3
Gootu: da" yoeb myang moo Aseing da" moug: lagyoo: shidkhoin" moo yab jo, da" khainjung moo" Yoshua ri Aseing gi ngoo ri toin" shid. Satan gi nyang: ri yooboo foin: wa shid re" Yoshua da" anam moo yab jo, ziri myang. Aseing da" lagyoo: gi satan ri ?Satan we"- Aseing gi nang ri dam kaid baja". Yerusalem ri jheddab da" Aseing gi nang ri dam byid: baja". He: yug gi myikhyoem' mo lang: she: yu to" da" myizoo" te" zi nghoid? ga: tid.
Hau: uri Yoshua gi aco' ajhoid da" byimi void ci: wigi hau: jang" moo yab jo,. Houg: lang" moug: lagyoo: gi nya: shidkhoin" moo yab jo, da" moug: lagyoo: yiri - ?Yoshua void ci: da" nheig yu" no da" byimi ri khyoid pyam' byid: ge'? ga: tid. Hougsu" wigi nyang: gi Yoshua ri ?tam" gyoo: we' re" da" yooboo ri ngoo yu pyam' byid: bye:. Ngoo gi byimi seig nang ri byid: foid wa? ga: tid.
Hougsu" wigi moug: lagyoo: gi ?Yoshua da" vhuloem moo gyeung" shang: da" vhuthoeb thoeb byid: ge'? ga: tid. Nyangnu" gi vhuthoeb thoeb byid: lho: byimi seig ri foid byid: bye:. Hau: uri Aseing da" moug: lagyoo: gi houg moo yab jo,.
Hau: thang: ri moug: lagyoo: gi Yoshua ri tid zigi ?Yoem: moo" bo da" Aseing gi hidsu" ga: tid. Nga" tarha" khyoo: moo nang cang so" lho: ngoo nang ri ab byid: to" da" moo" nang zei: nghoid rigi nang gi nga" yhoem: moo" yo' yhoem: vang" ri vhoeb su: xo' bue" loo wa nghoid. Xo' lho: wigi nga" shidkhoin" moo nyid da" moug: lagyoo: akyu" mho' dang: ri ngoo tam" gyoo: byid: ziyo' dakhyoo" ti" re" akyu" mho' dang: ri we' ngoo tam" gyoo: byid: loo wa zi nghoid. Khainjung zeing Yoshua yo' nya: byencang" yi we"- tam" gyoo: ge'. Nanu" gi ju" loo wa da" bidnyid moo ge da" sagse: yi nghoid. Yu" ge'. Akung: ako' ga: myheing to" da" nga" join thu loo wa nghoid. Ngoo gi Yoshua da" shidkhoin" moo myojid" nyhed loem: dab da" lug yho' ri zhug too" byid: bye:. Yu" ge'. Ngoo hau: lug yho' tho' moo ngoo kyung" lhid" too" eung: ziri lhid" to" lho: hau: mung" mo akhyeing" ashoeb da" khyoo: ri danyid" dam ngoo shoem" pyam' byid: wa nghoid. 10 Hau: da" bidnyid moo nanu" yugkhang" moo" gi nanu" da" zabyid khyam: joem yo' lafoem' gam joem lheung khoem to" da" jang" moo myenjham" khyoo: yo' gau: nyu: khyoo: ri re" bo kham zoo: wa shid re" nyang: nya: da" yhoem: kyoo" cang" yiri khe: boem wa nghoid? ga: Aseing tid nyid.