6
Khazing hne re a hrie hnepa ma cuopa haata, a vihnyina nama tingpa kha a cakhawpa ta nama pacuo sa li riypata maacaa nue yi. Khazing ta a ripa ca:
Cuhluo the riypa cuo ning kha
naa ca thlie yi ang te,
Khuona ningcuo lie kha icaa bya yi," a ta.
Naathlie tie ung, ata hing na cuhluo riypata araw-apuna cuo ta a cuo; naathlie tie ung, ata hing na khuona cuo ta a cuo! Ma rehriena lie suephawpa ma cuo li riypata ahunghmuo ama luopuv lie pakhuotuv chi va puv. Khazing changtaapa ma cuopa kha a luo bangkhuo taata aa luo riypata te-angna, ruvnaana, vuochina, tuvdena, thawpathlana, zaapuv ta tuechiena, rehruo hriena, mingkuvhruvna, hne nangdiytiyhriena zaw kha palung pasiysa pata ma ang. Palung pathena, pachangna, palungpasiyna, kawpacuona, thlaapa lie pathena, duena hmisi, biehmisipa rina hne Khazing cahrana kha hmuo pata Khazing rehrietuv ma cuopa kha ma paluo sa. Adangna cehre kha ma cavyi ma cacuo ta maa hrie. Malie pathuosa puo yite, malie ama ese puo, ma kawchie malie ri yite ma thuophaa malie ama ri. A hanghiepa ta malie ri yite, cuorasala biehmisipa ma ri puo. Pachang lipa haata malie ama mang, cuorasala cawsaa bangkhuo pachang pata ma cuo. Athiypa haata malie hmung yite, cuorasala, malie mang tie ung, ma hring thluo hing. Duo malie ama te, cuorasala malie thie vayi. 10 Ma ngie a chi the raalaa pata ma palung a tluo pari. Ma siy a pasa raalaa pata cawsaa hluvpuv ma pa dawphaa sa yi. Khaahmuo ma hnyi li raalaa pata, hmangting bangkhuo a hnyituv ta ma cuo.
11 Korin khy lie a awpa duepa viesaa zaw, a siesa patana maca chang yi; ma pathiypalung ingchiy hing a kusa tana maca pahawpa tli yi hing. 12 Maca duena yi hing chebuo va tli pa hing, niema dyina a chebuo ungciy. 13 Kuo kha luota ripa kieca, saata zaw chang tana ica chang tli yi hing. Nama pathiypalung kha a kusa ta malie pahawpa ra tie ung.
14 Zanglituv tie hneta a khe kha ung. Tuokhaatama a dangna hne pha lina ca ama aw hne the aa? Khena hne zingna zaw tuokhaatama ama aw hne the aa? 15 Tuoakhaatama Khrih hne Setaa ca ama aw hne the aa? Zangtuv hne zanglituv ca khaapama amaa hraw hne the aa? 16 Tuokhaatama Khazing Biena-ing hne kuvtuezuv tie ca ama aw hne the aa? Tahematapakieca kiema ca a hringpa Khazing biena-ing tana ma cuo; Khazing ta,
Kama kha iema hrawlie aw'a ang te,
iema hrawlie i khie aa,
Kama ca ama Khazing ta cuo'a ang te,
iema ca i cawsaa ta ama cuo aa.
17 Cacuonakawta, Abyipa ta,
iema hraw taa khata pya ungla,
iema'a taakhata a nanang ta aw tie ung, a ta.
A pathe lipa khaahmuo taw kha ungla,
cakieca ica cuhluo'a yi.
18 Kama ca nama paa ta cuo'a ang te,
niema ca kama saacapaa hne
sacanung zaw ta nama cuo aa,
tapata Alesyicepa Abyipa ta, a ta.