7
1 Niema nama capepa caa hne aa patuvpa haakhata, capaa hing napuv chiy li pata aw sala a pha.
2 Cuorasala aparuvsuena tue riypata pasupaliyna a hluv tuv nakawta capaa ta napuv hnyi sala canung zaw navaa hnyi se.
3 Navaapa ta a napuvnung cunglie kha navaapa a cuona kha patling sa sala napuvnung zaw ta a navaapa cunglie ta napuvnung a cuona kha patling sa se.
4 Tahematapakieca napuvnung ta ama pangpa kha uv li pata, navaapa ta a uv. Cahaa cata navaapa zaw ta ama pangpa kha uv li pata napuvnung ta a uv.
5 Thlaa chuo riypata cuo cuokha kha thli pakhaw ung cate nama pahning palung tling pata na maa uv ta li pata ca pakha khingna kha pakha ta nama patling sa riypa kha a thlu kha ung. Nama thli pakhawpa cuo a chuo taata aw pakhaw pakhaa tie ung. Cacuolikieca namaa ang khu li nakawta Setaa ta aca pasupaliy sue'a yi.
6 Hingpa i ripa hing a pa-aw tana ica pa-aw yi, nawbie ica pipa yi cuo vyi.
7 Cawsaa bangkhuo kama haahingta aw khu diy ungla i khingsa. Cuorasala Khazing ta malie a pipa lasaw ma hmungpa ca a nanang diy.
8 Napuv navaa a hnyi li liepa cuo hne nunghlyi tie cuota ca kama haahingta iema seta aw yi sala na a pha i ta.
9 Cuorasala amaa ang khu li kieca a chiyhie thluo yi se. Thiysaa khingna ta myi kuo ta kuopa laa taca a chiyhie pata a pha vie.
10 A chiyhie ciepa tie cuota hingpa bie, kama bie cuo li pata Abyipa nawbie hing ica chang yi, napuv ta navaa kha a che kha se,
11 (cuorasala aa che kieca navaa hnyi li pata aw se, a cuo li kie a navaapa hne a hlaw pakhaa se), navaapa zaw ta a napuvnung kha a che kha se.
12 A hrangpa tie cuota, Abyipa'a taata cuo li pata kama ta ica tapa yi ca, zangtuvnote 7:12 Gk Uvnu pakhakha ta zanglituv napuv hnyi sala capa nung cata ama hne aw hne riypata a palung a tling thluo kieca ama kha a che kha se.
13 Canung pakhakha ta zanglituv navaa hnyi sala capa paa cata ama hne aw hne riypata a palung a tling thluo kieca ama kha a che kha se.
14 Tahematapakieca zanglituv navaapa ca a napuvnung thueta Khazing cuhluo tluo aa tlapa vya cuote, zanglituv napuvnung zaw a navaapa thueta Khazing cuhluo tluo aa tlapa a vya cuo. Cacuolikieca, nama saata zaw kha pathe'a vayi, cuorasala ata hing ca Khazing cuhluo tluo aa tlapa ama cuo.
15 Cuorasala zanglituv khata a chepa a khing kieca; a che thluo ung; cahaapaapa hmang kawlie ca zangtuv canung a cuo zaw capaa a cuo zaw nawbie ta ca ciypaki vayi. Tahematapakieca Khazing na a dieta tah aw riypata malie a u.
16 Napuvnung, na navaapa kha i khuo khu aa tapata tuokhaatama na pachang? Navaapa, na napuvnung kha i khuo khu aa tapata tuokhaatama na pachang?
17 Cawsaa bangkhuo Khazing ta cuose tapata a ca china haa yi hne aca una haa dyi khata aw tie ung. Caca Khrihsaabuv bangkhuo ta i pacuvpa yi ta a cuo.
18 Cawsaa pakha ca vangdaw a te ciepa ta a ca u kie yi ca, vangdaw namaa tenapa hmaadaa kha para riypata a ting kha se. Cawsaa pakha ca vangdaw a te li pata a ca u kie yi ca vangdaw a te riypata a zue kha se.
19 Vangdaw a te hne a te li kha a biepuv ta cuo vyi, cuorasala Khazing nawbie ziy khana a biepuv.
20 Cawsaa bangkhuo ta aca ku ning yi nama cuona haakhata aw pathla tie ung.
21 A ca ku ning kha sii ta na za cuo ma? Na za cuo zaw ta pyi vyi. Cuorasala hyazangna cuo na hmung kieca hyazang riypata a zue tie.
