5
Apyaid' gyi: bye: da" sayen" phoo' ri agyi koid re" phoo' ri yhang: ti": khyo' nyhoem: ji sang: nyid we' apyaid ngi shi" da" zoolu: yi ri gi re mang: re" nhung" ri yhang: ti" zoem" khau: nyid we. Myhi' zeing yi rigi nya: myhi' ri yhang: ti" gyeungshang: nheigloem: yo' tid poin" tid kyeung" nyid we.
Lo, ti" phyeug, nyid da" cougmoo" myhi' yi ri phau" myang: nyid we. Nghoid loug we' cougmoo" dayug yug gi zoo: myiyi: yo" nghoid rigi nyangnu" gi nyang: nya: ekoin deungkhu: shid re" loemkhau: da" noku thung" yo' sen: lho: wigi zei: ca" da" yoovoin, joem ri xangshid" moo jhau" yu nyid goo" baja. Hougsu" koid khyo" wigi nyang: nya: da" myhi' phoo' phoug" phyid" yi ri jeju" toug" byid: goo" baja. Khasu" wim ga: ri hau: khyoo: gi Mangsoo ri vho: ngei nhang: da" khyoo: nghoid. Lo, ti" phyeug, lhoo: nyang: ri yu" goin, cung: wa byu hang" aboo lo: da" cougmoo" myhi' gi Mangsoo ri myid loem" nyid ziyo' nyid" ri myen" ri akyu mho' nyid wigi Mangso pang" thoug wa ziri vho: ngei nyid. Nghoid loug we' aved asam" byo, lho: mougmyid mo pyo: khyoo: riza: sho: nyid da" cougmoo" myhi' gi nyang: dei nyid shi" re lang" shid: mang danghoid' nyid. Nyangnu" ri hang" wigi we' yooboo foin: jang: ajo, baja"- hid: tid to" dang: yo' nyangnu" ri tid poin" tid kyeung" nyid we'. Nghoid loug we' byu dayug yug gi nyang: nya: da" byumyu" akung: ako'- je wigi ekoin deungkhu: byu yiri yu" goin, coung: khyoo: aboo su: nghoid rigi hau: loem" jeing" khyoo: ri ngeug pyam su: bue" nyid lho: aloem" jeing" da" byu dayug tho' mo je wigi akhyeing" ashoeb su: bue" nyid. Apyaid' khyug xi: zain za: ajain" rigi coug moo" myhi' kha: yug ri we' cougmoo" zhayen" moo akaid goo" baja" nyang: gi dalheung: za: lo, xo' ekoin qei" su: nghoid ca". 10 Hau: tho' moo gootu: nyang: gi asam" avoid ge khyoo: moo we' myeing thu nyid su- nya: myid: nya: zoo: yi ri we' voin: tang: se' shu" jhoug" shu" mho' nyid su:- tungbau being" voo yi ri nya: yhoem: moo goo" lhoo: zoo: kham: yu lho: doo" zhoo" doo" jhug su:- Khristain mangnhung" yi yo' sen: lho: zei: ca" da" khyoo: joem ri khyo' nyhoem: da" myid yo' zei: so' voin vu, si su:- yaukhi" kyikhyeig shau" nyid bang: ri- se' pang" thoug su:- ge da" moozoo" joem ri voin vu, xoin" yo" to' su: nghoid ca" nyid.
