TIMOTHI
JHANG FOIN: KAID DA" MOUGSOUG" EIGLOEM:
(2Timothy)
Lagyoo: Polu gi Timothi jhang khyoo: eig lheung: lhid" kaid da" mougsoug" moo bo da" akhyoo" joem gi Polu nyang: ngi shi" da" ayo, moo moo" voin byencang" nghoid nyid da" bo pang" bo thug su: we' nghoid da" Timothi ri phajhi" byid: khyoo: nghoid. He: mougsoug" moo agung kaid lho: lhid" nau, da" khyoo: gi kham zeing: ca" da" khyoo: nghoid. Thoung" shau" nyid da" kyi' khyeug khyoo: yo' aveing" goo" loo: lhoem: thoug shang" nyid bang: dangain" da" shidkhoin" moo Yesu da" khyoo: sagsi kham da" moo" ri je" kyed khyo" kham zeung: nyid wa ziyo' hau" ngeibu: lu dang: khyoo: yo' dang: theung thang" cab, xoug" mo jhau" byid: da" khyoo: joem ri geingteing sho' kham: yu wigi jhau" shed ziyo' ngeibu: lu dang: kho" kyo" yen" da" sara yoovoin, ri goolhoo: za: voinvu, wa shid re" Timothi ri phajhi" byid: yoem: foin, kaid zi nghoid.
Hau: lho: byu yi ri ge khyo" ayo" bui" nhang: da" tam" gyo: nyid mo, ri byo, loo" nhang: da" lasi laleug abo da" akoo" afang: ga: ngeug se: dang: tid mo, da" khyoo: moo bo vang da" gyoug pho" khyoo: ri gye" lhid ca" khyoo:- Timothi ri lhid nhang: nyid. He: da" khyoo: dangain" jang" moo mougsoug" lhid" su: da" kangso dei khyoo: yo' myid soin: yhe: lo" da" khyoo: joem nya: loem" jeing" khyoo:- nheigloem: sheung; kham zeung: khyoo:- jheddab ziyo' yoem: kaid khyoo:- yi: shoo: lug lheung: yoomo noo kham ca" da" khyoo: joem ri Timothi mo khoo" shid: yu wa shid re" yoem: foin: kaid zi nghoid.
1
1 Mangsoo nyang: myid vho: ziyo' dakhyoo" ti" Khristu Yesu da" lagyoo: bue" lho: Khristu Yesu yo' dadeing: daloem: za: bue" nyid yoomo ngoonu" yo" yu wa da" dang: soo" khoin" yo' sen: lho: kangso khyoo: tid fu" kyoo" wa shid re" nhang: kaid zi shau" su: ngoo Polu gi
2 Ngoo jheddab da" nga" zoo: Timothi ri dang: pyeing: kaid. Yha" phoo' Mangsoo yo' nyha" da" Aseing Yesu Khristu gi nang ri nheig khyeug jeju" ngei pyo: khyoo: dabyid: nyid baja" o".
3 Nga" phoug" phyid" yi koid yhang: ti" phug soo" lheig se' da" emyed yo' ngoo loemkhau: nyid da" Mangsoo ri ngoo coung" byid: nyid ngoo gi nyid" ri myen" ri akyu' mho' da" jang" moo nang ri ajang" daboin: so" nyid ziyo' Mangso jeju" ri boin: coung" nyid.
4 Re" da" ngoug byid joem ri ngoo daboin: nyid wigi ngoo moo hau: gau yi khyoo: byeung" loo baja"- nang yo' shau" goo" wa shid mo, nheig gye" nge nyid.
5 Nang gi re" phyid" Lu-i yo' re" myhi' Uni moo xangshid" bo jo, afain" avo da" loem" jeing" nheigloem: nang moo bo jo, ziri ngoo boin: nyid. Nya: eig yug moo bo jo, da" loem" jeing" khyoo: gi nang moo we' bo jo, wa ziri ngoo loem nyid.
6 Houg: yoomo ngoo nang ri lo, ki" byid: lho: aya: tang: byid: uri Mangso jhang mo nang yo" kham: yu bye: da" jeju" jhungshug ri Mangso jhang mo nang yo" kham: yu bye: da" jeju" jhungshug ri xo' lho: wigi dei nyid nhang: shi" wa shid re" nang ri ngoo doem tid poin" kaid zi nghoid.
