1 Mung" dain ri vhoeb khang" nyid bang: yo' amyeung" akhang' ci: bang: da" vhoo: moo tam' gyo: nyid wa ziyo' ge da" moozoo" jid: zoo: jo, moojo, ri zei: soo, wa jen" jen" nghoid nyid wa shid re" re" da" byu yi ri tid poin" nyid we. 2 Nang ri nghoid loug we' age khyo" lu, wim gei sang: da" dang: ri atid loo: za: myenjham" ngeipyoo: tung" zoem" khau: veing" goo" wa ziyo' khanham we' byu dangain" bang: ri nu" nham' nheigloem: shed nyid baja"- nyangnu" ri tid poin" nyid we. 3 Khasu" wim gari shid phyang" gi ngoonu" nyang: we' myid fang: boem- atam" gyo: ziyo' shoid vhang: khyoo: dam: dam: bang: nghoid nyid boem. Ngoonu" gi aco' ajhoid ziyo' mougmyid pyo: da" khyoo: aja: ja: ri cang lo yu" boem bye:. Hau: khyoo: mo join we' nghoid nyid boem bye:. Ngoonu" moo khanham we' anoug, angei go" ziyo' noo" goo" zoo go" ziza: bo nyid boem- gootu: byu yi ngoonu" ri anoug, angei ziyo' dakhyoo" ti" ngoonu" we' subi" ri anoug, angei bang: nghoid. 4 Nghoid loug we' ngoonu" da" khyoid yu Aseing Mangso da" jeju" yo' athang agoin da" nheigloem: thu myhang, lo da" uri gi 5 Ngoonu" gi loem goem khyoo: shau" yu boem bye:. Hid: yhang: ti" loem" jeing" khyo" shau" yu zigi ngoonu" nyang: zei: so' yoem kaid da" ge da" moozoo" daja: ja: mo yo" yu zi anghoid. Ciwim gari nya: da" nheig khyeug je ju yoomo za hid: yhang: ti" doem khu:yu ziyo' sen: gyid yo' cid" kyeing shed" shang: pyam ziyo' nyang: gi nyhang" nu" ri khyoid yu bye:. 6 Mangsoo gi nyhang" ri khyoid yu Aseing Yesu khoug: moo gyeungshang: da" Venyi: ri nyha" da" atho' moo agoin ayu: foid shoin" byid: bye:. 7 Houg su" nghoid nyid da" khyoo: gi ngoonu" gi nya: da" jeju" yo' Mangsoo vho: ngei lho: lhoem: kham: yu mo, yo" bue" lo wigi ngoonu" myid byu to" da" apyaid ato: kangso ri yo" shau" myang kham: yu wa shid re" nghoid. 8 He: da" dang: gi dang: deing khoin" nyang: nghoid bye:- Mangsoo ri loem khoug: bang: gi byu yug khang" mo" shid mo akyu" bo lho: ge lho da" moo" ri zei: wa shid re"

ayo, byid: wa khyoo: ri gooki" lid ayang: koid lho: jhau" shed nyid wa ziri ngoo vho: ngei nyid. 9 Nghoid loug we' ce: akyu" abo da" akoo" afang: ga: myed: da" ngeug se: dang: myid: joem thang ase da" byuxeig shab khyoo: myeing" myoo: yhoo: she: khyoo: yo" tarha" joem ri jang" pyam we'. Khasu" wim gari hau: da" khyoo: joem gi akyu" abo ziyo' akoem: za: danghoid nyid. 10 Byo, gang: go" lo" khyoo: ze" bue" kaid su: rigi atham: thang eig lheung: koo: tid poin" tid kyeung" thang: ri nyang: yo' tei" goo" xo' go" khyoo: ci" we' ayhe: koid loo. 11 Houg: yhang: te" su: gi byo, joem: thang loo" su: nghoid nyid yoomo nya: da" yau: noo yooboo joem gi nya: gung ri nyang: dang: phyed nyid su: nghoid ziri nang se' nyid bye:.

12 Artima ri anghoid lang" gi Tukhiku ri re" jhang khyoo ngoo nhang: kaid lang" Nikapoli voogung khyoo: ngoo ri re" shau" we' Khasu" wim ga ri hau" voo moo ngoo ngam" ayo, nyid: lhid: kaid wa ngoo myid phyed too bye:. 13 Tarha" Sara Zena yo' Apolo gi nya: eig yug gyung: yo" so" loo" wa shid mo ci" we' aca" sho' nya: eig yug ri joeb, joeb, soin' nhang: kaid we. 14 Akhid" nyang: ca" yo nyid akhyoo: joem, ri- yo" joeb, byeung" nhang: sho' nyha" da" byu yi nyang" nu" da" ayo, joem ri ge da" moozoo" ri ci: yhung: wa shid re" jhau" yu goo" baja. Nyangnu" da" kangso dei lo" khyoo: moo ce: phoug" adab kangso age dei nyid.

15 Ngoo yo' dage" nyid bang: dangain" mo, gi nang ri vhu" kaid boem ago loem" jeing" khyoo: moo ngoonu" da" bidnoem yi ri bo vhu" byid: we.

Mangso jeju" gi nanu" dangain" bang: yo' dage" dajo, jo, baja" o".