4
1 Piter hne Johan ta cawsaa-zaapuv'a lie bie ama ri nguoluo ning kha tluobyi tie hne biena-ing a huopa uvtuv byi hne Sadusi ming kha a vaw yite,
2 lucuotuv tie ta Zingsuv a zangpa tie ca thiyna taata ama thupakhaa aa tapata ama za pacuv nakaw hne ama za ukhyi nguoluo nakaw khata a ama hi a haa hringhruo.
3 Cacuonakawta iema kha patuv yite, khy a zing tli nakawta a mawluopa te ta thaw-ing lieta ama chi.
4 Cuorasala ama ripa bie a thyipa tie ca zang yite ama bangkhuo ta thawpangaa tluv ama ta.
5 A mawluopa ta ama uvtuv tie, uvthyi tie, phungbie saya tie hne,
6 tluobyilecepa Annas, Kaiafas, Johan,note 4:6 Hluo vie caa-uv lieca Jonathan* tapatana ama za ri. Alekzandar hne tluobyilepa chungkhue cawsaa hrangpa zaw kha Jerusalem lie kha amaa hmya.
7 Lucuotuv tie kha a liekhingkhuo lie padaa yite, "Ahung cahrana hne ahung ming tama hing hmang hing nama tue?" tapata ama hiehriy.
8 Piter ca Thlaapa ta bi te iema kha, "Uvtuv byi hne uvthyi tie zaw,
9 a tluo lipa cawsaa pakha cunglie hmangpha tuena kaw hne tuokhaatama patluo sa pata a cuo tapa kha ata ning hing malie nama hiehriy pata a cuo kieca,
10 niema ta vieluo cunglie za thie ung cate Khazing ta thiyna taata a pathu sa pakhaapa Nazareth khypa Zingsuv ming tana hingpapaa hing tluo paalaa khata nama hmiekunglie a daa tapa hing niema bangkhuo hne Israel ming bangkhuo ta pachang tie ung.
11 Capa Zingsuv ca Caapathepa ta,
'niema, ingsatuv tie ta nama thawpa alung ca;
a tungpuv cepa ingkiy lung tana aa li,'
a tapa khatana a cuo.
12 Khuona ca ama chunglie dyina a aw, tahematapakieca chuelyi cung bangkhuo lie hing malie a khuo khutuv ming hrangpa suokha hmuo aw vyi," a ta.
13 Iema ta Piter hne Johan riephana zya kha ama hmung tiyta hne caa a the lipa cawsaa cakhawpa ama cuona zya kha ama pachang tiyta ama nang ta uo te, iema ca Zingsuv viesaa ama cuopa kha amaa kya thyi pakhaa.
14 Ama patluo sa papaa amaa thaa lie a daapa kha ama hmung thluo nakawta khaapahmuo i riypa hnyi vayi.
15 Cacuonakawta lucuotuv tie kha ing chung taata papya yite iema selaw ta capa kaw ca amaa rue pakhaw.
16 Pakha hne pakha kha, "Hingpa cawsaa zaw hing tuokhaatama ma tue'a ung? Iema ta kharuehaa hmang lepuv ama tuepa kha Jerusalem lie a awpa bangkhuo ta ama pachang diy nakawta i khu'apa cata a cuo hyi va, amaa ta.
17 Cuorasala hing hmang kaw hing cawsaa hraw luo a ze hryly li riypata, hing cawsaa zaw hing Zingsuv ming ta ahung'a lie hmuo bie ri'a va tli ungciy tapata khuosa ta thlu'a ungpuv," amaa ta.
18 Cacuonakawta iema kha ku yite Zingsuv ming ta bie ri li tli riypa hne pacuv li tli riypata bie ama pi.
19 Cuorasala Piter hne Johan ta, "Khazing hmiekunglieta niema bie a ngiepa ma a pha vie aa, Khazing bie a ngiepa ma a pha vie aa tapa kha niema ta bie chi tie ung;
20 tahematapakieca kiema ca ma hmungpa hne ma thyipa kha ri li pata aw khu'a va puv," tapata ama palie.
21 Cawsaa bangkhuo ta hmang a cuopa kawlie kha Khazing ama pathuosa nakawta iema duotena riypa kha a luo hmung khu vayi. Cacuonakawta ama pachiypahuo khu taata iema ca ama pathlie.
22 A cunglie tluona kharuehaa hmang tuepa pata a cuopapaa hing kung sawliy hlyi a tapa tana a cuo.
23 Ama pathlie khu taata lucuotuv tie ca ama viesaa tie'a luo kha vaa yite tluobyi tie hne uvthyi tie ta ama changpa bie kha ama changpachaa.
24 Ama thyipa hneta Khazing'a luo kha khuopuv ta u yite, "Alesyipa Abyipa, alyi hne avuo, riyliy hne a chunglie a awpa bangkhuo a satuvpa,
25 na Thlaa Pathe hmuo pata na changtaapanote 4:25 Or Saata mingpa David'a lie bie za ri cate,
'Khaapanakawma Jentail ming ca ama hihaa te,
cawsaa zaw ta a cuo lipa khue ama rue?
26 Abyipa hne Messiahnote 4:26 Or Khrih a du pata
chuelyi siepahruo tie a daahmang la yite,
uvtuv tie hne amaa hmya pakhaw,' na za ta.
27 Cahaa cata hingpa khy chunglie hing Herod hne Pontius Pilat ca Jentail ming'a nata Israel ming hne khata Messiah ta naa tlawpa, a pathepa na saatanote 4:27 Or Changtaapa Zingsuv a du riypa khata,
28 nama ta a vya aw riypa na za rue ciepa hne na za thli ciepa bangkhuo kha a tling riypata amaa hmya pakhaw sasaw.
29 Cacuonakawta, Abyipa, iema pachiypahuonapa kha za pachang thi la, na changtaapanote 4:29 Gk Sii zaw ta riepha ciemuo pata na bie ama ri khu riypata zaa bya thi tie yi.
30 Cawsaa tluona riypata na buo ca pazuu la a pathepa na changtaapanote 4:30 Or Saata Zingsuv ming ta pahmungsana hne kharuehaa hmang ca pa-aw sa thi tie," ama ta.
31 Thlaa ama chuo khu pahne amaa hmyanapa ing ca a cahang te, Thlaapa Pathe ta bi yite Khazing bie kha riephana hneta ama ri.
32 A zangpa bangkhuo ca ama buv yalya ta ama pathiypalung hne ama ruena a lu te ahungtahmuo ama hnyipa kha kama huopa ta lipa yi ta chechiy bangkhuo kha amaa hraw.
33 Lucuotuv tie ta Abyipa Zingsuv thupakhaana kha cahrana hne khuopuv ta ri yite iema bangkhuo kha Khazing ta thluechiy a hluvsa ta a pi yi.
34 Iema hraw lieta aa huna lie aa phahlapa aw vayi, tahematapakieca ama hnyipa alyi hne ing bangkhuo kha zaa yite, ama hmungpa tuokaa kha
35 lucuotuv tie phyi thabaw luo ama vya pahmya. Lucuotuv tie ta pakha cyicuo kha amaa huna haata ama re.
36 Cahaa cata lucuotuv tie ta Barnabas (a siyluo ca thaazuo pituv saacapaa) ama tapa, Saipras lie a puvpa Levi ming Josef ca
37 a hnyipa a lu kha zaa te, a hmungpa tuokaa kha vya cyi te lucuotuv tie phyi thabaw lie kha a vya chi.