedie nawkha bangkhuo kha a pathu sa.
10 Ruena hrang hnyi'a va ungciy tapata ica zang yi. Cuorasala ahung a cuo zaw nama palung caa paluolue sapa yi hing ca a suena muo a hmung aa.
11 Cuorasala, uvnu zaw, vangdaw te hing a hu thluo tapata i ri kalie kieca, khaapanakawma hrisaathieruena ca i ang pari thluo? Hinghaahingtana i za ri tapata a cuo kieca vieluo kaw i ripa hing cawsaa aliena ta cuo'a vyi.
12 Caa patawpahriepa tie hing ama tiy a lu lalue yi sala a pha'apa kha!
13 Uvnu hne sieta zaw,note 5:13 Gk Uvnu zaw niema ca hya a zangpa cuo riypatana kupa nama cuo. Capa nama hyazangna ca saapa khingtlingna cuo dyi ta hmuo kha ung. Cuorasala pakha hne pakha kha duena ta a mangsang tie ung.
14 Tahematapakieca phungbie bangkhuo ca, "Nama naa duepa haata na ingpaa kha due ra tie," tapa phungbie suokha lie hingna a tling diy.
15 Cadyiseca, niema pakha hne pakha kha namaa hru namaa i kieca pakha hne pakha namaa parapakyi diy sue aa tapa kha a cadang tie ung.
16 Thlaapa ta hring ungla saapa khingna kha a lunghruo patlung kha ung.
17 Tahematapakieca saapa khingna ca Thlaapa khingna ta a du te, Thlaapa khingna zaw kha saapa khingna ta aa du. Iema hing amaa carie nakawta na khingpa kha tue khu vaciy.
18 Cuorasala Thlaapa ta acaa chiy kieca phungbie ta ca uv va tli.
19 Saapa khingna a tuepa tie ca amaa luotaalaa thluo: aparuvsuena, a pyalyipa zyazaa, zyazaa pha lipa,
20 kuvtuezuv biena, ca-iena, huena, ahru-a-ina, karuo-awna, hihaana, a-i-achuena, a chena,
21 hietliena,note 5:21 Hluo vie caa-uv lieca cawsaa thiena* tapa a bechiy.sahmyisahmaa pariyna, pariy cangta khi-una, hne cahaapa hmang zaw cata ama cuo. A raaringna ica za pi tlipa haayita, ica pi pakhaa yi: hinghaapa hmang a tuepa tie ca Khazing pena cu'a vayi.
22 Cuorasala, Thlaapa thyipaa tie ca, duena, palungtluona, diena, palungpasiyna, malie ngiechina, pahyana, zangtluo atlana,
23 nangnena hne kiema hne kiema a uv khuna zaw ta ama cuo. Hingpa hmang zaw hing a dupa phungbie aw vyi.
24 Cakhutaata Khrih Zingsuv huopa ta a cuopa taca a saapa hne saapa khingna bangkhuo kha vieluo lieta a thie tli.
25 Thlaapa ta ma hring kieca, Thlaapa ta luo malie a chiy se.
26 Ahruo tle kha ungsiy, pakha hne pakha azue-atie kha ungsiy, pakha hne pakha hie a tliena hnyi kha ungsiy.