16
1 Mingpathepa tie cuota suepina hne aa patuv pata, Galatia khrihsaabuv tie i changpa yi kha za tue ra tie ung.
2 Kama i vya chiy thueta sue khyichaw aa hu li riypata a zaa tating ningkhana lie kha nama cyicuo ta nama hmungpa tuokaa chung taata chebuo ungla pacung pacie tie ung.
3 Kama i vya chiy thueta, palung tling pata namaa tlawpa tie kha Jerusalem luo nama lasaw paphya riypata caa hneta ma pathlie'a yi.
4 Kama si riypata aa hu kie zaw ma, kama kha ina ziy'a yi.
5 Masidonia ruochung cahrawpaa pata vya si i ting nakawta cahaa cata i tlawpaale khu taata niema'a luo kha i vya chiy aa.
6 Khaapa luo i tlaw zaw, ina patlaw sa riypa ung cata, niema'a lie kha thlasiy a chuona te khiy hmuo i aw the aa.
7 Za capiepaale pata niema hne a hmungpa ca i palung tling the'a vyi. Khazing khingna ta a cuo kieca, niema'a lie cuokha chung ca aw na i ting.
8 Cuorasala Pentekos te khiy ca Efesa liena aw i ting.
9 Tahematapakieca a hma a sisa riypa re kha i cuota a pahaw te, kama naa dutuv a hluvsa zaw ama aw.
10 Timote kha niema'a luo a vya chiy kieca, a phata ta za mangsang mya ung, tahematapakieca kama haata Abyipa re a hriepa tana a cuo.
11 Ahungtahmuo ese kha yi se. Kama hne uvnu zaw ta ma mangkhuo nguoluo nakawta, kama'a luo a vya chiy the riypata a bya tie ung.
12 Ma uvnupa Apollo hne aa patuv pata i ri kieca, viesaa hrang tie zaw hne khata niema'a luo vya tlaw riypata khuosa ta i chang raalaa pata, vya tlaw khing valie. A cuo aa raw thue tana a vya tlaw aa.
13 Palung singsa pata aw tie ung. Nama zangna lie kha a cusa pata a daa tie ung. Nama rie pha sala cahra tie ung.
14 Nama tuepa bangkhuo kha duena hneta tue tie ung.
15 Uvnu hne sieta zaw,note 16:15 Gk Uvnu zaw Stefanas chungkhue ca Akhaia pe lie Khrihsaa a cuo taapa ta cuo yite, Khazing mingpathepa tie cuota aa pisapa ta ama cuopa kha nama pachang.
16 Cahaapa cawsaa tie hne iema hne re a hrie hnepa bangkhuo tie ri kha a ngie ung tapata paa ica kie yi.
17 Stefanas hne Fortunatus hne Akhaiku ama vya chiy nakawta i palung a tluo, nama aw lipa hmuo malie a pamaw sa;
18 kama palung ina patluopa haayita niema palung zaw aca patluo ra yi. Cahaapa cawsaa tie ca pasungpanaa riypatana ama cuo.
19 Asia ruo lie a awpa khrihsaabuv tie na nama ku caa patuv yi. Akuila hne Prisilla hne ama ing lie a pungpa khrihsaabuv na thaa phasa pata nama kuv caa patuv yi.
20 Hingpa lie a awpa uvnu hne sieta zaw bangkhuo na nama kuv caa patuv yi. A pathepa a pahnuona ta pakha hne pakha bie a chang tie ung.
21 Kama Paul ta hing bie a changna caa hing i kuv ta i cape.
22 Ahunghmuo cuose, Abyipa a due lipa ca a cunglie chiesana tlung se. Maranatha:note 16:22 Aramaic ryi ta Ma Byipaapa ca aa vaw tli* tanata a cuo. Ima Byipaapa, a vaw buo tie.
23 Abyipa Zingsuv vihnyina ca niema'a lie aw mangsue.
24 Khrih Zingsuv thueta ica duenapa yi ca nama bangkhuo cunglie aw mangsue.