15
1 Uvnu hne sieta zaw,note 15:1 Gk Uvnu zaw ica za changpa yi thuophaabie kha namaa thyi pakhaa pata i khing. Ca thuophaabie ca cuhluo ung cate, nama zangna a cusa pata nama bangnapa ta a cuo.
2 Niema ta hingpa ica changpa yi thuophaabie hing a cusa pata namaa patuv kieca khuopa ta cuo'a ung cate, a cusa pata namaa patuv li kieca nama zangna kha khaahmuo li patana a cuo aa.
3 Tahematapakieca i za hmungpa, a biepuvce tapata niema ica changpachaapa yi ca: Caapathepa chunglie ama za capepa haata Khrih ca ma sue nakawta thiy te;
4 paby yite, Caapathepa lie aa capepa haata ningthung napa lie pathu pakhaa pata a cuo.
5 Piter'a lie kha a luo te, cakhutaata lucuotuv hlyihning cunglie kha aa luo.
6 Cakhutaata a ziytuv zapangaa hlyi cunglie kha yikha ta a luo te, chekha ca ama thiy tli raalaa pata hluv vie ca ama hring kalie.
7 Cakhutaata Jeim'a lie kha a luo te, lucuotuv bangkhuo'a lie kha aa luo.
8 A hnangcawce ta aning-acuo cuo li pata a puvpa haata a cuopa kama'a lie zaw kha aa luo.
9 Tahematapakieca kama ca lucuotuv tie hrawlie a cawcepa tana i cuo. Khazing khrihsaabuv kha i za hrisaathierue nakawta lucuotuv tapata ku riypa tahmuo a tla va ang.
10 Cuorasala Khazing vihnyina thueta kama ca ata i cuona haahingta cuo ang te, vi ina hnyina ca a cakhawpa ta cuo vyi. Lucuotuv hrangpa bangkhuo laata khuo vie ta rehrie ang te, cuorasala capaca kama ta i hriepa cuo li pata kama chunglie a awpa Khazing vihnyina ta a hriepa tana a cuo.
11 Kama cuo angse, iema cuo yi se, ma bangkhuo ta thuophaabie kha phu pate niema zaw nama zang.
12 Khrih ca thiyna taata na a thupakhaa tapata phupa a cuo kieca, khaapanakawma niema chekha ta thiyna taata thupakhaana aw vyi tapata nama ri the?
13 Thiyna taata thupakhaana na a aw va tapata a cuo kieca, Khrih hing pathu pakhaa pata cuo'a vyi.
14 Khrih hing pathu pakhaa pata a cuo li kieca, ma thuophaabie phupa hing a cakhawpa ta cuo'a te, nama zangna zaw a cakhawpa a cuo aa.
15 Kiema zawte kha Khazing kaw a richiepa ta malie ama hmung aa, tahematapakieca, Khazing na Khrih kha thiyna taata a pathu tapata Khazing kaw kha tehte ma khuo. Athiypa tie thupakhaa vayi tapata a cuo kieca, Khazing ta Khrih kha thiyna taata a pathu pakhaa li nakawtana a cuo aa.
16 Tahematapakieca a thiypa tie pathu pakhaa pata a cuo li kieca, Khrih zaw pathu pakhaa pata cuo'a vyi.
17 Khrih kha pathu pakhaa pata a cuo li kieca, nama zangna ca khaahmuo cuo li'a pata nama suena chunglie a aw kaliepa tana nama cuo aa.
18 Cakhutaata Khrih zang pata, a thiypa tie zaw ama lidie diy aa.
19 Khrih chunglie maa nguopuona hing chuelyi ma hring chung cuota dyi hingta a cuo kieca, cawsaa bangkhuo hrawlie ngiechi aa chiycepa tana ma cuo aa.
