1 Niema cuota cuose, Laodisia lie a awpa tie cuota cuose, i pangpa ta naa hmung lipa bangkhuo cuota khatluv tama i zue law tapa kha ica pachang sa khing yi. 2 Kama i tingpa ca iema ta Khazing bieparuv Zingsuv kha ama pachang khu the riypa hne pachangna hmisi taata a pyapa hnaanguona kha hnyi yi sala pathiypalung cahra sapa hne duena lieta pangkha a cuopa ama cuo riypa khatana a cuo. 3 Khrih ca Khazing singna hne pachangna a sungnaapa suethiy a nunapa tana a cuo. 4 Ahungtahmuo niema kha biephapa a lu raalaa pata a hmuo lipa bie a ina ta ca dung kha yi se. 5 I pangpa ta niema'a lie i aw li raalaa pata thlaapa ta niema'a lie i aw. Palung cahrasa pata hne Khrih zangna chunglie a cusa pata namaa daapa kha hmung ang te i palung a tluo.

6 Cacuonakawta Abyipa Khrih Zingsuv kha nama za cuhluo pahaata ama chunglie kha hring patlung tie ung. 7 Ama chunglie kha zangna ta hruo bang pata a sathaw tie ung. Aca za pacuv tlipa haa yi khata alawna bie kha hluo pari tie ung.

8 Khrih'a taata cuo li pata, cawsaapa phungluo hne hing chuelyi phung taata a cuopa muo a hnyi lipa ruena hmuo pata a ahungtahmuo sii ta ca tue kha yi se. 9 Tahematapakieca, Khazing cuona bangkhuo ca saapa hminghmie ta Khrih chunglie aw te, 10 niema zaw uvtuv bangkhuo hne nawhnyina bangkhuo luv ta a cuopa Khrih'a lie kha hringna tluotling nama hnyi. 11 Ama chunglie ngiethie ca thlaapa ta vangdaw a te ung cate saapa ta vangdawtena kha nama thaw. 12 Niema ca Khrih chunglie kha tiynawna ta pabypa nama cuo. Cahaa cata Khrih kha thiyna taata a pathu pakhaapa Khazing cahrana ta, zangna thueta Khrih hne pathu pakhaapa nama cuo aa. 13 Cakhutaa, niema ca nama suena hne saapa ta vangdaw namaa te lina chunglie kha a thiypa nama za cuo. Cuorasala Khazing ta nama suena bangkhuo kha caa ngiethe yite ama hne aca pahring yi. 14 Ma suenapa cazing ca a duotena phung bangkhuo hne khata vieluo cunglie khepuo te a hruv diy. 15 Ama ta uvtuv tie hne nawhnyina zaw kha vieluotaana ta te yite cawsaazaapuv a mangpuo riypata a tue yi.

16 Cacuonakawta sa hne tiy kawlie cuose, biena luo pyi, thlathaa pyi hne sabbath kawlie cuose, ahungtahmuo niema kha sue ca phaw kha yi se. 17 Hingpa zaw hingca a vaw riypa hmang a mingthlaapa ta cuote, a hmisipa ca Khrih tana a cuo. 18 Kiema hne kiema a hmuo li pata a panena kaw hne avuoming abiena kaw khuopuv ta a daakhyi te a ripa, muocuo a hmung nakawta cawsaa hrang laata i suo vie tapata a rue te saapa ruena ta a palepa tie khata sue ca phaw kha yi se. 19 Iema ca luv ta a cuopa Khrih hne khata a pazue vayi. Luv ta a cuopa Khrih'a taakhata pangpa ca sa kha hmung te, cakhiycabuo hne thariytha-uo zaw khata ama cakhiy. Cahaa cata Khazing khingna haakhata ama lethaw.

20 Niema ca Khrih hneta hing chuelyi phung taahingta nama thiy tli kieca khaapanakawma hing chuelyi ming haata nama hring? 21 Khaapanakawma hrie kha, a pacie kha, de kha tapa phung ca nama ziy? 22 Hingpa phung bangkhuo hing ca cawsaa ta changpa hne pacuvpa dyi ta cuote a ziypa tie hne tana ama thiy hne aa. 23 Hingpa phung hing zangna luota a sakapa cuo azuena, a panena hne, khuopuv ta pangpa ahri-asaana cuota singna phung a lu raalaa pata saapa khingna te khu tangena riypata ca a thlahnena aw vyi.