TITU
JHANG FOIN: KAID DA" MOUGSOUG"
(Titus)
Titu gi tungbau byumyu" nghoid nyid jang" mo- nheigloem: thid lo ziyo' Khristain bue" lo lho: Lagyoo: Polu da" moozoo" moo bo pang" thoug su: dayug nghoid. Titu jhang foin kaid da" lagyoo: Polu da" mougsoug" ri Kreti phung: moo" ri bo yu" wa shid re" nyhed: khyoo too" kho da" nyang ri bo pang" thoug da" vooyam" dayug jhang khyoo: vhu" zhoug lho: lhid" kaid khyoo: khyoo: nghoid. He: da" mougsoug" moo yhau: gyen: da" khyoo: soem" khaid ri tid pang, kyo" nyid.
Xang: shed" moo gi Kreti phung: byu yi byo, yoin" aved asam" joem ri yu" lho: Noku phung: vhujhung: yigi khayhang: te" da" aved asam" boo ca" da" khyoo:- Titu ri tid poin" kaid zi nghoid lho: Khyoo: eig khaid moo gi Phoung: khoug: mo apyaid ngi shi" da" myiyi: nu" yi yo' yug gi nu" yi yo' join yi dangain" ri doem tau" jhau" byid: wa ziyo' apyaid gyi: bye: da" myiyi: yi yo' yug gi ri Titu gi khakhyo" jhau" byid: wa da" khyoo: phajhi" byid: kaid. Lo" thang du moo mougsoug" lhid" su: gi Titu ri Khristain asam" aved yo' sen: lho: wigi phung khoug: moo anoug, angei khyoo:- ngeug goo" yang: go" da" khyoo:- byo, sain" gang: go" lo" da" khyoo: joem ri yo" jang" pyam wa shid re" je ngei pyo: myenjham" ziyo' mangnhung" nyang cang" zoem" khau veing" goo" wa da" khyoo: ri ci" yhoung' loo" ca" khyoo: ri phajhi" byid: nyid.
1
1 Mangso join yo, Yesu Khristu da" lagyoo: ngoo Polu gi mougsoug" lhid" kaid. Mangsoo gi nyang: khyen: yu byu yi da" loem" jeing" khyoo: ri pang" thoug byid: wa shid re" we' nyha" da" loemkhau: khyoo: moo jhau" byid: da" deingmain" khyoo: ri shau" se myang sho' khyoo: toin" shid wa shid re" we' ngoo ri khyen: yu lho: nhang: kaid bye:.
2 Hau: loemkhau: khyoo: gi apyaid ato: kangso ri myid byu da" khyoo: moo ayang: qei" to" zi nghoid. Ase mhoug ase fain" da" Mangsoo gi goonham gooco' mo nyang: apyaid ato: kangso gi ngoonu" ri byid: wa shid re" dang: soo" khoin" byid: too" bye:.
3 Ayo, bidnyid gi byid: da" hau: apyaid ato: kangso ri nya: mungdang moo pang shug to". Hau: mungdang: gi ngoo ri ab byid: bye: yoomo nyha" da" khyoid yu Aseing pyeing: to" Mangsoo mungdang: yo' dakhyoo" ti" hau khyoo: ri ngoo kho" kyo" nyid.
4 Loem" jeing" khoug: moo nga" zoo: gyeing" nyang: nghoid nyid da" Titu jhang khyoo: ngoo he: mougsoug" ri lhid" foin: kaid.
Phoo Mangsoo yo' ngoonu" da" khyoid yu Aseing Yesu Khristu gi nang ri jeju" yo' ngei pyo: khyoo: byid: nyid baja o".
5 Kreti moo zei: ca" shi" da" khyoo: khaid khang" moo" ri goolhoo' joo sho' cang yu" so' nyheung wa khyoo: yo' voo khang" moo" mo phung joem ri vhoeb khang" yoovoin yu wa da" sayen" yi ri cang nyheung too" wa shid re- ngoo nang ri nyhid: too" kho'. Akhid" ngoo tid kho da" dang: soo" khoin" joem ri xoem" too" we'.