20 Cuorasala Khrih ca thupakhaa hmisi saw te, a thiypa tie hraw taata thyipaa taapa ta a cuo.
21 Thiyna ca cawsaa pakha taata a tlung pahaata, thiyna taata thupakhaana zaw cawsaa pakha thue tana a tlung ra.
22 Tahematapakieca Adam thueta cawsaa bangkhuo ama thiy pahaata, Khrih thueta cawsaa bangkhuo kha pahring pata ama cuo aa.
23 Cuorasala iema'a na ama cuo cyicuo ta pathu pakhaa pata ama cuo aa: thyipaa taapa ca Khrih ta cuo'a te, cakhutaata aa vaw ningta a cawsaa a cuopa tie ta ama cuo aa.
24 Cakhutaata cuo chuona kha vya tlung'a te, Khrih ta uvtuv bangkhuo, nawhnyina bangkhuo hne cahrana bangkhuo kha a para diy khu taata, pena ca a Paa Khazing'a luo kha a pi aa.
25 A carie bangkhuo kha a phyipazaa rawlie a chaapuo nate yi ta a uv'a yi.
26 A hnangcawce ta para riypa a cariepa ca thiyna ta a cuo.
27 Tahematapakieca, "Ama ta hmangting bangkhuo kha a phyipazaa rawlie a chi," a ta. Cuorasala, "hmangting bangkhuo kha a phyipazaa rawlie a chi," a ta tiyta hmangting kha Khrih phyipazaa rawlie a chituv Abyipa ca ripuo pata cuo vyi tapa kha a sie.
28 Hmangting bangkhuo kha ama uvna rawlie chi diy pata a cuo tiyta, saacapaa hrahring hing hmangting bangkhuo ama phyipazaa rawlie a pachi sa diypa Khazing uvna rawlie kha aw'a te, Khazing ca hmangting bangkhuo cunglie uvtuv ta a cuo aa.
29 Cacuolikieca, a thiypa tie cuopa ta tiy a nawpa tie kha tuokhaata? Athiypa tie kha pathu pakhaa pata ama cuo li kie, khaapanakawma cawsaa ta iema cuopa ta tiy amaa naw aa?
30 Cakhutaa, khaapanakawma kiema hrahring hing ruvnaana chunglie ma aw pari?
31 Ningting tana i thiy! Uvnu hne sieta zaw, niema icaa pale sakhyipa yi hing, a cuo hmisipa, ima Khrih Zingsuv chunglie ta icaa pale sakhyipa yi tana a cuo.
32 Efesa khy lie saahruo tie hne i zaa tuv pakha cawsaapa a nguopuo cakhawna hneta cuo sala, khaama ina thlahne aa? A thiypa tie pathu pakhaapa ama cuo li kieca,
"Ning thluo dang thluo'a ungpuv,
tahematapakieca, kiema ca
mawluo a thiy riy'apa tana ma cuo."
33 Cawsaa ta ca dung kha yi se:
Viesaa pha lipa na zyazaa pha a para."
34 Lungsingpyapa ta aw ungla pathiy-palung pha hnyi tie ung. Suena tue kha tie ung, tahematapakieca cawsaa chekha ca Khazing kha pachang vayi. Nama nang zaa naase ta ang te na hinghaahingta ica ta yi.
35 Chekha ta, "A thiypa tie hing tuokhaatama ama thupakhaa aa? Tuokhaapa pangpa ma ama hnyi aa?" nama ta aa.
36 A ngaapa zaw! Na tuvpa saciy kha a thiy li pata a kya pu the ma?
37 Na tuvpa ca a kya le riypa a kung kha cuo li pata a ciy suokha, jungsacuo a cuo li kie a saciy suokhakha ta a cuo aa.
38 Cuorasala Khazing ta ama khingna haata saciy ca a khingpa pangpa kha a pi. Saciy cyicuo khata iema'a na pangpa cyicuo ama hnyi.
39 Hringna a hnyipa bangkhuo ta ama hnyipa ngesaa hing a lu vayi, cawsaa ngesaa a phanghrang, saruo ngesaa a phanghrang, pavaa ngesaa a phanghrang, ngaa ngesaa a phanghrang tana ama cuo.