7 Khasu" wim gari Mangsoo nyhang" ri byid: to" da" Venyi: gi ngoonu" ri gyoug voem, nheigloem: byid: to" zi anghoid. Hau" Aseing da" Venyi: gi ngoonu" ri yoemso- jheddab nheigloem: yo' nyang: nya: da" nheigloem: ri yo" lang: zeung" ci: wa da" yoem: vhoo" byeung" loo nhang: nyid.
8 Hougsu" nghoid yoomo ngoonu" Aseing da" shid re" sagsi kham jang" moo asho' gyoug nyid, thung: loung" jo, su: ngoo yoomo we' nang asho' nyid Mangsoo gi hau: khyoo: ri zei: wa shid re" yoemso byid: to" bye: ziyo' dakhyoo" ti" hau: ngeibu: lu dang; yoomo kyikhyeug yaukhe" kham da" khyoo: moo ngoo yo' dage" shoin" kyi" khyeung, nyid goo"
9 Mangsoo gi nyhang" koid bye: ge da" moozoo" aja: ja: yoomo anghoid loo: za: nyang: myid soin' to" khyoo: yo' jeju" khyo" ngoonu" ri khyoid yu lho: nya: da" byumyu" bue" loo wa shid re" khe: yu to" zi nghoid bye:. Nyang: gi moug: aphain" soo: myid aphain" soo: shi" mo nyang:- Khristu Yesu khyo" wigi hau: jeju" ngoonu" ri byid: too" bye:.
10 Nghoid loug we' akhid" gi nyha" Aseing Khristu Yesu ju" gyoo" lo ayo, mo nyang:- hau: khyoo: ngoonu" ri toin" shid kaid bye:. Nyang: gi shid: loo" no lo" da" yoemso ri yoeb, shoung; pyam lho: wigi hau" ngeibu: lu dang; khyo" wigi ashid: abyug lo da" kangso khyoo: ri ci: shug kaid bye:.
11 Hau: da" ngeibu: lu dang: ri tid fu" loo" wa shid re" Mangsoo gi ngoo ri lagyoo: dayug khyo" we' jhau" byid: da" sara: khyo" we' nyheung soin' too" bye:.
12 Hau: khyoo: yoomo he: da" kyikhyeug, shidgyoin noogyoin khyoo: ri ngoo yo" kham: yu nyid zi nghoid. Nghoid loug we' nga" da" loemkhau: nheigloem: gi ngoo moo byeung" sho' bo jo, Khasu" wim gari Ngoo hang" ri loemkhau: nghe: nyid zigi ngoonyang: se' nyid ziyo' ngoo, nyang: ri ab, byid: to" da" ziyoo dangain"- hau: bidnyid ju" sho' zung" lhug goem, coung; too" byid: wam bye" ein: ngoo nheig shid nheigdeig, nyid bye:.
13 Ngoo gi nang ri jhau" byid: bye: deingmain" da" mungdang: ri nang cang loo" wa da" akhyoo: avoid bui" nhang: wigi geing" geing: zei: ci: lho: Yesu Khristu yo' dadeing: daloem: za: koid wigi kangso dei nyid khyoo: moo loem" jeing" ziyo' jheddab da" nheigloem: ri geing: geing: dazei: ci: we.
14 Nang ri loem wigi ab, byid: too" bye: ge da" ziyoo joem ri nyhang" moo bo loung" jo, bye: da" hau" gyeungshang: Venyi: yoemso khyo" dazoem: ci: nyid we.
15 Nang se' nyid bye: ziyo' dakhyoo" ti" Phugelu yo' Heramoge eig yug yo' dage" Asi zoo: moo nyid bang: dangain" mo, ngoo ri she: pyam khare" boem abye: go".
16 Hau" Aseing gi Onesiphuru da" yhoem: bang: ri jeju" dabyid: nyid baja" Khasu" wim ga: ri nyang: myoo" sho' lheung:- ngoo ri nheigloem: yoem: yo" yu nhang: bye: wigi nyang: gi ngoo thung: loung" khyoo: ri asho' su: nghoid.
17 Nyang: gi Roma voogung moo ju" lo" uri ngoo ri amyang ri myang sho' cang myed: sho: yu su: nghoid.
18 Aseing gi nyang: ri hau: tarha" dang: phyed da" bidnyid moo nheig khyeug khyoo: byid: baja"- Ephesu voogung moo nyang: gi ngoo ri khayhi' pang" thoug bye: khyoo: ri nanyang: goo" lhoo: si' bye:.