24
Ningpangaa khu taata tluobyilecepa Ananias ca uvthyi chekha'a nata sihni Tertullas hneta muokiybyipa'a luo kha Paul sue ama phawna bie kha ama chang. Paul amaa vya ngiekhyipa hneta Tertullas ta hinghaahingta suephawna bie kha a ri:
Abyipa, Nama thueta diena chunglie cuo syipuv vya aw pate, na singna thueta hing cawsaa zaw cuo hingta pare riypa a hluvpuv pare pata a cuo. Hingpa bangkhuo hing hmangting lie a awpa kiema bangkhuo ta ma palung aa tluokhyi hringhruo. Na cuo kha a syituv ca lapa'a kie ang tapata i ri riypa bie hing a pachangna chung ta vya ri'a ang te naa na thliepa thi la tapata icaa nue. Hingpapaa hing zaapuv hrawlie hnaahnawna a chiykhyituv, chuelyicung khy ting lie a awpa Judah ming hrawlie hnaahnawna a aw riypata pasutuv hne Nazareth buv ama tapa luochiytuv tana a cuo. Biena-ing zaw kha papyapalyi aa chie nakawta ma patuv pata a cuo. ( Ma phungbie haata bie ripa pa ma khing raalaa pata riebyilepa Lusias ta kiema kuv taakhata hruohra ta malie chuv te ama sue a phawpa tie kha nama hmie luo chiy riypata naw malie a pi.)note 24:7 Hluo vie caa-uv lieca rina tluo 7* hing aw vyi. Ama hing bie na hiehriy kieca sue ma phawnapa bangkhuo hing a sie vie ta na pachang aa," a ta.
Judah ming zaw ta suephawna lie kha vaa pahlaw yite ama ripa bangkhuo hing aa hmuopa se tana a cuo ama ta.
10 Muokiybyipa ta Paul kha bie ri la ta te a kuv a va pazu tiyta, Paul ta:
Nama ca hingpa mingphang cunglie hing kung syipuv chung bieripatuv byi na cuo tli tapa kha i pachang nakawta, i sue lina kaw hing palung tluosa pata i ri aa. 11 Na pachangna haata, Jerusalem luo Khazing bie riypata i khawnapa hing ning hraa hlyihning laata syi vie valie. 12 Iema hingta biena-ing chunglie pakhakha hneta bie maa ipa cuose, apungna-ing chunglie'a nata khy chunglie ta cawsaazaapuv kha pasu pata hnaahnawna i tuepa zaw na hmung vayi. 13 Sue ina phawpa zaw yi hingma aa hmuo hrahring tapata na hmielie hing ri khu tange'a vayi. 14 Cadyiseca, na hmiekunglieta i cuo thluo tapata i ri khingpa ca, iema ta a sichiepa buvthaapa ama tapa, Phungluo haata ma mingchingmingvuo tie ta amaa zaa biepa Khazing kha abie ang te, profet tie caa-uv lie aa capepa hne phungbie chunglie'apa bangkhuo kha i zang. 15 Iema zaw amaa nguopuo pata a cuopa, cawsaa hing a phapa hne a chiepa hne thiyna taata ama thupakhaa aa tapa kha Khazing'a lieta a nguopuona i hnyi. 16 Cacuonakawta Khazing hmielie hne cawsaa hmielieta chiephathleduona palung pathesapa ta i hring khuna riypata i zue pari. 17 Kung a syi myarya khu taata i mingphang tie abyana phya riypa hne Khazing'a luo hriykhungri riypata Jerusalem luo hing i vya chiy. 18 Capa hmang i tue nguoluo ning, phung haata a pathena i tue khutaa khata biena-ing chunglie na hmung yite, capa ning ca cawsaazaapuv zaw aw vayi, hnaahnawna suokha hmuo aw ra vyi. 19 Cuorasala Asia ruo taata Judah ming chekha aw yite, kama kha sue ina phaw khing kie yi ca nama hmiekung luo hing a vaw pata sue ina phaw riypa yi a cuo. 20 A cuo li kie hingpa lie a awpa tie hingta bierituv phuv hmielie i daa ning hing khaapa suena ma i tue tapa kha ri yi se. 21 Ama hmielie i daa ningta hmang suokha tuv ca i ripa a aw, caca a thiypa tie thupakhaana kaw cuote capa kawlie cata ata ning na hmiekunglie i daapa hingta a cuo," a ta. 22 Cuorasala capa Phungluo kaw ca a phata tah a pachangpa Feliks ta a bie ca pachuo te, "Riebyilepa Lisias a za chiy taatana na bie ica ripa aa," a ta. 23 Cakhutaacata riebyipa kyihuo khata thaw a tlapa tie khungcawna ing lie chi riypata naw pi te, cuorasala hyazang vie ta chi riypa hne ama kha aa huna lie ama mangsang the riypata a vya tawpa a viesaa zaw kha pakha hmuo thlu li riypata a chang.
24 Ning a cawta a rupa khiy ta, Feliks ca Judah zaanung ta a cuopa a napuvnung Drusilla hneta a vaw yite Paul kha ku te Khrih Zingsuv zangna kaw a ripa kha naa ama thlie. 25 Paul ta adangna kaw, pangpa a cadangna kaw, a vaw riypa bierina kaw tapa tie kha a ri tiyta Feliks ca a thlaa zang te, "ata hing ca cakuo caw tie, cuo i hnyi taata ica ku pakhaa aa," a ta. 26 Feliks ca, Paul ta tuokaa ina pi thlu aa tapata a nguopuo nakawta ata'a na ata tah a taw te bie aa rue.
27 Kung hning khu taata Feliks ca Porsias Festas ta aa thle. Feliks ta Judah ming palung a patluo khing nakawta, Paul kha thaw-ing lie a thuse siy.