ZEKHARIA
MOUGSOUG" PUG
(Zekharia)
He: da" Zekharia lhid" pug moo bang bang yo" myang khyoo: eig du bo- (1) Abeing: 1-8 ju" sho' gi Lapi: Zekharia gi BC 520-518 gyoo: moo pe: to" da" lapi: dang: nghoid.
He: jang" moo gi Yerusalem ri doem nyheing tam: da" khyoo:- Noku Yhoem: Moo" ri doem zhug khyoo:- Mangso byumyu" yiri kyeing shang: khyoo: yo' Meshia da" ayo, ju" loo wa khyoo: khaid joem ri myoo: loo boug- yoeb myang myang khyoo: toin' shid to". (2) Abeing: 9-14 ju" sho' gi ju" ri" wa Meshia yo' lo" thang bidnyid moo tarha" dang: phyed khyoo: joem ri lhid" to" zi nghoid.
1
1 Pasha mung" moo Dari gi Khosen koid nyid zi eig zain lhammoo" shid khyab moo Berekhia da" nya: zoo:- Yido da" nya: myid: Lapi: Zekharia jang" moo Aseing jang" mo he: mungdang: ju" re" da:.
2 Meing: byu yiri tid kyoo" wa shid re" Zekharia ri myhang: thang da" yoem: moo" bo da" Aseing tid zigi ?Ngoo Aseing gi nanu" da" phoug" phyid" yiri gye" nheig yoo: nau nyid.
3 Nghoid loug we' ngoo nanu" ri tid nau zigi nga" jhang khyoo: lheing: loo ge'-hougsu" nghoid lang" gi ngoo we' nanu" jhang khyoo: lheung: loo wa.
4 Nanu" da" phoug" phyid" yi yhang: ti" akoid goo"- shid phyang" mo lapi: yigi nyangnu" ri ?Akhyeing" khyoo: moo anyid goo"- yooboo moo" azei: goo"? ga: nga" mungdang: ri tid kyo" boem nghoid loug we' nyangnu" gi atam" gyoo: acang yhi: nghoid ago".
5 Nanu" da" phoug" phyid" yi yo' nyangnu" pyaid moo lapi: pi: mo, gi bain shid: lo" boem bye:.
6 Nga" dei zoo: lapi: yi khyo" wigi nanu" da" phoug" phyid" yiri amyeing" byid: dang: yo' lhid zid" wa shid re" ngoo byid: bye:. Nghoid loug we' nyangnu" gi atam" gyo: boem wigi yau: khi" shau" boem. Houg: lang" ?Yoem: moo" bo da" Aseing gi nya: phajhi" khyau" ziyo' ngoonu" ri kham: moin: da" dam byid: bye:? ga: nung myid yo" boem bye:.
7 Dari Khosen kho" zhung: da" eig zain ein: wa daxe: dakhyab ga: da" (Shebad lhammoo" khyab) eig xe: myid: nyid" myen moo Aseing ngoo ri byid: da" yoeb myang mungdang: nghoid.
8 Aseing da" moug: lagyoo: dayug gi myang: ni tho' moo zhung: jo, ziri ngoo myang. Nyang: gi maithen" seig moo" yoo moo yab jo, da:. Nya: da" thang: moo gi ne zi atuang tuang ziyo' phyu: da" gootu: myang: joem we' bo yab jo.
9 Houg: lang" ngoo gi ?Aseing we" he: zigi ce: noem ri toin" shed zi nghoid lha"? ein: myid: yu" bye:.
Nyang: phug tid zigi ?He: myang: joem ri ci: ein: nau zi ngoo nang ri tid kyoo" ba.
10 Hid: bang: gi mougmyid goem: sho' moo ca: yu" yen" wa Aseing nhang: kaid mo, nghoid? ga: tid.
11 Aseing da" lagyoo: ri nyangnu" hid su" ga: tid ?Ngoonu" gi mougmyid gyab goin" moo cang ca: koem" yu" bye:- yu" ge' mougmyid gyab goin" gi ngei pyoo: yug yoo tung" sam: zoo: tam" to" boem ago"? ga: tid.
12 Houg: lang" Aseing da" moug: lagyoo: tid zigi ?Myhang: thang da" Aseing nang gi Yerusalem yo' Yuda mung" mo voozoo: voozeing ri nheug yo: zi akhid" nyhed xi: zain nghoid bye:. Khamyhang ju" sho' nang nyangnu" ri re" da" nheig khyeug khyoo: atoin" shid loo: za: nyid nyid wa la"?.
13 Ngoo yo' doem go" nyid da" moug: lagyoo: ri Aseing gi ge ziyo' nheig teing dang: phug tid lho:
14 Houg: lang" ngoo yo' doem go" nyid da" moug: lagyoo: gi ngoo ri hid su" ga: tid. ?Yoem: moo" bo Aseing tid ziri tid fu" loo" we'. Ngoo gi nga" younglho' da" Yerusalem voomoo" ri gyi" sho' jheddab lho: nheig khyeug nyid.
15 Ngoo gi nga" da" byumyu" yi adang moo ju" loo wa da" nheig joem: yo: khyoo: ri zeing: kham nyid uri yug yoo thung" nyid da" byumyu" yigi nga" byumyu" yi kham zo: da" kyi" khyeug khyoo: ri je" gyi: sho' koid boem
16 Houg: yoomo ngoo gi nheig khyeug ziyo' Yerusalem shoid khyoo: doem phug loo bye:. Nga" yhoem: gi houg: moo zhug shi" wa zi nghoid. Yerusalem voomoo" ri we' nyheung koid shi" wa? ga: tid.
17 Moug: lagyoo: gi ngoo ri hidsu" ga: tid fu" nhang: shi" ?Yoem" moo" bo Aseing Mangsoo gi nya: voomoo" joem ri doem nyid pyo loo nhang: lho: nyang: gi Yerusalem ri doem pang" thoug wigi nya: voomoo" bue" loo nhang: ga: tid loo wa? ga: tid.
18 Gootu: yoeb myang moo ngoo gi nulo: khyoug: myid: loem: ri myang.
19 Ngoo yo' doem go" nyid da" moug: lagyoo: ri ?He: khyoug: gi ci: ein: nau zi nghoid lha"? ein: myid: bye:.
He: zigi Yuda mung"- Israela mung" yo' Yerusalem mo bang: ri khaid sain" kaid da" mougmyid yoem: so' joem nghoid? ga: tid kyo".
20 Hau: thang: ri Aseing gi ngoo ri baid du ci: da" moo" koid mo, myid: yug ri toin" shid.
21 ?Hid: bang: gi ce: noem koid wa bang: nghoid lha"? ein: ngoo myid: yu" ri nyang: tid zigi ?Nyangnu" gi Yuda mung" ri mhoin' pyam lho: hau: byumyu" yiri khaid thu pyam wa ga: ri" mo, ri kyug nhain' lho: ung: zoo: wa ga: ri" mo, nghoid? ga: tid.