9
Mingpathepa tie cuota rehrie riypa kawlie niema'a luo caa cape a hu tapata rue va ang. Tahematapakieca, cawsaa a bya nama khingna zya kha i pachang tli nakawta niema kaw kha Masidonia tie'a lieta ica vaa palesakhyi tli yi. Akhaia tie ca ahuo kung ning taakhata a bya riypata a ting pacie pata ama aw tli a ta yi. Capa niema palungthuna cata cawsaa hluvpuv palung a pathu sa yi. Cuorasala capa kawlie cata maacaa palesakhyina yi kha a hripa a cuo li riypata, a ting pacie pata nama aw riypata, uvnu zaw kha i vya pathlie yi. Cata cuo li pata, Masidonia tie ta kama kha na vya ziy yi sala a ting pacie pata nama aw lipa kha aca hmung kie yi ca, hingpa kawlie hing niema dyi cuo li pata kiema zaw kha ma nang a zaasa aa. Cacuonakawta uvnu zaw kha niema'a luo vya pathlielupa yi ta, pi riypata bie namaa kuo ciepa lasaw kha pahmyalu aa hu tapata i rue. Cahaa cata i vya chiy tiyta ting cie pata za aw'a te, hripuo pata pipa cuo li pata palung thusa pata nama pipa lasaw a cuopa kha aa luo aa.
Saciy a cawta dyi a vaapa ca thyipaa a cawta dyi pahriy'a te, a hluvpuv ta a vaapa ca a hluvpuv a pahriy aa tapa kha maw kha ung. Ahung nama cuo zaw, nama palung lie namaa thli na zaa khata pi tie ung, ngie a buopuo pata pi kha se, pi lisa pha vyi tapata pi kha se, tahematapakieca palungtluosa pata a pipa tie khana Khazing ta a due yi. Khazing ca namaa huna laata a hlyi ta thluechiy phangting caa pi khutuv yi cuote, hmangting kha aa de pata hnyi'a ung cate, hmangpha tuena phangting lie kha a bya khutuv nama cuo aa. Caapathepa ta,
"Pahyasa pata siypasa tie kha pi yite,
Aa dangna ca chuozaa ta aa hmang," a ta.
10 Saciy a vaatuv kha vaa riypa saciy hne ning riypa sa a pituv ta nama vaa riypa saciy kha a hluvsa ta ca pi'a yite, namaa dangnapa thyipaa kha a hluvsa aca pahriy sa'a yi. 11 Pahyasa pata a hluvsa nama pi khu riypata Khazing ta aaky-aacasa pata aca pahring sa'a yi. Kiema'a taata ama hmungpa nama lasaw nakawta iema ta Khazing ama pathuo sa aa. 12 Tahematapakieca, hing re nama hriepa hingta mingpathepa tie amaa huna dyi kha aa byapa yi ta cuo li pata Khazing'a luo palungtluona bie rina zaw kha a hluvpuv a pa-aw sa. 13 Hingpa re nama hriena lieta, Khrih thuophaabie nama cuhluopa kha ri-angiena hneta nama hringkhyinapa hne mingpathepa tie hne cawsaa hrangpa tie cuota pahyasa pata nama pinapa khata Khazing kha a parungnaa sa. 14 Khazing vihnyina a hlyi ta nama cunglie a tlung nakawta aca vuosa puo pa yi ta nama cuota thlaa ama chuo. 15 Ri diy khu a aw lipa a lasaw thue khata Khazing ca a law pata cuo mangsue.