4
Hebron moo Abna ri said pyam bye: ga: ziri Sholu nya: zoo: Ishboshed shoug" gyoo: lang" nyang: gi gyoug: nyid ziyo' Israela byumyu" yi dangain" bang: we' gyoug nyid boem ago". Ishboshed jhang Berod mo Benyamin akung:- Rimon da" nya: zoo: tang: Bana yo' Rakhab ga: da" meing: khaid gyiphung: mo zoug: eig yug nyid da:. (Berod gi Benyamin mung" moo bo nyid da:. Hougmoo: nyid bang: gi Gitim voogung khyoo: phang: lo" wigi nyangnu" khanham we' hougmoo: nyid boem ago")
Sholu yo' Yonathan: said pyam zi shoug" uri Sholu da" gootu: akung: mo Yonathan nya: zoo: Mephiboshed gi wim zain nghoid bye:. Yezrela voomoo" moo nya: tang: shid: bye: ga: da" lu dang: ju" loo lang" zooshu" su: gi zooshang: ri koid: vu, wigi phang: loo" bye:. Nghoid loug we' nyang: sung hain: yoomo zooshang: ri vu, phyid khyo' lho: khyid: gyau: lo" byug da:.
Rekhab yo' Bana tang: gi Ishboshed da" yhoem: khyoo: re" lo wigi hau: jang" moo nyid" gung nyang: doug no nyid da" ayo, ri ju" lo boem ago". Khoem" duang: moo sungsoo: pyang" nyid da" myiyi: zoo: gi yhoeb nau lo ziyo' yhoeb lo" byug yoomo Rekhab yo' Bana tang: yhoem: khoug: khyoo: gau" vang lo" da:. Nya: tang: yhoem: khoug: shoid mo Ishboshed yhoeb jo, da" nya: yhoeb yab khyoo: vang lo" wigi nyang: ri lo" said pyam da:. Hau: thang: ri nyang: tang: we' nya: vhuloem ri phyed yu wigi hau: ziri ci: lho: damyen goin" Yodan lang: khoug: khyo" wigi so" yhe: lo" ago" da:. Nya: tang: gi Hebron voomoo" moo khokham koid nyid da" David ri hau: vhuloem lo" byid: wigi nyang: ri ?he: zigi nang ri said wa ga: soin' nyid da" re" gyivoo Sholu da" nya: zoo: Ishboshed da" vhuloem nghoid. Sholu yo' nya: akung: ako' yiri latoo: phug wa shid re" Aseing gi akhid" nyid" nang aseing: khokham ri akhang" byid: bye:? ga: tid da:.
David gi nya: tang: ri ?Yau: khi" dangain" jang" mo ngoo ri khyoid yu da" hau: dei nyid da" Aseing moo ngoo dang: theing to" zi nghoid. 10 Lagyoo: dayug gi Zikla voogung moo nga" jhang khyoo: re" wigi ngei bu: lu dang: tid khyoo" wa ga: myid lho: Sholu shid: bye: khyoo: ri ngoo ri tid kyo" da:. Ngoo nyang: ri myheig yu wigi said pyam bye:. Hau: zigi nyang: tid kyo" da" ngei bu: lu dang: shid re" ngoo nyang: ri byid: da" jhungshug nghoid da:. 11 Yhoem: seing: yhoem: moo yhoeb jo, da" deingmain" su: ri akhyeing" bang: wigi said pyam zigi khayhi' age thang zi danghoid nyid. Nyang: ri said pyam bye: yoomo akhid" re" tang: ri we' ngoo latoo: phug wa zi nghoid. Re" tang: ri he: mougmyid mo said toem" pyam wa zi nghoid? ga: tid. 12 David gi amyeing" byid: kaid wigi nya: gyizoo: joem gi Rekhab' yo' Bana ri said pyam lho: nya: tang: lo, yo' khyid: ri phyed yu wigi Hebron gyid thoem" yam moo yhe: tei" lang" to" da:. Nyangnu" gi Ishboshed da" vhuloem ri koid: yu wigi Hebron mo Abna da" loeb moo yhe: myhoeb too" bye: zi nghoid.