6 Hau: phung: sayen" phoo gi ce: yooboo aboo su- myi: dayug za: yoo" su- nghoid ca". Nya: zooyi we' loem" jeing" bang: nghoid ca". Kyang: da" aved asam" yo' dang: atam" gyo: da" khyoo: moo myeing thu da" zooyi age nghoid.
7 Khasu" wim ga: ri phung: vhoeb phoo gi Mangso moozoo" ri yoovoin yu lho: wigi voinvu, nyid su: nghoid yoomo yooboo aboo su: dage koid. Nyang: gi nheigloem: myhang: su: nheig nheug yo: su: yhid" shug noug su: myeing" myoo: yhoo: shi: su: dang: nug nu: su: age nghoid ngi ri myo, no, vhoo: boo su: we' age koid.
8 Nyang: gi being" doo" noug su: ge da" khyoo: ri se' jheddab su: nya: gung ri se' vhoeb khang" su: akhyoo" cang lho: deing, byeung" su: gyeungshang: su: tarha" ri cang su: nghoid ca".
9 Nyang: gi phung: mo jhoug" myeing" jhoug" thui: ri yo' myid coem, veung" da" loem gi su: hau: mungdang ri geing: geing: zei: ci: su: nghoid ca" nyid. Houg lang" nyang: gi hau: deingmain" da" jhau" shid khyoo: yo' byu yi ri yoem: byid: yo" lang: zheung" yu- hau: mungdang yo' azhung" to" da" ngeug se: juang" yi mo, da" shoid vhang: lo" da" khyoo: ri yo" toin" shid wa zi nghoid.
10 Khasu" wim ga: ri- byu myoo" sho' gi gooji yiri nyangnu" gi akhyoo" abo da" dang: join joem yo' tu: phoug tu: lhoin" lho: mhau' fain" jhuphyo' yen" ago". Je" je, gi Yuda noku thung" mo phug lheug vang loo mo, nghoid boem ago".
11 Nyangnu" da" tid sang: nyid boem da" nhoid ri nghoeb pyam byid: boem ca" bye:. Ciyoomo gari nyangnu" gi age jhau" byid: da" khyoo: ri zheung: jhau" byid: boem wigi yhoem: goin" goin" ziri byo, sain" loo" nhang: pyam boem ago". Hau: khyoo: dangain" gi nyangnu" da" asho' ashid: ngei sho: khyoo: za: nghoid nyid.
12-13 Nyangnu" Kreti byu lapi: yi mo dayug deingmain" khyo" tid zigi Kreti byu yi gi khanham we' mhau' akhyeing" ashoeb nei" ziyo' zoo: myo, shug myo, no, mo, nghoid- ga:. Hau: yoomo nang gi nyangnu" ri thain: thain: khyoo" khyoo: shid byid: ca". Houg: lang" she, nyangnu" gi deingmain" da" loem" jeing" khyoo: ri shau" yu boem wa.
14 Yuda yi da" pyeing: dang: mhoomyid: joem ri we' zei: zeung' nghe: khau: khyoo: akoid' loo: wa ziyo' deingmain" khyoo: ri aloem: da" byu yi jhang mo thu' lo da" pyeing: to" dang: soo" khoin" joem ri loem" jeing" nghe: khoug: mo, jhau" byid: ca" bye:.
15 Nyang: tu: nyang: hougsu" gyeungshang: nyid bye: bang: shid re" zi jo, moojo, gi young" shang: jo. Nghoid loug we' nyang: tu: nyang: agyeungshang: mo, yo' Aseing Yesu ri aloem" jeing" bang: shid re" koem gi ce" ja: we' agyeungshang: zi nghoid nyid. Khasu" wim ga: ri nyangnu" da" myid soin: khyoo: yo' nheigloem: ung: khoug: gi anyhoin: athoung" zi zheung: nghoid nyid boem.
16 Nyangnu" gi Mangsoo ri se' boem bye: ga: tid nyid boem nghoid loug we' nyangnu" da" koid moozoo" joem gi nyangnu" ri abo pang" thoug nghoid da. Nyangnu" gi aco' ajhoid zi nghoid nyid boem wigi yu" vho: phoo" adoid bang- ge da" moozoo" daja: ja: ri zei: soo, wa da" yoem: vhoo" aboo bang: nghoid nyid boem.