40 Vuoruo pangpa aw te alyi pangpa a aw ra, cuorasala vuoruo pangpa rungnaana a phanghrang, alyi pangpa rungnaana a phanghrang tana a aw.
41 Ning rungnaana a phanghrang, thlaapa rungnaana a phanghrang, aasiy zaw rungnaana a phanghrang tana a aw; hmisi ta ripa kieca aasiy zaw hmuo suokha hne suokha ama rungnaana aa nanang kalie.
42 A thiypa tie thupakhaana zaw cahaacatana a cuo. Saapa pangpa ca ma paby ningta a thuv thepa cuote, pathu pakhaapa a cuo tiyta ca a thuv the lipa tana a cuo.
43 Pabypa a cuo ning ca a hming chiepa hne a thaadyapa cuote, pathu pakhaapa a cuo thue ca a puvthepa hne a cahrapa ta a cuo aa.
44 Paby ning ca chuelyi pangpa cuote, pathu pakhaa thue ca thlaapa pangpa tana a cuo aa.
45 Caapathepa ta, "Cawsaa taapa Adam ca a hringpa cawsaa ta a cuo," a ta. A hnangcawpa Adam ca hringna a pipa thlaapa tana a cuo.
46 Cuorasala a aw taapa ca thlaapa kha cuo li pata, saapa pangpa khatana a cuo, cakhutaa catana thlaapa ca aa vaw.
47 Cawsaa taapa Adam ca alyi taata cuote, alyi diypa taata sapa tana a cuo; cuorasala Adam pahningnapa ca vuoruo taata a zuvpa tana a cuo.
48 Alyi huopa a cuopa tie ca alyi ta sapa haakhata cuo yite, vuoruo huopa a cuopa tie ca vuoruo taata a zuvpa haakhata ama cuo.
49 Alyi ta sapa hmingsuo kha ma phya pahaata vuoruo taata a zuvpa hmingsuo zaw kha ma phya riypata a cuo.
50 Uvnu hne sieta zaw, i ripa ca hinghaahingta a cuo: thiy hne saa ta ca Khazing pena kha cu khu'a vyi, a ra khupa ta a ra khu lipa ru kha cu khu'a vyi.
51-52 Naa thlie tie ung, aa thuvpa bieparuv na ica chang'a yi! Kiema bangkhuo hing thiy diy'a va puv, cuorasala a hnangcawcepa hmyakaa ama tung thueta kiema bangkhuo hing sungkhata lie, ming vy hluota lieta maa thle aa. Hmyakaa kha tung'a yite, a thiypa tie kha a ra the lipa luo pathu pakhaa pata ama cuo aa, cakhutaa kiema kha maa thle aa.
53 Tahematapakieca hingpa a ra thepa pangpa hingta a ra the lipa kha a hryi'a te, hingpa a thiy thepa pangpa hingta a thiy the lipa kha aa hryi aa.
54 Hingpa a ra thepa pangpa ta a ra the lipa kha a hryi'a te, hingpa a thiy thepa pangpa ta a thiy the lipa pangpa kha a hryi tiyta Caapathepa lie cape siypa kha a tling aa:
"Thiyna ca tena chunglie
pahlipadiepa a cuo tli."
55 Vya thiyna, na tena ca khaapalie ma a aw?
Vya thiyna, na ca-ie ca khaapalie ma a aw?
56 Thiyna ca-ie ca suena cuote, suena cahrana ca phungbie ta a cuo.
57 Cuorasala, ima Byipaapa Zingsuv Khrih thueta tena malie a pituv Khazing ca pathuo sa pata aw mangsue.
58 Cacuonakawta, i duepa zaw,note 15:58 Gk Duepa uvnu zaw a cu pata a daa tie ung. Khaapatahmuo ca hnyi khu kha yi se. Abyipa re kha a phace pata hrie pari tie ung, tahematapakieca Abyipa re nama hriepa bangkhuo ca a hripa ta cuo vyi tapa kha nama pachang.