1 Lo" thang da" bidnyid moo yau: khe" da" ayo, gi ju" loo wa ziri se' nyid we. 2 Byu yi gi nyang: nya: da" akyu" ri za: shoo: mo, myo, no, vhoo: boo mo, nghoid thui: gyoo: mo, nheigloem: myhang: phau: khuang mo, za: bue" loo wa. Nyangnu" gi juang" yi gei sang: yen" mo, myhi' phoo' ri thug theung mo, jeju" ase' boin: mo, noku loem khoug: khyoo: ci: aboo mo, bue" lo boem wa nghoid. 3 Nyangnu" gi nheig ase' khyeig bang: jheddab da" nheigloem: abo boem ziyo' nheig ashid: mo, akhyeing" ashoeb moo" zei: nyid mo, sube" myonhoo: ri lhu: pyang: byid: wa shid re" gei sang; shang pyang: yen" mo, subi" yo' sham: ashoin" wa da" khyoo: acang loo: za: lhoid zoo: lhoid shug cang nyhin" zhoung: yen" mo, athoug" akhyoug: koid yen" mo, ju" lo boem wa. Hau: tho' moo gootu: nyangnu" gi ge khyoo: ce" ja: ri nghoid loug we' avhoo: angei mo, nghoid boem wa. 4 Khoug: zoug" myhang moid, mo, khoug: vhoid' loo: zhu: zoo: noug mo, nheigloem: azung" ziyo' nheigloem: myhang: yoomo phau: khuang nghoidboin: wigi nyangnu" gi Mangsoo ri jheddab wa gungkhoo:- nyang: nya: da" pyo: khyoo: ri je" vhoo: bang: nghoid boem wa. 5 Nyangnu" gi nyha" da" noku thung ri ri atho' dapyam: za: bo cang mhau' boem lho: wigi hau: noku thung" mo, phung" yoeb, rigi ngeug pyam mo, nghoid nyid boem ago". Houg: yhang: te" byu yi ri we' jang" pyam nyid we. 6 Nyangnu" mo dayham" bang: gi sube" yhoem: moo cang vang yen" lho: asi aboin: khyo" ase' myid soin: yu" da" yoem: nu: nyid myiyi: yi ri nyangnu" lo, moo vang sho' mhe' yu ago". Hau: myiyi: yigi nyangnu" shoid lid lo" yooboo yoomo nheigloem: yoolid: voin lho: myid apyo: zoore gungshoo" aco' ajhoid khyoo: aja: ja: moo bo myu: lo" wigi 7 Jhau" mho' khyoo: ri kham: yu wa shid re" kha: nham' we' vhongei yoem: kaid nyid boem nghoid loug we' nyangnu" gi hau" deingmain" da" khyoo: ri se' jhang: jang" khyoo: kha: nham' we' ayo" ju" loo, lo: boem. 8 Akhid" Yanne yo' Yanbre eig yug gi Moshe ri thug theung ngeug pyam ziyo' dakhyoo" ti" he: byu joem we' hau: deingmain" khyoo: ri thug theung ngeug pyam nyid boem ago". Hau" byu joem gi nyangnu" ase' myid soin: yu" boem, loo: yoomo loem" jeing" khyoo: moo byo, yoin" soem" joem: lo" boem, ago". 9 Nghoid loug we' nyangnu" da" oung: doid' lo" khyoo: gi hau: gu" mo jain" lho: myang" sho' yo" kham zoo: goo" wa zi anghoid. Khasu" wim ga: ri Yanne yo' Yanbre eig yug moo bue" lo da" khyoo:- myang thu' lo yhang: ti" he: da" byu yi khayhi' ko" nyid boem khyoo: joem ri we' yu dangain" bang: da" shidkhoin" moo myang thu loo wa zi nghoid.

10 Nghoid loug we' nang koem gi nga" da" jhoug" myeing" jhoug" thui: nga" asam" avoid yo' nga" kangso' dei khyoo: moo myid soin' nyheung lo ziyo' dakhyoo" ti" cang lo" abye:. Nga" da" loem" jeing" khyoo:- ngoo nheigloem: sheung: kham zeung: khyoo:- nga" da" jheddab myid- ngoo yoem: kaid thoug shang" lo da" khyoo:- 11 Nga' da" kyikhyeug, shen" yhen lo da" khyoo: joem ri bo myang bo si' bye:. Antioki voo Ikoni voo Lustra voo joem moo ngoo thoung" shau" da" gyoug pho" shen" yhen pyi: sho: khyoo: yo' ngoo kham zo: loo bye: da" khyoo: joem dangain" ri nang se' nyid gu nghoid bye:. Aseing koem gi hau: khyoo: dangain" jang mo ngoo ri khyoid yu abye:. 12 Gyeing" nyang: Khristu moo kangso dei lho: tarha" ri phau" cang khyoo: moo kangso dei nyid noug mo, hang" nghoid loug we' shen" yhen kyikhyeug da" yaukhi" ri shau" boem wa zi nghoid. 13 Akhyeing" ashoeb da" byu yi yo' mhoug zoo: mhoug shug yen" da" byu yi koem gi- subi" yo" mhoug zoo: lang" nyang: nyang: ri we' mhoug zo: zi doem thoung" shau" wigi akhyeing" ashoeb ziyo' age da" khyoo: moo age da" khyoo: khyoo:- je" je, jhen" vang lo boem wa zi nghoid nyid. 14 Nghoid loug we' nang koem gi jhau" shed da" khyoo: ri kham: yu wigi geing: geing: teing teing loem" jeing" nyid bye: da" hau: deingmain" da" khyoo: moo xo' lho: dacang yhe: loo" we. Re" sara: gi hang" nghoid ziri nang se' nyid gu nghoid bye:. 15 Nang gi zoonu" pyaid mo nyang:- se' da" akhyoo" bo jo, wigi Khristu Yesu ri loem" jeing" khyoo: yoomo khyoid yu khyoo: ri shau" yu wa shid re" khyoo: shid' vhu" she: da" hau: gyeungshang: da" jhoem: mougsoug" ri goolhoo" za: si' bye: su nghoid ziri we' daboin: nyid we. 16 Hau: jhoem: mungdang: dangain" gi Mangsoo nyang: yoem: foin: byid: ziyo' lhid" to" zi nghoid yoomo deingmain" khyoo: ri jhau" byid: wa ziyo' shoid vhang; khyoo: ri we' yooboo toin" shid gyi koid lho: jhau" byid: nyid. Shoid vhang: lo" khyoo: ri so' koid so' nyheung' wa ziyo' jo da" kangso dei khyoo: moo jhau" byid: mhoo' byid: wa shid re" akyu" bo. 17 Houg: yoomo Mangso da" moo" ri voin vu, su: gi ge da" moozoo" ja" khang" moo" ri zei: wa shid re" yoemso byeung" sho' kaid ci: lo" jang" moo zi joeb, loo wa zi nghoid bye:.