3
1 Galati ming a ngaapa tie! Ahungma caa pamya yi? Zingsuv Khrih vieluo cunglie a thiynapa ca nama ming lie a siesa pata paluo sapa a cuo tli!
2 Niema'a taata i pachang khingpa suokha dyipa ca: Thlaapa hing phungbie ziyna thueta ma nama hmung a cuo li kie nama thyipa nama zang nakawta ma nama hmung?
3 Nama ngaa hringhruo de? Thlaapa ta patha ung cate ma saapa ta nama pachuo sa'a nang?
4 Hing hmang hingna a cakhawpa ta a cuo hmisi tapata a cuo kieca namaa tawpa hmang bangkhuo kha a cakhawpa tama a cuo aa?
5 Thlaapa ca pi yite kharuehaa hmang zaw nama hrawlie a tuepa Khazing hing phungbie nama ziyna thueta ma a tue a cuo li kie nama thyipa nama zangna thueta ma a tue?
6 Abraham ca Khazing kha zang te, ca a zangna ca a dangna ta cuhluopa pata a cuo.
7 Cacuonakawta a zangpa ca Abaraham samingsahlaa ta ama cuopa kha pachang tie ung.
8 Khazing ta Jentail ming kha zangna thueta adangna luo a papha sa'a yi tapa kha Caapathepa ta a hmunglu nakawta Abraham kha, "Jentail ming bangkhuo ca nama thue tana thluechiy ama hmung aa," a ta.
9 Cacuonakawta, a zangpa bangkhuo ca zangna paa Abraham hneta thluechiy pipa ama cuo.
10 Tahematapakieca phungbie ziyna a buchuopa bangkhuo ca chiesana rawliena ama aw. Caapathepa ta, "Phungbie caa-uv chunglie a capepa bangkhuo kha a ziy lipa bangkhuo ca chiesapa tana ama cuo," a ta.
11 Cacuonakawta ahunghmuota Khazing hmielie phungbie thueta duopacupa aw vayi; tahematapakieca, Caapathepa ta, "Zangna thueta adangna a hmungpa ca a hring aa," a ta.
12 Cuorasala phungbie ca zangna cunglie kha a pahnie vyi. Cadyi cuo li pata, "Phungbie kha a ziypa ca capa phungbie ziyna catana a hring aa," a ta.
13 Khrih ca kiema cuota chiesana ang te, kiema kha phungbie chiesana taata malie a khuo. Caapathepa ta, "Thingkung cunglie pathliepa bangkhuo ca chiesapa tana ama cuo," a ta.
14 Hingpa hmang ta a tingpa ca, Abraham thluechiy ca Khrih Zingsuv thueta Jentail ming'a luo a tlung riypa hne kiema ta zangna thueta Thlaapa ta biekuopa kha ma hmungna riy'apa tana a cuo.
15 Uvnu hne sieta zaw,note 3:15 Gk Uvnu zaw ningting maa tawpa taata pakhingpuona suokha ca pi'a yi ang. Cawsaa ta palung tlingsa pata tue yite ming ama thuv tlipa biekuona ca chachiy khu zaw aw li pata para khu zaw aw vyi.
16 Cahaa cata Khazing ta Abraham hne a samingsahlaa cunglie biekuona a tue. A hluvsapa tie'a luo ripa haata, "Na samingsahlaa zaw," ta li pata, "Na samingsahlaa," tapa dyi ta a cuo. Capaca cawsaa pakha, Khrih dyi khata a cuo.
17 I ri khingpa ca, kung zapaliy sawthung khu taata a vawpa phungbie ta a hluo baataata Khazing hne za tue ciepa biekuona kha para vyi, biekuona kha a cakhawpa ta pacuo sa vyi.
18 Tahematapakieca, rucuna ca phungbie taatana aa vaw tapata a cuo kieca, caca biekuona taata a vawpa cuo vyi; cuorasala Khazing taca Abraham kha biekuona tana rucuna kha a pi.
19 Cacuokie, phungbie aa tingna ca khaapatama a cuo? Biekuona ta a ri khingpa samingsahlaa aa vawhluo ta tuepa suena nakawta phungbie ca chachiy pata a cuo. Avuoming ta ca phungbie ca luosituv pakha'a taata pi pachaa pata a cuo.
20 Luosituv ca phuvkha laata a hluv vie na lie khana re a hrie pata a cuo; cuorasala Khazing ca pakha dyi ta a cuo.
21 Cacuokie phungbie hne Khazing biekuona ca aa capie ma? Cuo changchiy vyi! Tahematapakieca, cawsaa hing hringna a pikhutuv phungbie kha za pipa cuo yi sala, cawsaa hingta phungbie thueta Khazing duopacuna kha ama hmung diy aa.
22 Cuorasala Caapathepa ta, hmangting bangkhuo hing suena rawliena a aw ta te, caca a zangtuv tie kha Zingsuv Khrih zangna thue dyi ta biekuopa kha pipa ama cuo riypata a cuo.
23 Zangna a vaw hluo ta, kiema kha phungbie ta thaw malie pathla te, zangna aa luona cuo te khata malie a hrekhung.
24 Cacuonakawta kiema ca zangna ta duopacupa ma cuona riypata, phungbie ca Khrih aa zuvna te khata kiema malie a mangchiytuv ta a cuo.
25 Cuorasala zangna ca a vaw tli te, kiema ca mangchiytuv phungbie a hu va tli puv.
26 Tahematapakieca kiema bangkhuo ca Khrih Zingsuv zangna thueta Khazing saata ta ma cuo.
27 Khrih ming ta tiy a a nawpa bangkhuo ca Khrih kha namaa hryi tli.
28 Judah ming hne Krik ming, sii hne hya a zangpa, capaa hne canung, tapata pananangna aw va tli; nama bangkhuo ta Khrih Zingsuv chunglie pangkha tana nama cuo.
29 Cacuonakaw ta Khrih huopa nama cuo kieca, niema ca Abraham samingsahlaa cuo ung cate, biekuona haata rucutuv nama cuo.