15
1 Judea taata cawsaa chekha ca Antiok luo a zuv yite, "Moses phungbie haata vangdaw namaa te li kieca khuona hmung khu'a va ungciy," tapata zangtuv uvnu zaw kha ama pacuv.
2 Capa pacuvna ca Paul hne Barnabas ta khuopuv ta ama i. Cacuonakawta Paul hne Barnabas, hne zangtuv chekha kha a tlaw yite lucuotuv tie'a nata khrihsaa uvthyi tie hneta capa kaw ca a ruepakhaw riypata Jerusalem luo ama pathlie.
3 Amaa tha ning kha khrihsaabuv ta pathlie yite Fonisia hne Samaria ruo kha capiepaa yite ama si. Jentail ming ta Khazing ama vya zangna kaw kha pathyisale yite capa thuohlaa cata zangtuvnote 15:3 Gk Uvnu zaw kha khuopuv ta ama palung a patluo yi.
4 Jerusalem luo ama chiy tiyta Khrihsaabuv hne lucuotuv tie, hne khrihsaa uvthyi tie ta alawna hne cuhluo yite iema'a lieca Khazing rehriena kha a tlingsa pata ama pathyi sa.
5 Cuorasala Farasi phuv ta a cuopa zangtuv chekha a daa yite, "Iema cuo hing taca vangdaw a te riypa hne Moses phungbie ama ziy riypa ca a hu hrahring," tapata ama ri.
6 Hingpa bie ripakhaw riypata lucuotuv tie hne khrihsaa uvthyi tie ca amaa hmya.
7 A syipuv amaa i khu taata Piter kha a daa te, "Uv zaw nu zaw, nama pachangna haata, Jentail ming ta thuophaabie kha thyi yite ama zang khuna riypata, iema'a luo capa thuophaabie chang riypa cata hluo vie taakhata Khazing ta kama hing niema hraw taata i naa tlaw.
8 Cawsaa pathiypalung a pachangtuv Khazing ta kiema'a lie a tuepa haakhata iema kha Thlaapa Pathe pi yite tehte a khuo yi.
9 Zangna ta ama pathiypalung kha pathe sa te iema hne kiema a lala lie kha pahlyipalena tue vyi.
10 Cacuonakawta khaapanakawma ma mingchingmingvuo tie zaw ta cuose, kiema ta cuose, ma phya khu lipa hmangriypa ca ziytuv tie ruetung lie khang ung cate Khazing kha dyapasya nama khing?
11 Cuovyi, Zingsuv Khrih vihnyina tana khuona ma hmung aa tapa te ma zangpa haahingta muo iema zaw ama cuo ra'a ta," a ta.
12 Barnabas hne Paul ta, Khazing ta iema hmuo pata Jentail ming'a lie a tuepa pahmungsana hne kharuehaa hmang kaw ama ripa kha naathlie yite a hmyapa bangkhuo ca duokaring khata ama aw.
13 Bieri ama patlung khu taata Jeim ta, "I uvnu zaw,note 15:13 Gk Cawsaa zaw, uvnu zaw naa na thlie tie ung.
14 Simon ta, Jentail ming kha Khazing ta khatluv ta kawpacuo yite ma iema hraw taata cawsaa chekha kha ama ming riypata aa tlaw yi tapa kha malie a chang pasie tli.
15 Capa bie ca profet tie bie hne khata aa chiyhne. Caapathepa ta:
16 Hingpa khu taahingta vya kaa pakhaa ang te,
Aa lie ciepa David ing kha i padaa pakhaa aa.
A rana taakhata sa pakhaa'a ang te,
I padaa pakhaa aa.
17 Cacuonakawta mingphang hrangpa bangkhuo ta
Abyipa kha huv'a yite,
Jentail ming bangkhuo ta i ming kha ina u'a yi.
18 Hluoning taata hing hmang hing tue te
a pachangtuv, Abyipa na a ri," a ta.
19 Cacuonakawta kama i ruenapa taca, Khazing'a luo a vya maapa Jentail ming hing hmangriy pi kha ungsiy,
20 cuorasala caa paphya ung sala, kuvtuezuv ama bienapa saa ca a pyalyi nakawta ce li riypa, aparuvsuena tue li riypa, hne a rue hmi pata ama thiepa saanote 15:20 Hluo vie caa-uv hrangpa lieca, a rue cadiepa ta thiepa bangkhuo taata,'* tapa hing aw vyi. hne thiy bangkhuo ning li riypata chang hriy ungsiy.
