5
Yuggi phoo
1 Nga" nheig tei" nga" myhiseig we"- nga" khyam: khyoo: ngoo vang yhi: bye:.
Nga" da" Mura yo' nam pyo: ja: ngoo khyau" zheing" too" bye:.
Ngoo gi nga" byoo: yhid: yo' byoo: yho' ri zo: nyid bye:.
ngoo gi nga" zabyid yhid: yo' nunoug" ri shoug nyid bye: zi nghoid.
Myiyi: zoo: yi
Jheddab bang: we" zoo: ge'.
Nanu" gi jhed myid yo' yed: sho' shug nyid ge'.
Myiyi: myhi'
2 Ngoo yhoeb jo, nghoid loug we' nga" nheigloem: gi gyeung: nyid.
nga" jheddab su: gi khoem" ri ko' nyid ein: ngoo yhoebmo, mo, nyid.
Yuggi phoo
Nga" nheugdeug nga" nheig tei" nga" pheing" kyoug" we"- ngoo ri vang nhang: we'.
Nga" vhuloem gi nghain: jhu" yo' jhu' nyid.
Nga" xam: gi lang" khyoem' yo' bam bam jhu' nyid.
Myiyi: zoo:
3 Ngoo byisheing: khyoid pyam bye:.
Ngoo khasu" wigi dalheing: doem yo" void wa lha".
Ngoo gi nga" khyid: ri cid" yung" cid" lho' too" bye:.
Ngoo khasu" wigi aco' ajhoid dalheing: doem yo" koid wa lha".
4 Nga" jhed gi nya: lo, ri khoem" duang: moo yhoin" kaid wigi
nyang: jhang loo lang" ngoo seing" gug thung" nyid da:.
5 Ngoo gi nyang: vang loo wa shid re" jen" jen" soin' too" byid: bye:.
Ngoo gi khoem" lo, zei: moo zei: zeing uri
nga" lo, yo lo, nyhoug" joem moo Mura xu: dab jo,.
6 Nga" jhed shid re" ngoo khoem" phang byid: nghoid loug we'
nyang: gi bain lo" byug bye:.
Ciwim yoomo nya: thui: ri ngoo gyoo: nau nyid lha".
Ngoo nyang: ri shoo: yu" nghoid loug we' nyang: ri amyang loo:.
Ngoo nyang: ri yoid nghoid loug we' doem tu" da" thui: ri ashoug" gyoo: loo:.
7 Voomoo" ri lhoug zung" bang: ngoo ri myang wigi nyangnu" ngoo ri mi: sho' baid ago".
vooyam khyam: zung" bang: gi nga" byi: ri lang: ceig pyam boem ago".
8 Yerusalem mo myiyi: myhi' yi we"- nanu" nga" jhed ri myang nghoid rigi
nyang: ri ngoo jheddab myid yoomo no nyid ein:
nanu" bo tid kyoo" wa ein: ngoo ri dangsoo" byid: ge'.
Myiyi: myhi' yi
9 Myiyi: yi mo young" thang su: we"
re" jhed gi subi" yo' ci: shai" nyid lha".
Ngoonu" nang ri ngoonu" da" dangsoo" byid: wa sho' nyang: gi
cigyeing" je shai" zi nghoid lha".
Myiyi: myhi'
10 Nga" jhed gi young" ziyo' yoem: bo wigi
damoin moo nyang: dayug kyeing" dabo da:.
11 Nya: myonhoo: gi gyid: yhang: ti" jhoid young" wigi
nya: xam: gi being: lhung" yhang: ti" nghoid wigi
kono moug" yhang: ti" no, nyid da:.
12 Nya: myojid" gi nunoug" yo' cid" young" cid" lho' pyam wigi
gyid lang yam moo zhung: jo, da" pheing" kyoug" yhang: ti" young" nyid da:.
13 Nya: baloid gi macid" yo' nam pyo: ja: byeung" sho' yug da" khyam: yhang: ti"
yu" jhed tung" zi nghoid da:.
Nya: nhoid yid gi Mura xu: byeung" sho' dab da myioeb bain: yo' du nyid da:.
14 Nya: lo, gi gye" young" ziyo' phoug" dab da" lug lo, pain" pain" ci:.
Nya: gung gi Nila yo' shoung: ci: wigi xang: zei jhoid young" yhang: ti" du nyid da:.
15 Nya: khyid: joem gi sheing: lugpyi" dang moo ke" to" da" lugphyu: zeing joem yo' du nyid da:.
Nyang: gi Lebanon boem yo' shamu gam yhang: ti" phung gyi: nyid da:.
16 Nya: nhoid gi babug bug ri gye" coug: nyid da:.
Nya: gung shoo" dangain" zigi ngoo ri ngei nhang: nyid.
Yerusalem mo myiyi: myhi' yi we" he: zigi nga" jhed yo' du nyid o".