KORIN
Korin Khrisaabuv'a Luo Paul Caapaphya Suohningna
Paul ta Korin khrihsaabuv 'a luo a yihningna ta a paphyapa caa hing khrihsaabuv hne ama palung amaa hmung li cuo ningta a capepa tana a cuo. Khrihsaabuv chung taata cawsaa chekha ta khuopuv ta amaa du. Cuorasala Paul ta amaa re pakhaa the riypa kha khatluv tama a khing tapa hne, amaa re pakhaa tiyta a palung tluo zya zaw kha a paluo sa.
A caapaphya a hruothu luo taca Korin khy ming hne amaa pazuena zya kha ri te, khaapanakawma cahaa cata ama ese tiyta khuopuv ta a vielie ra yi tapa kha a ri. Capa cata a ngiepachiyna hne a re pakhaana chiykhyi te capa nakawcata a palungtluona zaw kha a ri. Cakhutaata Judea ruo khrihsaabuv tie a byana cuota pahyasa pata ama pi riypa kha paa a kie yi. A chuona lieca Paul ta lucuotuv hmisi a cuona kha a ri.
1
Bie-achangna
Khazing khingna ta Khrih Zingsuv lucuotuv a cuopa kama Paul hne i nuta Timote ta, Korin khy lie a awpa,
Khazing khrihsaabuv hne Akhaia pe khy ting ta a awpa mingpathepa tie'a luo caa maca paphya yi.
Ma Paa Khazing hne Abyipa Zingsuv Khrih'a taata vihnyina hne diena ca nama cunglie aw mangsue.
Paul Ta Khazing A Pathuosa
Ima Byipaapa Zingsuv Khrih a Paa hne a Khazing, ngie malie a chituv ma Paa, hnaanguona Khazing ca pathuosa pata cuo mangsue. Riethyi vuosuona bangkhuo lie hnaa malie a panguotuv cuote, cahaa cata kiema zaw ta ama'a taata ma hmungpa hnaapanguona kha hmuo pata riethyi vuosuona a ang rapa tie kha hnaa ma panguo ra yi. Tahematapakieca Khrih te-angna bangkhuo lie a hraw rapa ma cuopa haata Khrih thueta hnaapanguona zaw a hmungpa ta ma cuo. Kiema na riethyi vuosuona a hmung puv tapa kieca niema hnaanguona hne khuona cuo tana a cuo. Kiema na hnaapanguopa ta a cuo puv tapa a cuo kieca niema zaw hnaapanguopa cuo ung cate, kiema ima hmungpa te-angna kha palung pasiyna hne nama ang khu na riypata thaazuo nama hmungna ta a cuo. Niema cuota maa nguopuona ca a cahang buo'a vyi; tahematapakieca kiema te-angna namaa hraw pahaata hnaapanguopa ma cuona zaw namaa hraw ra aa tapa kha ma pachang.
Uvnu hne sieta zaw,note 1:8 Gk Uvnu zaw Asia ruo chunglie riethyi vuosuona ma angpa kha pachang li pata nama aw riypa khing va puv; tahematapakieca khuopuv ta, ma ang khu li na te ta malie pavy yite hring riypa hmuo zaa nguopuo khu va puv. Thiy riypata bie ripa pa tana ma cuo tli tapatana maa zaa rue. Cuorasala hinghaahingta a cuopa ca kiema hne kiema kha a ring li pata a thiypa a pathu pakhaatuv Khazing maa ring the riypa khatana a cuo. 10 Kiema kha ciy aa chiypa thiyna chung taata malie a khuopa ama ta malie a khuo canyi aa. Thlaachuona ta malie namaa bya pahaata, malie a khuo canyi aa tapata ama'a lie kha maa nguopuo. 11 Cacuonakawta cawsaa hluvpuv thlaachuona thueta, kiema ma hmungpa thluechiyna kawlie hingta, cawsaa hluvpuv ta kiema cuopa ta alawna bie ama ri aa.
12 Kiema maa palesakhyipa, ma chiephathleduona ta tehte a khuopa ca: hing chuelyi lie ma hringzya hne niema hne maa pazuena lie hing chuelyi singna ta cuo li pata Khazing vihnyina hne pathiypalung hmisi tana a cuo tapa kha a cuo. 13 Tahematapakieca niema nama ri khupa hne nama pachang khupa ri li pata a hrangpa suokha hmuo niema'a luo ma vya capepa aw vyi. 14 Niema ta a chebuo nama pachang tlipa haahingta a chuona te ta nama pachang aa tapa kha icaa nguopuo yi; cahaa cata Abyipa Zingsuv ning a vya chiy tiyta kiema ca niema a palesakhyipa cuo'a pate niema zaw kiema a palesakhyipa nama cuo aa. 15 Hingpa hing a siesa pata i pachang nakawta, palungtluona lehning nama hmung riypata niema'a luo ica vya tlaw taa khing yi. 16 Masidonia luo i tlawpuo pata ca vya tlawpaa khing yi ang te, Masidonia taata niema'a luo vya kaa pakhaa pata, Judea luo ina pathlie riypa ung cata i khing. 17 Hinghaahingta i tue khing tiyta a tuebung a tuethawpa i lu ma? Cuokha chunglie ta, "A cuo, a cuo" ama ta khu taata, "Cuo vyi, cuo vyi," a ta pakhaapa chuelyi cawsaa cakhawpa tie haata i tuepa a cuo ma? 18 Khazing ca zangtluo aa tlapa a cuopa haata, niema'a lie ima ripa bie ca, "A Cuo hne Cuo Vyi," tapata a cuo riypa cuo vyi. 19 Tahematapakieca, Silvanus hne Timote hne kama ta niema'a lie ima phupa Khazing Saacapaa Zingsuv Khrih ca, "A cuo hne Cuo vyi," a pahlawpa ta cuo vyi. Cuorasala ama'a lieca, "A cuo," tapatana a cuo pari. 20 Tahematapakieca ama ca Khazing biekuona bangkhuo lie kha, "A cuo," tana a cuo. Canakaw ca muo Khazing pathuosa riypata Zingsuv thueta, "Amen," ma ta pata a cuo ta. 21 Cuorasala kiema hne niema hne Khrih chunglie malie pa-aw sa te sathu malie a pathuvpa ca Khazing tana a cuo. 22 Kiema cuota malie a chipa paciepa bangkhuo suokha hnang suokha ta ima hmung thena riypata ma cunglie kha caa malie khe te, ma pathiypalung lie Thlaapa malie a pi. 23 Naa pachangkhyituv ca Khazing ta a cuo: Korin luo i vaw pakhaa lipa ca niema nama thaa duo naase ica ta nakaw yi ta a cuo. 24 Nama zangna cunglie kha uv caa ting vayi ang; cadyiseca nama palung aa nuona riypata niema hne re a hrie pakhawpa tana ma cuo vie hriy, tahematapakieca niema ca zangna lie a cusa pata namaa daa.