1 Uvnu hne sieta zaw,note 12:1 Gk Uvnu zaw thlaapa lasaw hne aa patuvpa hingta, ca pachang sa lipa yi ta aw khing va ang. 2 Lawki ming nama za cuo ning kha a huv a sung lipa kuvtuezuv kha abie riypata ca za sawle yite, luo nama za paapa kha nama pachang. 3 Cacuonakawta nama pachang riypata i khingpa ca Khazing Thlaapa thueta bie a ripa ta ca, "Zingsuv ca chie sapa cuose," ta buo'a vayi. Thlaapa Pathe thueta ta li pata ca, "Zingsuv ca Abyipa tana a cuo," ta khu'a vayi.

4 Lasaw phangphang a aw raalaa pata, Thlaapa pakha'a taatana a cuo diy. 5 Re a phangphang a aw raalaa pata, Abyipa pakha huona ma hrie diy. 6 Rehriena a phangphang a aw raalaa pata, khapa bangkhuo a pahrie a patue sapa yi ca Khazing pakha tana a cuo. 7 Zaapuv phana riypata pakha cyicuo kha Thlaapa paluohuo sa khunapa kha malie a pi. 8 Thlaapa cata pakha kha singna bie ri khu riypa pi te, capa Thlaapa ngiethie cata pakha kha pachangna bie ri khu riypata a pi. 9 A hrangpa pakha kha Thlaapa cata zangna pi te, capa Thlaapa ngiethie cata pakha kha patluo sana lasaw a pi. 10 A hrangpa pakha kha kharuehaa hmang tue khuna pi te, a hrangpa pakha kha profet-biephu rithena a pi. A hrangpa pakha kha Thlaapa thleduo thena pi te, a hrangpa pakha kha ryi phanghrangpa tie cyi thena a pi, a hrangpa pakha kha ryi palie thenapa a pi. 11 Hingpa bangkhuo a tuetuv hing aa lupa Thlaapa pakha ta cuote, a khingna haakhata cawsaa kha lasaw phang nanang kaluo ta a pi yi.

12 Pangpa ca suokha cuote chebuo a hluvsa a hnyi pahaata hne chebuo bangkhuo ca ama hluvsa raalaa pata pangpa suokha ta ama cuopa haata, Zingsuv chunglie zaw cahaa cata a cuo. 13 Cahaa cata kiema bangkhuo zaw hing Judah ming ma cuo zaw, Jentail ming ma cuo zaw, sii ma cuo zaw, hya a zangpa ma cuo zaw, ma bangkhuo hingta pangpa suokha chunglie kha Thlaapa pakha ta tiynawna malie pi te, ma bangkhuo hingta dang riypa, Thlaapa pakha kha pipa tana ma cuo.

14 Pangpa suokha lie hing chebuo suokha dyi aw li pata chebuo a hluvpuv ama aw. 15 Phyi ta, kama ca kuv i cuo li nakawta pangpa ta cuo va ang ta sala, capa cata chebuo cuo li tli pata pa-aw sa'a vyi. 16 Cahaa cata naa ta, "Ming i cuo li nakawta pangpa ta cuo va ang ta sala, capa cata chebuo cuo li tli pata pa-aw sa'a vyi. 17 Ma pangpa bangkhuo hing ming ta cuo sala, tuokhaatama a thyi the aa? Ma pangpa bangkhuo hing naa ta cuo sala, tuokhaatama rang a thyi the aa? 18 Cuorasala a ta a cuona haa yalya hingta, Khazing ta, ama khingna haata, chebuo tie kha iema'a na ama awna riypa hmang lie kha a chi yi. 19 Chebuo suokha ta cuo diy yi sala, pangpa ca khaalie ma a aw aa? 20 Ata a cuona haahingta, chebuo hluvpuv aw yite, pangpa suokha ta a cuo. 21 Ming ta kuv kha, "Nama kha caa hu va ang," ta khu vyi; luv zaw ta phyi kha, "Nama ca caa hu va ang," ta khu ra'a vyi. 22 Hmisi ta ripa kieca, a thaa a ne viepa haata a tapa chebuo tie hing ama aw li pata a cuo the lipa tana ama cuo. 23 Hmiezaa tluo a tla uo vyi tapata ma ruepa tie kha khuo vie ta mangchiy pate, a puvthe uo lipa chebuo tie kha a puvthe vie ta ma pangi yi ta. 24 A puvthe viepa chebuo tie ca cahaa cata tue a hu vayi. Cuorasala Khazing ta hmiezaa tluo aa tla uo lipa tie kha hmiezaana a le vie ta pi yite pangpa kha a sa. 25 Caca pangpa chunglie palung a lu lina a aw li riypa hne chebuo tie kha amaa mangchiy the kaluo riypata a tue. 26 Chebuo suokha ta pasana a ang kieca pasakhyi kaluo yite, chebuo suokha hmiezaana a hmung kieca amaa lawkhyi kaluo.

27 Niema ca Khrih pangpa cuo ung cate, pakha cyicuo hing capa pangpa chebuo cata nama cuo. 28 Khazing ta Khrihsaabuv lie re a pi tiy yi ta, a suokhana ta lucuotuv tie, a suohningna ta profet tie, a suothungna ta pacuvtuv tie, cakhutaa kharuehaa hmang a tuetuvpa tie, cakhutaata patluo sa khuna pipa tie, a paziy pata malie a bya khuna pipa tie, cakhutaata malie luochiy thena pipa tie, hne ryi a phangphang ta a cyi khupa tie tapata a pi yi. 29 Ama bangkhuo ta lucuotuv ama cuo ma? Ama bangkhuo ta profet ama cuo ma? Ama bangkhuo ta pacuvtuv ama cuo ma? Ama bangkhuo ta kharuehaa hmang ama tue ma? 30 Ama bangkhuo ta patluo sa khuna ama hnyi ma? Ama bangkhuo ta ryi hrangpa ama cyi ma? Ama bangkhuo ta ryi hrangpa kha ama palie the ma? 31 Cuorasala aa suo viepa lasaw hmung riypa kha a zue tie ung. Kama zaw ta a phacepa luo kha ica pahmung sa'a yi.