21
David vhoeb khang" da" ayo, khoug: moo soem" zain nyang: gye" thain: da" phang" khoug ju" loo bye:. Houg: yoomo David gi hau: akhyoo: yo' sen: wigi Aseing ri myid: yu" ri Aseing gi ?Sholu yo' nya: ikoin deungkhu: byu yigi byu said da" youg: shoug" nyid da:. Nyang: gi Gibeon byumyu" yiri said pyam da? ga: tid. ( Gibeon byumyu" yigi Israela byumyu" yi mo anghoid. Nyangnu" gi Israela byumyu" yi wigi lhoug zung" wa ga: dangsoo" byid: to" da" Amori byumyu" yi mo akung: zoo: dakung: nghoid da:. Nghoid loug we' Sholu gi Israela yo' Yuda byumyu" yiri myid sung dab nyid yoomo nyangnu" ri phyo' shoin' pyam wa khyo" yoem: kaid loo bye: zi nghoid.) Houg: yoomo David gi Gibeon byumyu" yiri khe: yu wigi nyangnu" ri - ?Ngoo nanu" shid re" ce: noem koid byid: ca" wa lha". Aseing: da" byumyu" yiri nanu" main yo" kaid byid: baja". Nanu" ri koid shoid da" moo" zoo" shid re" ngoo nyheing feing byid: nau? ga: tid.
Nyangnu" gi ?Ngoonu" gi Sholu yo' nya: ikoin deungkhu: byu yi yo' byo, go" khyoo: ri ngei sheing: yo' moo" anau tid loo. Israela byumyu" dayug ri we' anau said loo:? ga: tid.
Houg: lang" ngoo nanu" ri cikoid byid: ca" ein: myid nyid go" lha"? ga: David doem myid:.
Nyangnu" gi ?Sholu gi ngoonu" ri Israela mungdain: khyi khang" moo" moo kangso' dei ziyo' anyid nhang: noug wigi ngoonu" ri phyo' shoin' pyam nau zi nghoid. Houg: yoomo nya: akung: mo yug gi zoo: nyhed yug ab byid: ge'. Aseing: khyen: yu bye: khokham Sholu da" Gibea voogung moo Aseing da" shidkhoin" moo nyangnu" ri lhang" too" wa? ga: tid.
Khokham gi ?Ngoo nyangnu" ri ab byid: wa? ga: tid.
Nghoid loug we' nyang: yo' Yonathan koid to" da geing: teing dangsoo" yoomo David gi Sholu da" nya: myid: Yonathan da" nya: zoo: Mephiboshed ri loid nhang: to" da:. Nghoid loug we' nyang: gi Aiah da" myiyi: zoo: Rizpa mo Sholu shid re" khu byid: da" zooshang: Armoni yo' Mephiboshed ri we' Sholu myiyi: zoo: Merab yo' Mehola voogung mo Barazila zoo: Adriela tang: khu: kaid da" yuggi zoo: wim: yug ri we' khe: yu bye:. David gi nyangnu" ri Gibeon byumyu" yiri ab byid: wigi nyangnu" we' boem gung mo Aseing shidkhoin" moo tei" lhang" too" bye:. Nyangnu" nyhed yug goin" zi dalheing: dam shid: byug boem abye:. Nyangnu" shid: shau" da" ayo, gi Yoono, yham" shid" lo" da" xung" bain lo" nyid ayo, ri nghoid.
10 Hau: thang: Aiah myiyi: zoo: Sholu da" dangcang: myhi' Rizpa gi shid: mang joem jo, da" lugzeing moo" tho' moo nya: shid re" jid: mi yo' zoem" khyam" daloem: koid wigi nyang: gi gug yham" shid" da" ayo, mo zain vang moug: voo yo, ju" sho' nyid nyid da:. Nyang: gi nyid" gung ri ngho' joem shid: mang moo ayo" ri" sho'- myen" rigi kyoem: khoug: gougnyhoug joem ayo" ri" wa shid re" zung" nyid da:.
11 David Rizpa cikoid nyid ga: shoug" gyoo: lang" 12 Nyang: gi Gilead voogung mo Yabesha byumyu" yi jang" mo Sholu yo' nya: zoo: Yonathan da" shooyoug: ri yhe: yu too" bye:. (Yabesha byumyu" yigi Gibeon boem gung moo Philisti byumyu" yi Sholu ri said pyam wigi mang ri tei" lhang" too" kho' da" Bed Shan mung" byu yi seing: da" jang: pa: mo re" khau" to" zi nghoid). 13 David gi Sholu yo' Yonathan da" shooyoug: ri we'- tei" lhang" to" da" byu nyhed yug da" shooyoug: ri we' zheing" yu too" bye:. 14 Hau: thang: Sholu yo' Yonathan da" shooyoug: ri khokham amyeing" dang: yo' dayhang: ti" Benyamin mougmyid Zela mo Sholu da" nya: phoo Kisha da" loeb moo myhoeb too" bye:. Hau: zi dangain" bain thang: ri Mangsoo gi mungdain: shid re" nyangnu" mho' da" akyu" mho' dang: ri tam" gyoo: byid: bye:.
(Ikm 20:4-8)
15 Philisti yo' Israela byumyu" yi agyoo: moo meing: da lheing: doem byo, loo yoomo David yo' nya: byu yigi Philisti yiri meing: yhe: zain: bye:. Meing: dalheing: dazain: shi" ri David myung: dau nyid da:. 16 Ishbibeno ga: da" yoem: moo" boo su: gi eig joid: jain" lid: da" gyid: mid" lham: ri vu, ci: wigi shamcoin" seig riwe' soin' voin ci: lho: David ri yo" said pyam wa yhang: ti" myid: jho: nyid da:. 17 Nghoid loug we' Zeruia da" nya: zoo: Abishai gi David ri re" pang" ziyo' hau: yoem: moo" boo su: ri khaid zain: wigi nyang: ri said pyam bye:. Hau: thang: David da" byu yigi David ri nyangnu" yo' khanham we' meing: zain: jang khyoo: ayhe: wa khyo" dangsoo" too" nhang: bye:. ?Nang gi Israela byumyu" yi da" nheig byu jang: danghoid- nang soem" byug wa ziri ngoonu" avhoo:? ga: nyangnu" tid bye:.
18 Hau: thang: ri Philisti bang: yo' Goba moo meing doem zain: uri Husha byu Sibekhai gi Sab ga: da" yoem: moo" bo su: ri said pyam bye:.
19 Gaba joyoo moo nyang: meing: dalheing: doem zain: uri Bedlehem mo Yaira da" nya: zoo: Elhanan gi yo, gain: pyoung" loem: yhi' bo da" lham: coin" ri ci: da" Gad voogung mo Goliad ri said pyam bye:.
20 Hau: thang: Gad voogung moo meing: zain: ziri vho: ngei da" yoem: moo" boo su: dayug yo' meing: doem zain: goo" bye:. Nyang: gi lo, dashoid moo lo, nyhoug" khyug nyhoug"- khyid: da shoid moo khyid: nyhoug" khyug nyhoug" dab su: nghoid. 21 Nyang: gi Israela byumyu" yiri gyi koid yoomo David nya: mang: Shama da" nya: zoo: Yonathan gi nyang: ri said pyam bye:.
22 He: byu myid: yug gi Gad voogung mo gyi: myang: yoem: bo da" akung: mo nghoid wigi nyangnu" gi David yo' nya: byu yi wigi said pyam zi shoug" bye:.