2
1 Nghoid loug we' nang koem' gi jo da" loem" jeing" khyoo: yo" du veing" go" da" laloem lakhau: nheigloem: sham: shoin" goo" wa khyoo: ri kho" kyo" jhau" byid: ca" nyid.
2 Apyaid gyi: bye: da" phoug" mang: yi ri yhid: ri nheig atei" loo: zid" lhid nyid wa shid re" yug yoo sam" dab ri young" nyid wa shid re" nyang: nya: da" gung ri yo" vhoeb khang" nyid wa shid re" we' jo da" laloem, lakhau: bo nyid a shid re" jheddab myid yo' kham zeung: da" nheigloem: bo jo, wa shid re" jhau" byid: we.
3 Houg: yo' dakhyoo" ti" apyaid gyi: bye: da" phyid" mang: yi we' loem" jeing" wigi tarha" ri phau" cang mo, lu wim gei sang: da" dang: atid wa ziyo' yhid: join abui" loo: za: ge lho, da" khyoo: ri se' jhau" mhoo' mo, nghoid nyid goo" baja"- nang gi nyangnu" ri jhau" byid: ca" nyid.
4-5 Mangso da" mungdang: gi juang" yi gei sang: zi ashoug" baja"- nyangnu" ri we' nyang: tu: nyang: mo pyaid ngi shi" da" myhi' zeing yi gi nyang: nya: da" yhoem: seing: phoo' yo' zooshang: bang: ri jheddab se' nyid wa shid re" we' nyang: nya: da" gung ri se' vhoeb khang" nyid wa shid re" we' nyang: nya: da" yhoem: seing: phoo' yi vhoeb khang" khyoo:- se' cang nyid da" yhoem: seing: myhi' zeing gi yo" bui" wa shid re" jhau" byid: nyid ge'.
6 Houg: yo' dakhyoo" ti" zoolu: yi we' nyang: nya: gungdu: ri se' vhoeb khang" lho: nyid goo" baja" tid poin" tid kyeung" nyid we.
7 Khyoo: khaid gu: khang" moo" zei: so' lo" da" jang" moo nyang: gung nyang: yu" yu ge da" khyoo shid: bue" nyid we' Dain: da" nheigloem: yo' abui" atho'- thain" thain: yhau: gyen: khyo" jhau" poin" khoo" kyeung" nyid we.
8 Nang ri thougtheung loo mo, gi ngoonu" ri ce: khyoo: moo we' ce: yooboo we' ashau" shoo: lo: yoomo sho' thu goo" baja" nang gi sube" wigi yooboo foin: zi ashoug" loo: sho' deingmain" da" dang: joem yo' jhau" byid: mhoo' byid: nyid we.
9 Join, yi gi nyang nya: da" yhoem: seing: yi vhoo: moo tam" gyo: nyid wigi khyoo: khaid gu: khang" moo" moo nyangnu" da" shidkhoin" moo myonhoo: rua jo, sho' dang: aphug tu" loo: za:
10 Khoug" soo" lanyham" daja: we' akoid loo: za: houg: su" koid wa gungkhoo: gi nyangnu" gi khanham we' loem: lug ziyo' dang: zung" bang: nghoid khyoo: ri toin" shid nyid boem ca". He: da" akhyoo" azoo" khyo" wigi nyangnu" gi nyang tu: nyang: zei: ca" da" moozoo" jo, moojo, ri yhada" khyoid khyi: yu Aseing Mangso da" bidbang ri yo" thoin" pang shug boem wa zi nghoid.
11 Khasu" wim ga: ri Mangsoo gi byumyu" bain sho' bang: ri nya: da" khyoid yu jeju" ri thoin" pang ci: shug bye:.
12-13 Ngoonu" gi ngoonu" nya: da- gyi: myhang: da" Mangsoo ein: da" khyoid yu Aseing Yesu Khristu da" myonhoo: phung" yoeb, doug, bang thu loo wa ngi: lho' da" bidnyid ri dalang" nyid tarha" ri aphau" cang nau da" nheigloem: yo" mougmyid ri vhoo: boo: myo, no, da" nheigloem: ri she: pyam wa shid re" we' sam" dab ri young" ziyo' phyoo: phyoo: nghoid nyid wa khyoo:- deingmain" wigi tarha" phau" cang da" kangso dei khyoo: yo' he: da" mougmyid tho' moo shau" nyid wa shid re" we: hau: jeju" tarha" gi ngoonu" ri jhau" byid: nyid.
14 Ngoonu" ri tarha" do, rhue' da" akhyeing" ashoeb yooboo dangain" jang" mo- khyoid khyi: yu wa shid re" ngoonu" gi nheigloem: emyed gyeungshang: wigi nyang: yo' za: te: sen: da" byumyu" bue" lo lho- ge, lho da" moozoo" ri zei: soo, wa nheigloem: vho: ngei byumyu" bui" wa shid re" Khristu gi ngoonu" da" shid mo nya: gungdu: nyang: ab byid: pyam bye:.
15 Nang gi he: da" khyoo: joem ri kho" kyo" jhau" byid: nyid we'. Nang yoem: byid: tid kyeing" tid poin" jhau" byid: nyid da" uri- nang yo" da" amyeung" akhang" dangain" ri ci: we'. Hang" nghoid loug we' nang" ri aphoug" akhyoid, ayu' nge pyam baja".