1 Judah pe lie a awpa lucuotuv tie hne zangtuv tienote 11:1 Gk Uvnu zaw ta Jentail ming na Khazing bie a cuhluo ra yi tapa kha ama thyi. 2 Cacuonakawta Piter kha Jerusalem luo a khaw ca vangdaw a tepa zangtuvnote 11:2 Gk lieca zangtuv* tapa hing aw vyi. tie ta caw-yi yite, 3 "Khaapanakawma vangdaw te lipa tie a khe yi cate iema hne sa na ning hne yi?" ama ta. 4 Cakhutaata Piter ta ama kaw kha suokha hnang suokha ta chang yite, 5 "Joppa lie thlaa i chuo nguoluo ning kha muocuo suokha i hmung. Vuoruo taa khiy ta a kiy kiy paliy a awpa pang kusapa suokha kha i thaa lie ama za pachung. 6 A ngieta tah i mang pasie ca, phyipaliypa ruosaa hne ingzue sahring, saahruo, aa thiy ta a thiylepa saruopa, hne pavaa zaw kha i hmung yi. 7 Ueryi suokha zaw kha thyi ang te, 'Piter, thu la, thie yi la ning tie,' ina ta. 8 Cuorasala kama ta, "Abyipa, cuo the'a vyi; a pyalyipa hne a pathe lipa suokha hmuo i pakaa luo a ngie buo vyi," i ta. 9 Cuorasala vuoruo taa ueryi a yihningnapa thyi pakhaa ang te, 'Khazing ta a pathe a tapa kha nama ta a pya ta'a vaciy,' ina ta. 10 Cahaa cata yi thung a cuo khu taata a bangkhuo ta vuoruo taata amaa zaa da pakhaa. 11 Capa cuota liecata Sisaria taata vya pathliepa cawsaa pathung ca ma awnapa ing luo kha ama vya chiy. 12 Thlaapa ta iema hne si riypa hne iema hne kiema a lala lie pahlyipalena tue li riypata ina chang. Hingpa uvnu pacaruv tie hne hingta si pakhaa pate Kornelias ing luo ca maa ngie. 13 Ama ta a ing chunglie avuoming pakha zaa daa te, 'Joppa luo kha cawsaa pathlie yi la Piter ama tapa Simon kha va paku sa yi; 14 nama hne na chungkhue yalya ta khuona nama hmung riypata ama ta thuophaabie kha aca chang'a yi,' a tapa kha malie a chang. 15 Iema'a lie bie ri hruo i thu pahne a hruothu ningta kiema'a lie a cuopa haakhata iema cunglie kha Thlaapa Pathe a za cung. 16 Cakhupahne Abyipa ta, 'Johan ca tiy ta tiynawna kha a pi, cuorasala niema ca Thlaapa Pathe tana tiynaw pata nama cuo aa,' a za tapa kha i kya thyi.' 17 Zingsuv Khrih ma zang nakawta Khazing ta malie a pipa lasaw kha iema zaw a pi ra kie yi ca Khazing kha pakhuo khu riypata kama ca ahung tama i cuo?" a ta. 18 Capa bie ca ama thyi tiyta vielie riypa hnyi li tlipa yi ta, Khazing kha pathuosa yite, "Khazing na Jentail ming zaw hing sue a ngiepachiy pata hring riypa cuophaa a pi ra yi," ama ta.

19 Steven kawlieta hrisaathieruena ang yite a chepatlaapa tie kha Fonisia, Saipras hne Antiok te khata chiy yite Judah ming'a lie dyi kha thuophaabie ama ri. 20 Cuorasala iema hraw lieca Saipras ruo ming hne Sairin ming aw ra yite iema cata Antiok luo kha si yite Abyi Zingsuv kaw Thuophaabie ca Grik ryi a cyipa Judah mingnote 11:20 Hluo vie caa-uv lieca Grik ming* a ta.'a lie zaw kha ama phu. 21 Abyipa cahrana ca iema'a lie aw te cawsaa hluvpuv ta zang yite Abyipa'a luo kha amaa pali.

22 Capa thuohlaa ca Jerusalem Khrihsaabuv ta thyi yite Barnabas kha Antiok luo ca ama pathlie. 23 Antiok luo ca chiy te Khazing vihnyina kha a hmung tiyta a palung tluo hringhruo te iema kha ama palang ta Abyipa'a lie kha zangtluo aa tlasa pata ama aw pari riypa hne amaa pipase pari riypata a pasu yi. 24 Ama ca cawsaa phapa, Thlaapa Pathe hne zangna ta a bipa cuote cawsaa hluvpuv kha Abyipa'a luo a chiy yi.

25 Cakhutaata Barnabas ca Saul kha huv riypata Tarsas luo kha si te, 26 a hmung tiyta Antiok luo a vya chiyle. Kung kha chung bangkhuo Khrihsaabuv hne khata a taw yite cawsaa hluvpuv kha ama pacuv. Hingpa Antiok lie hingna ziytuv tie kha, "Khrihsaa," tapata ama za u taa.

27 Khapa cuo ning kha profet chekha ca Jerusalem taata Antiok luo kha ama si. 28 Iema hraw taata pakha, a ming Agabas ama tapapaa kha a daa te chuelyi cung bangkhuo ta khuopuv ta cakuo a tlung aa tapa kha Thlaapa cahrana ta a rilu. (Capa cakuo ca Klaudias siepahruo a cuo ning khana a tlung). 29 Ziytuv tie khata iema ama ta khuna cyicuo ta Judah ruo lie a awpa zangtuv tie kha a byana pi riypata khue khuo yite, 30 byanapa ca Barnabas hne Saul kuv ta khrihsaa uvthyi tie'a luo kha ama paphya.