21 Tahematapakieca khypuv ting lie kha kung syipuv chung, Moses phungbie kha Sabbath ning kyry ta apungna-ing lie za ri pata a cuo tli.
22 Cakhutaata lucuotuv tie, khrihsaa uvthyi tie hne Khrihsaabuv yalya palung tlingna ta iema hraw taata cawsaa a tlaw pata Barnabas'a nata Paul hneta Antiok luo pathlie riypa kha ama palung a tling. Iema hrawlie luochiytuv ta a cuopa Barsabbas ama tapa Judas hne Silas kha a tlaw yite,
23 iema hne cata a raw luo caa hing ama paphya:
"Kiema lucuotuv tie hne khrihsaa uvthyi tie, nama uvnu tie ta Antiok, Siria hne Silisia lieta a awpa Jentail ming zangtuv uvnu bangkhuo'a luo bie a changna caa maca paphya yi.
24 Kiema hraw taata a pyapa cawsaa chekha ta, kiema ta va ri ungla ma ta lipa yi ta nama palung riethyi riypa hne chachiychaba riypa bienote 15:24 Hluo vie caa-uv hrangpa lieca, Vangdaw a te hrahring'a ung cate phungbie nama ziy hrahring aa* a ta. ama kya ri tapa kha ma thyi.
25 Cacuonakawta, zaapuv palung tling pata cawsaa kha a tlaw pate, Barnabas'a nata Paul hneta niema'a luo pathlie riypata bie ma chi.
26 Iema pahning hing Zingsuv Khrih cuota ama hringna pinguona te ta re a hrietuv ma duepa tana ama cuo.
27 Judas hne Silas kha niema'a luo pathlie pata cuo yite iema palyipakaa hrahring ta capa bie ca a ca chang'a yi.
28 Thlaapa Pathe hne kiema ta a raw luo aa husapa ziy riypa khu taahingta a hrangpa hmang aa riypa nama cunglie khang riypata khing va puv.
29 Namaa cadang riypa ca: Kuvtuezuv amaa bienapa saa ce'a va ungciy; saathiy ning'a va ungciy; a rue hmi pata thiepa saa ce'a va ungciy; aparuvsuena tue'a va ungciy. Capa bangkhuo taacata namaa ve khu kieca hmangpha ta a cuo aa. Nama tluo pata," ama ta.
30 Cacuonakawta iema ca pathlie yite Antiok luo ca ama si. Zangtuv bangkhuo kha pahmya yite caa ca ama pi.
31 Caa ca ama ri tiyta thaazuo ama pipa cunglie ama palung a tluo laalaw.
32 Profet ta a cuopa Judas hne Silas zaw ta zangtuv tie kha khuosa ta pasu yite thaazuo ama pi.
33 Cuo syipuv ama aw khu taata zangtuv tie ta a pathlietuv tie'a luo kha diena hneta ama pathlie pakhaa.
34 (Cuorasala Silas ca capa lieca a ngaa siy.)note 15:34 Hluo vie caa-uv hrangpa lieta rina 34* hing aw vyi.
35 Cuorasala Paul hne Barnabas ca Antiok lie kha a ngaa yite cawsaa hrangpa hluvpuv hneta Abyipa bie kha pacuv yite ama chang.
36 Cakhutaata a ru li pata, Paul ta Barnabas kha, "Kaa sala Abyipa bie ma za phu cienapa khy bangkhuo lieta zangtuv tie kha tlawle pata khaapama ama lu tapa kha mangle yi siy," a ta.
37 Barnabas ta Marka tapa Johan kha iema'a lie a chiylepa a khing.
38 Cuorasala Paul ta, Pamfilia lieta za thuse yite iema hne re a hrie hne lipapaa kha a chiyle riypata khing vyi.
39 Khuopuv ta a ipuo yite iema zaw amaa che. Barnabas ta Marka kha a la te Saipras luo kha tiypalaw ta ama si.
40 Cuorasala Paul ta Silas kha a tlaw te zangtuv tie ta Abyipa vihnyina chung luo ama pi khu taata ama si.
41 Siria hne Silisia ruo kha cahraw yite khrihsaabuv kha thaazuo ama pi.