22 Tahematapakieca sii cuoning ta Khazing ta a upa tie ca Khazing'a lie a hyazangpa tana ama cuo. Cahaa cata hyazangpa a cuo ningta kupa tie ca Khrih sii ta ama cuo.
23 Niema hing muo pi pata calyipa tana nama cuo; cawsaa sii ta a li kha ung.
24 Cacuonakaw, uvnu hne sieta zaw, tuokhaapa a daahmang lie nama aw pata aca ku zaw yi ta, aca kuna haa yi khata Khazing'a lie kha a hmang tie ung.
25 A chiyhie li liepa tie hne aa patuv pata Khazing nawpina hnyi va ang, cuorasala zangtluo aa tlapa Khazing ngiechina thueta kama ta i ruenapa ica chang yi.
26 Ata maa tawpa palung riethyina hing ruepa kieca cawsaa pakha hing a ta aa daahmang haahingta a aw pathla pata na a pha tapatana i rue.
27 Napuv a hnyipa na cuo kieca na napuv hne a che riypata vaa ting kha. A chiyhie li liepa na cuo kieca napuv hnyi riypata vaa ting kha.
28 Namaa chiyhie kiema suena nama tue pata cuo vyi, lesaa ta navaa a hnyi kiema suena a tue pata cuo vyi. Cuorasala a chiyhiepa tie ca chuelyi palung riethyina kha amaa taw aa. Niema kha capa taacata ica palaw sa khing yi.
29 Uvnu hne sieta zaw, i ri khingpa ca, thli ciepa cuo hing a vya pachangsale tli nakawta, ata taa hing taca napuv a hnyipa ta a hnyi lipa haakhata aw sala,
30 a ngiechi te a caapa tie ca a caa lipa haata aw yi se. A palung a tluopa tie ta a palung a tluo lipa haata aw yi sala, hmang a calyipa tie ta hmang a hnyi lipa haata aw yi se.
31 Hing chuelyi chechiy hne re a hriepa tie ta chuelyi chechiy hne re a hrie lipa haata aw tie ung. Tahematapakieca hing chuelyi chiycuona hmingsuo ca a chuole nguoluo tli.
32 Nama palung rie thyi kha se tapa na icaa khing khyi yi. Napuv a hnyi li papaa ca Abyipa kha tuokhaatama a palung i patluo khu aa tapata Abyipa kawlie dyi kha a palung rie a thyi.
33 Cuorasala napuv a hnyi papaa ca tuokhaatama a napuv kha a palung i patluo khu aa tapata chuelyi kawlieta a palung rie thyi te,
34 a ruena kha aa che. Navaa a hnyi lipa canung, a cuo li kie lesaapathenung ca tuokhaatama pangpa hne thlaapa lie i pathe khu aa tapata Abyipa kaw kha ama palung rie thyi te, cuorasala navaa a hnyipa canung ca tuokhaatama a navaapa kha a palung i patluo khu aa tapata chuelyi kawlie kha a palung rie a thyi.
35 Hinghaahingta i ripa hing niema phana cuota cuote tue li riypa tapata nama cunglie i khang khing nakawta cuo vyi. Hmangphapa kha hrie'a ung cate nama pathiypalung hmisi ta Abyipa'a luo namaa pi riypa khatana a cuo.
36 Pakhakha ta aa pahaa ciepa lesaanung cunglie kha mang a ngie pata aw va ang tapata a rue te, a khingna zaw kha cahra te aa hlaw khing kieca, a khingna haakhata a hlaw se. Suena ta cuo vyi.
37 Cuorasala ahung a cuo zaw, a palung kha a cusa pata sang te, ahungtahmuo hripuo li pata a khingna kha ama hne ama a uv khu te, capa nung ca a pahaapa lesaa a cuo yalya khata aw riypata a palung lie bie aa chi kieca hmangpha a hriepa tana a cuo aa.
38 Cacuonakawta a pahaapa lesaanung kha a chiyhiepa ca hmangphapa kha tue te, a chiyhie lipa ta hmang pha viepa kha a tue.
39 Napuv ca a navaapa a hring chung bangkhuo ca a hya zang vyi. A navaapa a thiy kieca a khingpa kha aa hlaw khu, cadyiseca Khazing a zangpa dyina a hlaw aa.
40 Kama ta bie i chipa ca, a cuona ta yalya khata aw pathla sala aa nuo vie aa i ta; kama zaw ma Khazing Thlaapa Pathe kha i hnyi ra tapata i rue.