11 Nghoid loug we' pyaid ngi shi" da" cougmoo" myhi' yi rigi coug" mo" da" zhayen" moo akaid shi" goo" baja"- khasu" wim ga: ri nyang: myid vho: da" nheigloem: wigi doin: jhen" loo yoomo lo, doem xo' lo" rigi Khristu jhang khyoo: doem phoug loo se' nyid. 12 Houg: su" nghoid yoomo nyangnu" gi Aseing ri xang: shid mo wigi byid: too" bye: da" dang: thang" cab, ri she: pyam yoomo yooboo yoo" bang: bue" lo boem ago". 13 Hau: tho' mo gootu: nyangnu" gi dayhoem: mo dayhoem: khyoo: cang vang lam" yen" lho: ayo, ri thang loo" nhang: se' nyid boem. Hau: tho' mo, aje ge da" khyoo: gi nyangnu" atid' eung: da" dang: ri cang tid- gei sang: lu wim, yen" boem ziyo' nyang: yo' ci" we' asen: khyoo: moo cang? vang lhu: lheug, yen" boem. 14 Houg: yoomo gyivoo yi gi ngoonu" da" khyoo: ri age khyo" tid wa joyoo ajo, loo: sho' apyaid ngi shi" da" cougmoo" myhi' yi gi lo, doem xo' lho: zookhu: du yau: ziyo' nyangnu" da" ekoin, ekoin deungkhu: ri- yu" nyheung goin, coung: nyid wa ziri ngoo je" vho: nyid. 15 Khasu" wim gari akhid" lhang" ri cougmoo" myhi' yi dayham" bang: gi satan thang: khyoo: cang loo" wa shid re" byam phoug, lo" boem abye: go". 16 Loem" jeing" da" phung: byu myi: yi dayug gi nyang: nya: da" ekoin deungkhu: moo cougmoo" bue" lo" nghoid rigi nyangnu" ri yu" goin, coung: zei: zho" da" khyoo: koid boem ca, nyangnu" shid re" phung mo yoolid gootu: age byid- houg: su" ri she' phung gi gyeing" nyang: nghe: khoug: jang: aboo lo da" cougmoo" myhi' yi ri yo" pang" thoug wa zi nghoid.
17 Shu" vhu" shu" she: da" moozoo" ri goolhoo: shu" vhu" she: da" phung shu" vhu" bang: gi lhammoo" khyab aphoug" eig zhang kham: yu moin: ein: soin: yu ge nyid. Je" wigi mungdang: jhau" byid: da" khyoo: moo yoem: kaid voinvu, bang: gi houg: su" kham: yu moin: mo, nghoid nyid. 18 Khasu" wim ga: ri jhoem: mungdang: moo gug, nang: nyid da" nu: nhoid moo mhang" kho' yo" zhung" byid: zi anghoid. Hau: lho: moo" zei: su: gi nya: vhookung: phoug" shau" kham: yu wa zi nghoid? ga: wigi tid nyid. 19 Sagsi: kham mo, atham: thang- eig soem" yug abo ri phung shu" vhu" shi: su: ri yooboo foin: dang: ri age loem".
20 Byu gooji yu" gyug goo" baja"- yooboo koid bang: dangain" ri shava byu yi dangain" mo, shidkhoin" moo yau, jhau" byid: ge.
21 Hid: su" tid to" khyoo: ri myonhoo: akhyen: loo nang zei: so' yhe: lo" jang" moo dashoid shoid khyoo: abo dab loo: za: tam" gyo: cang loo" wa shid mo Aseing Yesu Khristu yo' Mangso da" shid moo we' gyeungshang: da" moug: lagyoo: yi shid moo we' ngoo nang ri amyeung" byid: kaid. 22 Aseing da" moozoo" voin vu, wa shid re" hang" ri nghoid loug we' lo, ke" lho: aya: tang: byid: wa ziri akhang:- subi" dakoid da" yooboo moo aye: bo vang lhu"- nang nyang: we' yooboo adab sho' gyeungshang: nyid we.
23 Nang daso' dadam no loo loo wim nyid yoomo am: pham" zo: pyeug, jang" moo bo pang" wa shid re" gyid za: ashug loo: za: zabyid yhid: ri dajhi' jhi dashug nyid we.
24 Byu dayham" bang: da" yooboo dayham" gi bang bang myang nyid zi nghoid wigi nyangnu" da" yau: noo yooboo joem gi nyangnu" da" shid khyoo:- dang: phyed wa joyoo moo yhe: lo" nyid bye:- nghoid loug we' dayham" bang: da" yau: noo yooboo joem gi thang: ri she' bang bang myang lo. 25 Houg: yo' dakhyoo" ti" ge da" moozoo" ri we' bang bang za: yo" myang nyid amyang ase' ri lang'- yo" nghoeb yo" yhoem" too" wa zi anghoid.